ބަންދުގައި ހުއްޓާ ހާލުބޮޑުވެ ފަރުވާދެމުންދަނިކޮށް އިއްޔެ މަރުވި ޔަމަނުގެ ރައްޔިތެއް ކަމުގައިވާ ޔާސިރު ޔަހްޔާ އަކީ ޓެރެރިޒަމް މައްސަލައިގައި އުފަން ޤައުމުގެ އިތުރުން ދުނިޔޭގެ އެކި ޤައުމުތަކުގައ ހައްޔަރުކުރެވި، އެކި ފަހަރު މަތީން ބަންދުކުރެވިފައިވާ މީހެއް ކަމަށް ރާއްޖޭގެ ކަމާބެހޭ މުއައްސަސާތައް ގުޅިގެން ނެރެފައިވާ ބަޔާނެއްގައި ބުނެފިއެވެ.
ޔާސިރު ޔަހުޔާގެ މަރާއި ގުޅިގެން، މޯލްޑިވްސް އިމިގްރޭޝަން އާއި މޯލްޑިވްސް ކަރެކްޝަނަލް ސާވިސް އާއި މޯލްޑިވްސް ޕޮލިސް ސާވިސް އިން ގުޅުން ނެރުނު ނޫސް ބަޔާނެއްގައި ބުނެފައިވަނީ ފުލުހުންގެ އިންޓެލިޖެންސަށް ލިބިފައިވާ މަޢުލޫމާތު ތަކުން އެނގޭ ގޮތުގައި އޭނާ އަކީ ޓެރެރިސްޓް ޖަމާޢަތެއްކަމުގައިވާ އަލްޤައިދާއާ ގުޅުން އޮންނަ، އެ ޖަމާޢަތުގެ އިސް ދައުރެއް އަދާކުރާ މީހެއް ކަމަށެވެ. އަދި އޭނާއަކީ އެ ޖަމާޢަތުން ހިންގާ މަތީ ފެންވަރުގެ ޓެރެރިސްޓް ތަމްރީނުތައް ފުރިހަމަކޮށްފައިވާ މީހެއް ކަމަށެވެ.
"ދުނިޔޭގެ އެކި ކަންކޮޅުތަކުގައި އެޖަމާޢަތުން ( އަލްޤައިދާ) އިން ހިންގާ ހަރަކާތްތައް ރާވާ ވިލަރެސް ކުރުމުގެ އިތުރުން، ޓެރެރިޒަމްއާ ގުޅުންހުރި މައްސަލަތަކުގައި މޯލްޑިވްސް ޕޮލިސް ސާވިސް އިން ތަހުޤީޤު ކޮށްފައިވާ ދިވެހިންނާއި ޔާސިރު ޔަހުޔާ ގުޅުން ބަދަހިކޮށްފައި ވެއެވެ." ބަޔާނުގައި ބުނެފައި ވެއެވެ.
ޓެރެރިޒަމް މައްސަލައިގައި އުފަން ޤައުމުގެ އިތުރުން ދުނިޔޭގެ އެކި ޤައުމުތަކުގައ ހައްޔަރުކުރެވި، އެކި ފަހަރު މަތީން ބަންދުކުރުމުގެ އިތުރުން ސައްޙަ ނޫން ޓްރެވެލް ޑޮކިއުމެންޓުގައި އެއް ޤައުމުން އަނެއް ޤައުމަށް އޭނާ ދަތުރު ކޮށްފައިވާކަން ވެސް ތަހުޤީޤަށް ހާމަވެފައިވާ ކަމަށް ބަޔާނުގައި ވަނީ ބުނެފައެވެ.
ބަޔާނުގައި ވާގޮތުން ޔާސިރު ޔަޙްޔާ ޓޫރިސްޓު ވިސާގައި ރާއްޖެއަށް އެތެރެވީ 2014 ވަނަ އަހަރުއެވެ. އެ އަހަރު އޭނާ ދިވެއްސަކާއި ކައިވެނި ކުރިއެވެ. ފުލުހުންގެ އިންޓެލިޖެންސް މަޢުލޫމާތަށް ބިނާކޮށް ޔާސިރު ޔަޙްޔާ އަކީ ޤައުމީ ސަލާމަތަށްހުރި ނުރައްކަލެއް ކަމަށް ޤަބޫލު ކުރެވޭތީ 2017 ވަނަ އަހަރުގެ މާޗް މަހުގެ ދެވަނަ ދުވަހު އޭނާ ރާއްޖޭގައި ހުރުމަށް ދޫކޮށްފައިވާ ހުއްދަ ބާޠިލް ކޮށްފައިވާ ކަމަށް ބަޔާނުގައި ބުނެއެވެ. ނަމަވެސް ހުއްދަ ބާޠިލް ކުރުމުގެ ކުރިން 2017 ވަނަ އަހަރުގެ މާޗް ފުރަތަމަ ދުވަހު އޭނާ އިމިޤްރެޝަނަށް ހާޒިރުކޮށް އެއް މަސް ދުވަސްތެރޭގައި ރާއްޖެއިން ފުރައިގެން ދިއުމަށް އަންގައިފައި ވާނެކަމަށް ބަޔާނުގައި ވއެވެ. ނަމަވެސް އެއްބަސްވުމާ އެއްގޮތަށް ޢަމަލުކޮށްފައި ނުވާތީ އޭގެ ފަހުންވެސް ތިން ފަހަރެއްގެ މަތިން ރާއްޖެއިން ފުރައިގެން ދިއުމަށް އަންގައިފައި ވާނެ ކަމަށް ބުނެފައިވެއެވެ. ފުރުވާލެވެންދެން އިމިގްރޭޝަން ޤާނޫނާ ޚިލާފު ވެގެން ބިދޭސީން ބައިތިއްބާ ޑިޓެންޝަން ސެންޓަރެއްގައި އޭނާ ބަންދުކޮށްފައިވަނީ ރާއްޖެ ދޫކޮށް ފުރައިގެން ދިއުމަށް ތަކުރާރުކޮށް އެންގުމުންވެސް ފުރައިގެން ގޮސްފައި ނުވާތީކަމަށް ކަމާ ބެހޭ މުއައްސަސާތައް ގުޅިގެން ނެރުނު ބަޔާނުގައި ވެއެވެ.
