ދިވެހި ބިމުގައި ދިވެހީން ރަހީނުކޮށް މުދަލަށް ގެއްލުން ދިނުމަކީ ރަނގަޅު ކަމެއް ކަމުގައި ދުށުމަކީ ގައުމަށް ގައްދާރުވުން ކަމުގައި ޑިފެންސް މިނިސްޓަރ މާރިޔާ ދީދީ ވިދާޅުވެއްޖެއެވެ. މާރިޔާ ދީދީ މިހެން ވިދާޅުވީ ބޮޑުފިނޮޅުގައި ބިދޭސީން ހިފެހެއްޓި ދިވެހިންތަކެއް ސަަލާމަތްކުރުމުން ފުލުހުންނާއި ރައީސް އިބްރާހިމް މުޙަައްމަދު ޞާލިޙް އަދި ބަނގްލަދޭޝްގެ ހައިކޮމިޝަނަށް ޝުކުރު އަދާކުރައްވައި އެކަމަށް މިއަދު ހެނދުނު ކުރެއްވި ޓުވީޓަށް ގިނަބަޔަކު ފާޑުކިޔުމާ ގުޅިގެންނެވެ.
މާރިޔާގެ ޓުވީޓަށް ފާޑުކިޔާފައިވަނީ މުސާރަ ނުދީ ބިދޭސީން ލައްވައި ހަ މަސްދުވަސް ވަންދެން މަސައްކަތް ކުރުވުމުން އެކަމާ ގުޅޭ ގޮތުން އެއްވެސް އެއްޗެއް ވިދާޅުވެފައިނުވާތީއެވެ.
ފާޑުކިޔުންތަކާ ގުޅިގެން މިނިސްޓަރ ވިދާޅުވީ "ބިދޭސީން ދިވެހި ބިމުގައި، ދިވެހިންތަކެއް ރަހީނުކޮށް މުދަލަށް ގެއްލުން ދިނުމަކީ، މުސާރަ ނުލިބުމުން އޯކޭ ކަމެއް ކަމުގައި ދެކޭނަމަ އެއީ ގައުމަށް ގައްދާރުވުން ކަމަށް އަޅުގަނޑު ދެކެން" ކަމަށެވެ.
މީގެ އިތުރަށް ބިދޭސީންެެގެ ހައްގު ހޯދަން ރާއްޖޭގެ ކޯޓުތަކާއި ހިއުމަން ރައިޓްސް ކޮމިޝަނާއި ލޭބަރ ރިލޭޝަންސް އޮތޯރިޓީ އާއި އަދި މި ނޫންވެސް ގާނޫނީ އެތައް އިންތިޒާމުތަކެއް ހަމަޖެހިފައި ހުންނަ ކަމަށް ވިދާޅުވިއެވެ.