ޑިޒައިން އެންޑް ބިލްޑް އުސޫލުން ލ.މާވަށު ބަނދަރު ހެދުމުގެ މަސައްކަތާއި ގއ. މާމެންދޫ ބޭރުތޮށި ހެދުމުގެ މަސައްކަތް މިއަދު ބަޔަކާ ޙަވާލު ކޮށްފިއެވެ.
މާވަށު ބަނދަރު ހެދުމުގެ މަސައްކަތް ސަރުކާރުން ޙަވާލުކުރައްވީ އެމްޓީސީސީއާއެވެ. އެމަސައްކަތް އެކުންފުންޏާ ޙަވާލު ކުރެއްވީ 330 ދުވަސްތެރޭގައި ނިންމާ ގޮތަށް 27,376,010.50 ރުފިޔާ އަށެވެ.
މިމަސައްކަތުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއި ކުރެއްވީ ޕާމަނަންޓް ސެކްރެޓަރީ ޒީނިއާ އަޙުމަދު ޙަމީދެވެ. އެމްޓީސީސީގެ ފަރާތުން ސޮއިކުރެއްވީ ސީއީއޯ ޝާހިދު ޙުސައިން މޫސާއެވެ.
ގއ.މާމެންދޫ ބޭރުތޮށި ހެދުމުގެ މަސައްކަތް ޙަވާލު ކުރެއްވީ ސާސް އީ ކޮންސްޓްރަކްޝަން ޕްރައިވެޓް ލިމިޓެޑާއެވެ. އެމަސައްކަތް އެކުންފުންޏާ ޙަވާކުރެއްވީ 31,141,293.26 ރުފިޔާ އަށެވެ. މަސައްކަތް ނިންމަން އެއްބަސްވެފައިވާ މުއްދަތަކީ 450 ދުވަހެވެ.
މިމަސައްކަތުގެ އެއްބަސްވުމުގައި ޕްލޭނިން މިނިސްޓްރީގެ ފަރާތުން ސޮއި ކުރެއްވީ ޕާމަނަންޓް ސެކްރެޓަރީ ޒީނިއާ އަޙުމަދު ޙަމީދެވެ. ސާސް އީ ކޮންސްޓްރަކްޝަން ޕްރައިވެޓް ފަރާތުން ސޮއި ކުރެއްވީ މެނޭޖިން ޑިރެކްޓަރ ސަޢުދުﷲ އަޙުމަދެވެ.