އިއްޔެ އޭނާ މަރުވީ ކެއިންބުއިމަށް އިންކާރު ކުރުމުގެ ސަބަބުން ސިއްޙީ ޙާލަތު ދަށްވެގެން އައިޖީއެމްއެޗްގައި އެޑްމިޓްކޮށް ފަރުވާދެމުން ދަނިކޮށް ސްޓްރޯކެއް ޖެހިގެން ކަމަށް ވެސް ބަޔާނުގައި ބުނެފައި ވެއެވެ.
ޔާސިރު ޔަހުޔާ ބަންދުކޮށްފައި ހުރި މުއްދަތުގައި އޭނާ އާއި މެދު ޢަމަލުކޮށްފައި ވަނީ ސަލާމަތީ ގޮތުން ކަށަވަރު ކުރަންޖެހޭ ކަންކަން ކަށަވަރު ކުރުމަށްފަހު އިންސާނީ ހައްޤުތަކަށް ރިޢާޔަތް ކޮށްގެން ކަމަށްވެސް ބަޔާނުގައި ބުނެއެވެ. އެގޮތުން އޭނާގެ ދިވެހި އާއިލާ އާއި ގުޅުން ބޭއްވުމަށާއި، ކެއިންބުއިމާއި ހުރުމުގައިވެސް ޚާއްސަ އުސޫލެއްގެ ދަށުން ލުއި ގޮތްތަކެއް ހަމަޖައްސައި ދީފައި ވާނެ ކަމަށް ބުނެފައި ވެއެވެ. އަދި އެމުއްދަތުގައި އޭނާއާ ބެހޭ މަޢުލޫމާތު ޔަމަނުގެ ސަރުކާރަށް ފޮރިން މިނިސްޓްރީ މެދުވެރިކޮށް ފޯރުކޮށް ދީފައި ވާނެކަމަށް ވެސް ބަޔާނުގައި ވެއެވެ.
ބަޔާނުގައި ބުނެފައި ވަނީ ޔާސިރު ޔަހުޔާ ރާއްޖެއިން ފުރުވާލުމަށް ބޭނުންވާ ޓްރެވެލް ޑޮކިއުމެންޓް ފޮރިން މިނިސްޓްރީ މެދުވެރިކޮށް ޔަމަނު ސަރުކާރުން ހޯދުމަށް އެކި ފަހަރު މަތީން ތަކުރާރުކޮށް މަސައްކަތް ކުރިނަމަވެސް އޭނާގެ ފަރާތުން އެކަމަށް އެއްބާރުލުން ލިބިފައި ނުވާކަމަށެވެ. މިކަމާއި ގުޅިގެން "އިންވޮލެންޓަރިލީ" ޔާސިރު ޔަހުޔާ ރާއްޖެއިން ފުރުވާލުމަށް ބޭނުންވާ ލިޔެކިޔުންތައް ހޯދުމަށް މިނިސްޓްރީ މެދުވެރިކޮށް ޔަމަނުގެ ސަރުކާރުގައި އެދިފައިވާ ކަމަށްވެސް ބަޔާނުގައި ވެއެވެ.
އޭނާ ރާއްޖެއިން ފުރުވާލުމަށް އެކި ފަހަރު މަތިން މަސައްކަތް ކުރެވުނު ނަމަވެސް މަރުވުމާ ހަމައަށް ވެސް އޭނާ ރާއްޖެއިން ފުރުވާލެވިފައި ނުވަނީ ފުރައިގެން ދިއުމަށް އިންކާރުކޮށް ފުރުމަށް ބޭނުންވާ ޓްރެވެލް ޑޮކިއުމެންޓް ހެއްދުމަށް އެއްބާރުލުން ދީފައި ނުވުމުގެ ސަބަބުން ކަމަށް ގުޅުން ހުރި މުއައްސަސާތަކުން ގުޅިގެން ނެރުނު ބަޔާނުގައި ވެއެވެ.