މޯލްޑިވްސް އިސްލާމިކް ބޭންކުގައި ޢާންމު ޙިއްސާދާރުން ތަމްސީލު ކުރެއްވުމަށް އަލްފާޟިލް އަޙްމަދު އަސްލަމް، ހަވީރިޔާ، ރ.އިގުރައިދޫ ކުރިމަތިލައްވައިފިއެވެ. އަސްލަމް މިހާރު މަސައްކަތް ކުރައްވަމުން ގެންދަވަނީ ހައުސިންގ ޑިވެލޮޕްމަންޓު ކޯޕަރޭޝަން(އެޗް.ޑީ.ސީ)ގެ ޗީފް އެކައުންޓެންޓުގެ މަޤާމުގައެވެ. 2005 ވަނަ އަހަރު އެސިސްޓެންޓް އެކައުންޓެންޓުގެ މަޤާމަށް އެޗް.ޑީ.ސީ.ގައި މަސައްކަތް ކުރައްވަން ފެއްޓެވި ހިސާބުން އެ ކުންފުނީގެ ފައިސާއާއި ބެހޭ ބައިގެ އެކިއެކި އިސްމަޤާމުތަކުގައި އަސްލަމްވަނީ މަސައްކަތް ކުރައްވައި ދައުލަތުގެ ކުންފުންޏެއްގެ ކަންކަން ހިގާނުހިގާގޮތުގެ ފުރިހަމަ ތަޖުރިބާ ހޯއްދަވާފައެވެ. 2017 ވަނަ އަހަރުން ފެށިގެން އަސްލަމް އަކީ ޗާޓަރޑް އިންސްޓިޓިއުޓް އޮފް އިސްލާމިކް ފައިނޭންސް ޕްރޮފެޝަން(ސީ.އައި.އައި.އެފް) މެމްބަރެކެވެ. މެލޭޝިޔާގެ އިންޓަރނޭޝަނަލް ސެންޓަރ ފޮރ އެޑިޔުކޭޝަން އިން އިސްލާމިކް ފައިނޭންސް(އިންސިއެފް) އޭނާވަނީ މާސްޓަރސް އިން އިސްލާމިކް ފައިނޭންސް ޕްރެކްޓިސް ޙާސިލް ކުރައްވާފައެވެ. އަދި އޭނާވަނީ އިގިރޭސި ވިލާތުގެ ޔުނިވަރސިޓީ އޮފް އީސްޓް ލަންޑަން އިން ބެޗްލަރ އޮފް އެކައުންޓިންގެ އެންޑް ފައިނޭސް ޑިގްރީ ޙާސިލް ކުރައްވާފައެވެ. މީގެ އިތުރުން 2013 ވަނަ އަހަރުން ފެށިގެން އެސޯސިއޭޓް އޮފް ޗާޓަޑް އިންސްޓިޓިއުޓް އޮފް މެނޭޖްމަންޓް އެކައުންޓެންޓްސް(ސީމާ) އިން ވަނީ އަސްލަމް އަކީ ޗާޓަޑް އެކައުންޓެންޓެއްކަމަށް ބަލައިގެންފައެވެ. އަސްލަމް އަކީ ތެދުވެރިކަމާއި، ހީވާގި ކަމާއި މުރާލިކަމާއި އެކު "އެކައުންޓިން އެންޑް ފައިނޭންސް" ދާއިރާގައި ޢަމަލީ މަސައްކަތްތައްކޮށް ފާއިތުވެ 10 އަހަރު ތަޖުރިބާ ހޯއްދަވާފައިވާ ބޭފުޅެކެވެ. އަދި އަސްލަމް އަކީ މީރާގެ ލައިސަންސް ލިބިފައިވާ ޓެކްސް އޭޖެންޓެކެވެ. އަދި އިންޝުއަރެންސް އޭޖެންޓެއްވެސް މެއެވެ.
މީގެ އިތުރުން ލިބި ވަޑައިގަންނަވާފައިވާ ތަޖުރިބާއާއި ޢިލްމު ޙިއްސާކުރެއްވުމަށްޓަކައި ރާއްޖޭގެ ކޮލެޖްތަކާއި ޔުނިވަރސިޓީތަކުގައި ކިޔަވާ ދެއްވައެވެ. އަސްލަމް އަކީ ދަރުމައަށް މަސައްކަތް ކުރައްވާ، އަދި މޯލްޑިވްސް ރެޑް ކްރެސެންޓް(އެމް.އާރު.ސީ) ގެ ކުރީގެ ފައިނޭންސް ކޮމިޝަންގެ މެންބަރެކެވެ. އަސްލަމް މިވަގުތު އެއްވެސް ކުންފުންޏެއްގެ ޑިރެކްޓަރުކަމެއް ނުކުރައްވައެވެ. އޭނާ މޯލްޑިވްސް އިސްލާމިކް ބޭންކުގައި 200 ހިއްސާ ބައްލަވައިގަންނަވާފައިވެއެވެ. އަސްލަމްގެ އިތުރަށް ދެން މި މަޤާމަށް ކުރިމަތިލައްވާފައިވަނީ އަހުމަދު ޢަލީ، ލަކްސްލީން، ހއ.ތަކަންދޫއެވެ.
އެމް.އައި.ބީ އަހަރީ ޢާންމު ޖަލްސާ އޮންނާނީ 23 ޖުލައި 2020 ވާ ބުރާސްފަތި ދުވަހު މެންދުރު 2 ޖަހާއިރުއެވެ. މި ޖަލްސާ އޮންނާނީ މޯލްޑިވްސް ސެކިއުރިޓީ ޑިޕޮސިޓަރީން ތައްޔާރުކޮށްފައިވާ "އޮންލައިން މީޓިންގ މެނޭޖްމަންޓް ސިސްޓަމެއް" މެދުވެރިކޮށެވެ. އަދި ވޯޓް ނަގަން ހަމަޖައްސާފައިވަނީ "އޮންލައިންކޮށް" އެތަނުން ތައްޔާރުކޮށްފައިވާ https://fahivote.mv "ފަހި ވޯޓު" މެދުވެރިކޮށެވެ.
މި ޖަލްސާގައި ބައިވެރިވެ ވަޑައިގަންނަވަން ބޭނުންފުޅުވާ އެ ބޭންކުގެ ހިއްސާދާރުން 21 ޖުލައި 2020 އަންގާރަ ދުވަހުގެ ކުރިން އޮންލައިންކޮށް https://infinity.mv ރަޖިސްޓްރީ ވުމަށް ނުވަތަ ރަޖިސްޓްރީ ވުމަށް އެދޭ ފޯމު ފުރުއްވުމަށްފަހު investor.relations@mib.com.mv ފޮނުއްވުމަށް އެ ބޭންކުން ވަނީ ޢިއުލާނުކޮށްފައެވެ. މި ޖަލްސާގައި ޕްރޮކްސީ މެދުވެރިކޮށް ވޯޓު ދޭ ފަރާތްތަކުންނާއި އަދި އޮންލައިންކޮށް ޙާޟިރުވެ ތިބެ ވޯޓޫ ދޭ ކޮންމެ ފަރާތަކަށް ލެވޭނީ ހިއްސާއަކަށް އެއް ވޯޓެވެ.