ކޮވިޑް ކޮންޓްރޯލް ކުރުމަށް އިތުރު ފިޔަވަޅުތައް އެޅުމަށް މަޝްވަރާ ކުރައްވަމުން ގެންދަވާކަމަށާއި ވަރަށް އަވަހަށް އެ ފިޔަވަޅުތައް އިޢްލާން ކުރެވޭނެކަމަށް އެޗްއީއޯސީގެ ތަރުޖަމާން ޑރ.ނަޒްލާ ރަފީޤް ވިދާޅުވެއްޖެއެވެ.
ރޭގެ ޕްރެސް ކޮންފަރެންސްގައި ޑރ ނަޒްލާ ވިދާޅުވީ މިހާރު ވެސް އެޅިފައިވާ ފިޔަވަޅުތަކަށް ރައްޔިތުން ބޯލަނބައި އެއްބާރުލުން ދިނުމަކީ ބަލި ކޮންޓްރޯލް ކުރުމަށް އެންމެ މުހިންމު އެއް ފިޔަވަޅުކަމަށެވެ. ހަމައެހެންމެ ކޮންޓެކްޓް ޓޭރޭސިންގައި ތެދުމަޢުލޫމާތު ދެއްވުމުގެ މުހިންމުކަން ޑޮކްޓަރ ނަޒްލާ ފާހަގަ ކުރެއްވިއެވެ.
ކޮންޓެކްޓެއްނަމަ ޞައްޙަ މަޢުލޫމާތު ދެއްވައި ކަރަންޓީންވެގެން ގެގައި ތިއްބެވުމަކީ ވަރަށް މުހިންމު ކަމެއްކަމަށް ޑޮކްޓަރ ނަޒްލާ ފާހަގަކުރެއްވިއެވެ. ކަރަންޓީންވާން ޖެހޭ މީހުން ބައެއް ފަހަރު ޓެސްޓްކުރަން ސާމްޕަލް ނުނަގައިގެން މައްސަލަ ޖައްސާ ކަމަށް ޑޮކްޓަރ ނަޒުލާ ފާހަގަ ކުރެއްވިއެވެ. އުޞޫލެއްގެ ގޮތުން ޢަމަލުކުރަމުންދަނީ ކަރަންޓީންވާންޖެހޭ ކޮންޓެކްޓުން 14 ދުވަހުގެ ތެރޭގައި ކަރަންޓީންވުމަށްފަހު ސާމްޕަލް ނެގުން ކަމަށް ވިދާޅުވިއެވެ. ނަމަވެސް ކަރަންޓީން މުއްދަތުގެ ތެރޭގައި އަލާމާތްތައް ފެންނަނަމަ އެމީހަކު ޓެސްޓްކުރެވޭނެކަމަށް ވިދާޅުވިއެވެ. އެހެންކަމުން ފުރިހަމަ މަޢުލޫމާތު އެޗްޕީއޭއާ ޙިއްޞާ ކުރުމަކީ ބަލި ކޮންޓްރޯލްކުރުމަށް އެޅޭނެ އެންމެ މުހިންމު އެއް ފިޔަވަޅުކަން ޑޮކްޓަރ ނަޒުލާ ފާހަގަ ކުރެއްވިއެވެ.
ކޮވިޑް-19 ފެތުރުން ކޮންޓްރޯލްކުރުމަށް އެންމެ ފަހުން އެޅި އެންމެ މުހިންމު އެއްފުޔަވަޅަކީ މާލެ ސަރަޙައްދުގެ އާއްމު ތަންތަނުގައި މާސްކް އެޅުން މަޖުބޫރުކުރުމެވެ. މާސްއެޅުން މަޖްބޫރުކުރިފަހުން އެއަމުރާ، ތަކުރާރުކޮށް ޚިލާފުވި 73 މީހުން ތިން ދުވަސް ތެރޭގައި ވަނީ ޖުރިމަނާކޮށްފައެވެ. އިއްޔެގެ ނިޔަލަށް މާސްކް ނާޅައިގެން 645 މީހަކަށް ފުލުހުން ނަޞޭޙަތް ތެރިވެފައިވެއެވެ. އިއްޔެ އެކަނިވެސް 272 މީހަކަށް ނަޞޭހަތްތެރިވެ 52 މީހަކު ޖޫރިމަނާކޮށްފައިވެއެވެ.
