ކޮމިޝަނަރ އޮފް ޕޮލިސް މުހައްމަދު ހަމީދު ކޮވިޑް-19 ގެ ވެކްސިން ޖައްސަވައިފިއެވެ.
ކޯވިޑް ވެކްސިންގެ ފުރަތަ ޑޯޒު ޖެއްސެވުމަށްފަހު ސީޕީ ކުރެއްވި ޓްވީޓެއްގައި ވަނީ އެކަން ހާމަކުރައްވައިފައެވެ. އަދި ކޯވިޑް ފެތުރުން ހުއްޓުވުމަށް ރައްކާތެރި ފިޔަވަޅުތައްކަމުގައިވާ މާސްކު އެޅުމާއި، އަތް ދޮވުމާއި، ގައިދުރުކަން ބެހެއްޓުމަށް ވަނީ ހަނދާން ކޮށްދެއްވައިފައެވެ.
ސީޕީ ހަމީދު މިއަދު ކޯވިޑް ވެކްސިންގެ ފުރަތަމަ ޑޯޒް ޖެއްސެވިި އިރު އިއްޔެ ވަނީ ފުލުހުންގެ 100 އަށް ވުރެ ގިނަ އޮފިސަރުންވެސް ކޯވިޑްގެ ފުރަތަމަ ޑޯޒް ޖަހާފައެވެ.
Received the first shot of the COVISHIELD vaccine. #Covid19Dhifaau #AaUmmeedhu. We still need to #StaySafe #WashHands #MaskUp and stick to #SocialDistancing to #StopTheSpread pic.twitter.com/zdvHyZ7HWa
— Mohamed Hameed (@M_Hameedh) February 7, 2021
ރާއްޖޭގައި ކޮވިޑް ވެކްސިން ޖަހަން ފެށިތާ މިއަދަށް މީ ހަތްވަނަ ދުވަހެވެ. މިހާތަނަށް ހަހާހަށްވުރެ ގިނަ މީހުންނަށް ވަނީ ވެކްސިންގެ ފުރަތަމަ ޑޯޒް ދީފައެވެ. ރާއްޖޭގައި މިހާރު ޖަހަމުންދަނީ އިންޑިއާ އިން ހަދިޔާކުރި ކޯވިޑް ވެކްސިނެވެ. އިންޑިއާއިން ވަނީ އެއްލައްކަ ޑޯޒް ކޯވިޝީލްޑް ވެކްސިން ރާއްޖެއަށް ހަދިޔާކޮށްފައެވެ. ޗައިނާއިން ވެސް އެއްލައްކަ ޑޯޒުގެ ވެކްސިން ރާއްޖެ އަށް ހަދިޔާކުރުމަށް ވަނީ ނިންމާފައެވެ.