ފިޝަރީޒް މިނިސްޓްރީއާއިއެކު ވެފައިވާ އެއްބަސްވުމާ ޚިލާފުވުމުގެ ސަބަބުން މަސްވެރި ކަމުގެ ސިނާއަތުގައި ހަރަކާތްތެރިވާ ދެކުންފުންޏަކަށް މިނިސްޓްރީން ފިޔަވަޅު އެޅުމުގެ ނޯޓިސް މިއަދު ދީފިއެވެ. އަދި ވަނީ ޚިލާފުވި ކަންކަން ރަނގަޅު ކުރުމަށް މުހުލަތެއް ވެސް ދީފިއެވެ.
ފިޔަވަޅުއެޅުމުގެ ނޯޓިސް މިނިސްޓްރީން މިއަދު ދީފައިވަނީ އައިލެންޑް އެންޓަރޕްރައިސަސް ޕްރައިވެޓް ލިމިޓެޑާއި އިކޯ ފިޝަރީޒް އިންޓަނޭޝަނަލް ޕްރައިވެޓް ލިމިޓެޑަށެވެ.
މިނިސްޓްރީން ވިދާޅުވެފައިވާ ގޮތުގައި އެ ދެކުންފުންޏަކީ ހއ. އަތޮޅުން ފެށިގެން ކ. އަތޮޅު ހިމެނޭ ސަރަޙައްދުގައި މަސްގަތުމަށް ޙަރަކާތްތެރިވާންޖެހޭ ކުންފުނިތަކެވެ. މިނިސްޓްރީއާއެކު ވެފައިވާ އެއްބަސްވުމާ ޚިލާފުވާން އެ ދެކުންފުނީން ކުރިކަމެއް މިނިސްޓްރީން ވިދާޅެއް ނުވެއެވެ.
އެހެންނަމަވެސް އެ ދެ ކުންފުނީން ޚިލާފު ވެފައިވަނީ ކަޅުބިލަމަހުގެ ސިނާޢަތު ތަރައްޤީކުރުމުގެ މަޝްރޫޢުގެ ދަށުން، ދޮށީގެ މަސްވެރިކަމުގައި ބާނާ މަސް ގަނެ، ޕްރޮސެސްކޮށް، އެކްސްޕޯޓްކުރުމަށް އެ މިނިސްޓްރީއާއިއެކު ވެފައިވާ އެއްބަސްވުމާ ކަމަށް މިނިސްޓްރީން ވިދާޅުވެފައިވެއެވެ.
މިނިސްޓްރީން ވިދާޅުވެފައިވަނީ އެ ދެ ކުންފުންޏަށް ވެސް މިހާރުވަނީ އެއްބަސްވުމާ އެއްގޮތަށް އަމަލުކުރުމަށްޓަކައި، 30 ދުވަހުގެ ނޯޓިސް ދީފައެވެ. އެމުއްދަތުގެ ތެރޭގައި ވޯރކްޕްލޭންގައިވާ ކަންކަން ފުރިހަމަކުރުމަށް ވެސް އަންގާފައިވާނެ ކަމަށް މިނިސްޓްރީން ވިދާޅުވިއެވެ.