މާސްކް ނާޅާ މީހުންނަށް ފުލުހުން ފުރަތަމަ ދެނީ ނަސޭހަތެވެ. ޖޫރިމަނާކުރަނީ ނަސޭހަތް ދިނުމުން ދެވަނަ ފަހަރަށް ވެސް އެކަން ރަނގަޅު ނުކުރުމުން ކަމަށް އެޗްއީއޯސީ އިން ވިދާޅުވެއެވެ. މާލެ ސަރަޙައްދުގެ އާންމު ތަންތަނުގައި އުޅޭއިރު މާސްކް ނާޅާ މީހުން 1000 ރުފިޔާއިން ޖޫރިމަނާ ކުރަން ނިންމި ނިންމުމަށް ޢަލުކުރަން ފެށީ މިމަހު ފުރަތަމަ ދުވަހުއެވެ. އުމުރުން ދެ އަހަރުން ދަށުގެ ކުޑަކުދިންނާއި ކަސްރަތުކުރާ ވަގުތުގައި ކަސްރަތު ކުރާ މީހުނާއި އެހެން މީހެއްގެ އެހީއާ ނުލާ މާސްކް އަޅައި، ނުނެގޭ މީހުން ވަނީ މާސްކް އެޅުމުގެ އަމުރުން އިސްތިސްނާކޮށްފައެވެ.
މިހާރު އަޅައިފައިވާ މުހިންމު އަނެއް ފިޔަވަޅަކީ އާންމު ޚިދުމަތްދޭ ތަންތަތަނުގައި ޚިދުތަދެމުންދަނީ އުޞޫލުތަކާ އެއްގޮތަށްތޯ އިންސްޕެކްޓްކޮށް އުޞޫލަށް ނުފެތޭތަންތަން ވަގުތުން ބަންދުކުރުމެވެ. އެގޮތުން އިއްޔެ އެކަނިވެސް 174 ތަނެއް އިންސްޕެކްޓްކޮށް އުޞޫލަތަކާ ޚިލާފަށް ޚިދުމަތް ދެމުން ދިޔަ 33 ތަނެއް ވަނީ ބަންދުކޮށްފައެވެ. ބަންދުކުރާ ތަންތަން އެޗްޕީއޭގެ މިންގަޑާ އެއް ގޮތަށް ކަންކަން ރަނގަޅުކުރުމުން އަލުން ހުޅުވުމުގެ ހުއްދަ ދަނީ ދެމުންނެވެ.
މީގެ އިތުރުން މިދުވަސްކޮޅު ބާއްވާ ޖަނާޒާކަންކަން ކުރުކުރުމާއި އަދި ރިސޯރޓްތަކުން ރަށްރަށަށްދާ މީހުންވެސް ކަރަންޓީން ވާންޖެހެގޮތަށް ވަނީ ހަމަޖައްސަވައިފައެވެ.
ކޮވިޑް ފެތުރުން ކޮންޓްރޯލް ކުރުމަށްޓަކައި މިއަދުން ފެށިގެން މިމަހު ހަވަނަ ދުވަހުގެ ނިޔަލަށް ސަރުކާރުގެ އޮފީސްތައް ވެސް ވަނީ ބަންދުކޮށްފައެވެ. މި މުއްދަތުގެ ތެރޭގައި ސަރުކާރުގެ އިދާރާތަކުން އޮންލައިންކޮށް ދެއްވެން ހުރި ހުރިހައި ޚިދުމަތްތަކެއް އޮންލައިންކޮށް ދެއްވަމުން ގެންދެވުމަށްވެސް ވަނީ ހަމަޖައްސަވާފައެވެ. އަދި މުވައްޒަފުން، ގޭގައި ތިބެގެން ކުރެވެން ހުރި މަސައްކަތްތައް، ގޭގައި ތިބެގެން ކުރައްވަމުން ގެންދެވުމަށް ވަނީ ހަމަޖައްސަވައިފައެވެ.
ބަލި ކޮންޓްރޯލްކުރުމަށް ކުރިންވެސް ވަނީ ސަރުކާރުގެ އޮފީސްތައް ބަންދުކޮށްފައެވެ. ތަފާސް ހިސާބުތަކުން ދައްކާ ގޮތުން މިހާރު ބަލި އެންމެ ބޮޑަށް ފެތުރެމުންދަނީ އޮފީސް މާހައުލުގައެވެ.