ސްވޮރިން ޑިވެލޮޕްމަންޓް ފަންޑް (އެސްޑީއެފް) މެނޭޖްކުރުމަށް ޤާނޫނީ އޮނިގަނޑެއް އެކުލަވާލުމަށް މަރުކަޒީ ބޭންކް، އެމްއެމްއޭގެ ގަވަރުނަރު ޢަލީ ހާޝިމް ލަފާ އަރުވައިފިއެވެ.
ބަޖެޓާ ގުޅޭ ގޮތުން ރައްޔިތުންގެ މަޖިލީހުގެ ބަޖެޓް ކޮމެޓީއަށް ލަފާ އަރުވަމުން ގަވަރުނަރު ޢަލީ ހާޝިމް ވިދާޅުވީ އެސްޑީއެފް މިހާރު މެނޭޖް ކުރައްވަމުން ގެންދަވަނީ މަރުކަޒީ ބޭންކް އެމްއެމްއޭއާއި ފިނޭންސް މިނިސްޓްރީއާ ދެމެދު ވެވިފައިވާ އެއްބަސް ވުމެއްގެ ދަށުންކަމަށެވެ. ނަމަވެސް އެފަންޑުގެ ބޭނުން ހެޔޮ ގޮތުގައި ހިފޭނީ އެކަމަށް އަވަސް މުއްދަތެއްގައި ޤާނޫނީ އޮނިގަނޑެއް އެކުލަވާލެވި އެޤާނޫނީ އޮނިގަނޑުގެ ތެރެއިން ފަންޑް މެނޭޖް ކުރުމުންކަމަށް ގަވަރުނަރު ފާހަގަ ކުރެއްވިއެވެ.
މި ފަންޑު ޤާއިމް ކުރުމުގެ މަޤްޞަދަކީ އަނބުރާ އަދާކުރަންޖެހޭ ސްކޫކު އަދި ބޮންޑްފަދަ ދަރަނިތައް ދެއްކުމަށް ބޭނުންވާ ފަންޑެއް ޤާއިމްކުރުންކަމަށް ގަވަރުނަރު ފާހަގަ ކުރެއްވިއެވެ. މިއަހަރާއި އަންނަ އަހަރަށް އެކަނިވެސް ޖުމުލަ 700 މިލިއަން ޑޮލަރުގެ ބޮންޑާއި ސްކޫކު ބޭރު ފަރާތަތްތަކަށް ވިއްކުމަށް އަންދާޒާކޮށްފައިވާ ކަމަށް ގަވަރުނަރު ފާހަގަ ކުރެއްވިއެވެ.
ޤާނޫނީ އޮނިގަނޑެއްގެ ދަށުން މި ފަންޑް މެނޭޖް ކުރުމުން އެފަންޑަށް ފައިސާ ޖަމާކުރެވި، މިމެކޭނިޒަމްގެ ސަބަބުން މިހާރު ނަގާ ދަރަނި ދެއްކޭނެކަމުގެ ޔަޤީންކަން އަންނަން އޮތް ޖީލުތަކަށް ވެސް ފޯރުކޮށްދެވޭނެކަމަށް ގަވަރުނަރ ފާހަގަ ކުރެއްވިއެވެ.
ސްވޮރިން ޑިވެލޮޕްމަންޓް ފަންޑް (އެސްޑީއެފް) ޤާއިމް ކޮށްފައި ވަނީ ރައީސް ޔާމިންގެ ވެރިކަމުގައެވެ.