މިހާރު ހަލުވިކަމާއެކު ފެތުރެމުންދާ ނޮވެލް ކޮރޯނާ ވައިރަސް (ކޮވިޑް-19) އެގައުމަށް އެތެރެވުން ހުއްޓުވުމަށް އަޅާ ފިޔަވަޅެއްގެ ގޮތުން އުމްރާގެ އަޅުކަން އަދާކުރުމަށާ މަސްޖިދުއްނަބަވީއަށް ޒިޔާރަތްކުރުމަށް އެގައުމަށް އެތެރެވުން ސައޫދީ އަރަބިއްޔާއިން މަނާކޮށްފިއެވެ. މިކަން ހާމަކޮށްފައި ވަނީ އެގައުމުގެ ފޮރިން މިނިސްޓްރީން ރޭގެ ވަގުތެއްގައި ނެރުނު ބަޔާނެއްގައެވެ.
އެ ބަޔާނުގައި ވާގޮތުން، ސައޫދީ ރައްޔިތުންނާއި، ސައޫދީ އަރަބިއްޔާގައި ދިރިއުޅޭ އެހެން ގައުތަކުގެ މީހުންނާއި ތަފާތު ބޭނުންތަކުގައި އެގައުމަށް ޒިޔާރަތްކުރާ މީހުންނަށް ރައްކާތެރި ސިއްހީ މާހައުލެއް ގާއިމުކޮށްދިނުމަށާއި، މިހާރު ހަލުވިކަމާއެކު ފެތުރެމުންދާ ކޮރޯނާ ވައިރަސް ސައޫދީ އަރަބިއްޔާއަށް އެތެރެވުން ހުއްޓުވުމަށްޓކައި ސިއްހީ އިދާރާތަކުން ދިން ލަފާގެ މައްޗަށް ބިނާކޮށް ތިން ފިޔަވަޅެއް އެޅުމަށް ވަނީ ނިންމާފައވެ.
- އުމްރާގެ އަޅުކަން އަދާކުރުމަށާއި، މަސްޖިދުއްނަބަވީއަށް ޒިޔާރަތްކުރުމަށް ސައޫދީ އަރަބިއްޔާއަށް އެތެރެވުން ވަގުތީ ގޮތުން މަނާކުރުން
- އެ ގައުމުތަކުން ކޮރޯނާ ވައިރަސް އަތުވެދާނެ ކަމުގެ ބިރު އޮތް ގައުމުތަކުން ޓޫރިސްޓު ވިސާގައި ސައޫދީ އަރަބިއްޔާ އެތެރެވުން މަނާކުރުން.
- ސައޫދީ ރައްޔިތުންނާއި، ގަލްފް ކޯޕަރޭޝަން ކައުންސިލް (ޖީސީސީ) ގެ މެންބަރު ގައުމުތަކުގެ ރައްޔިތުން އެމީހުންގެ އައިޑެންޓިޓީ ކާޑު ބޭނުންކޮށްގެން ސައުދީއަރަބިއްޔާއަށް އެތެރެވުން މަނާކުރުން.
އުމްރާގެ އަޅުކަން އަދާކުރުމަށް އަހަރަކު 7 މިލިއަނަށް ވުރެ ގިނަ މީހުން ސައޫދީ އަރަބިއްޔާއަށް އެތެރެވެއެވެ.
ސައޫދީ އަރަބިއްޔާއިން މިފިޔަވަޅު އެޅިއިރު، އެ ގައުމުގެ ވަށައިގެންވާ ގިނަ ގައުމުތަކަކުން މިހާރު ވަނީ ކޮރޯނާ ވައިރަސް ފެނިފައެވެ. އަދި އެގައުމުގެ އަވަށްޓެރި ގައުމެއް ކަމުގައިވާ އީރާނުގައި ހަލުވިކަމާއެކު ބަލި ފެތުރެމުންދާއިރު، އީރާނު ވެފައި ވަނީ ޗައިނާ ފިޔަވައި، އެބަލި ޖެހިގެން އެންމެ ގިނަ މީހުން މަރުވި ގައުމު ކަމުގައެވެ.
ދުނިޔޭގެ ސިއްހަތު ޖަމްއިއްޔާ (ޑަބްލިޔުއެޗްއޯ) އިން ހާމަކުރި ގޮތުގައި ކޮރޯނާ ވައިރަސް ފުރަތަމަ ފެތުރެން ފެށި ގައުމު ކަމުގައިވާ ޗައިނާގައި ބަލި ޖެހޭ މިންވަރު ދަށްވެފައިވާއިރު، ދުނިޔޭގެ ކަންކޮޅުތަކުގައި ބަލި ފެތުރޭ މިންވަރު ދަނީ އިތުރުވަމުންނެވެ.
ކޮރޯނާ ވައިރަސް މިހާރު ވަނީ ދުނިޔޭގެ 44 ގައުމަކަށް ފެތުރިފައެވެ. ދުނިޔޭގެ ބައްރުތަކުގެ ތެރެއިން އެ ވައިރަސް ނުފޯރާ ބައްރަކަށް މިހާރު އޮތީ އެންޓާކްޓިކާއެވެ. މިހާތަނަށް 81 ހާސް މީހުންނަށް ބަލިޖެހިފައިވާ އިރު، އެބަލީގައި 2800 މީހުން ވަނީ މަރުވެފައެވެ.