މިއަދު ރާއްޖެ ވަޑައިގެންނެވި ސްރީލަންކާގެ ބޮޑުވަޒީރު ރަނިލް ވިކްރަމަސިންހަ މާދަމާ އޮންނަ ރައްޔިތުންގެ މަޖިލީހުގެ ޖަލްސާގައި ތަޤްރީރު ކުރައްވާނެއެވެ.
މާދަމާގެ ހެނދުނު 9:30 ގައި މަޖިލީހުގެ ޖަލްސާ ފެށުމަށް ފަހު އެންމެ ފުރަތަމަވެސް އޮތީ ރަނިލް ތަޤްރީރު ކުރެއްވުމެވެ. ރާއްޖެއާ އެންމެ އަވައްޓެރި ގައުމު ކަމަށްވާ ސްރީލަންކާގެ ބޮޑުވަޒީރު މާދަމާ މަޖިލީހުގައި ތަޤްރީރު ކުރައްވާއިރު ދާދިފަހުން ވަނީ އަވައްޓެރި އިންޑިޔާގެ ބޮޑުވަޒީރު މޯދީވެސް ރާއްޖޭގެ ރައްޔިތުންގެ މަޖިލީހުގައި ތަޤްރީރު ކުރައްވާފައެވެ.
ރަނިލްގެ ދެކަނބަލުން މިއަދު ރާއްޖެ ވަޑައިގެންނެވީ ރައީސުލްޖުމްހޫރިއްޔާ އިބްރާހިމް މުޙަންމަދު ސޯލިޙުގެ ދައުވަތަކަށެވެ. މިމަހުގެ 3 އިން 4 އަށް ރާއްޖޭގައި ބާއްވާ އިންޑިއަން އޯޝަން ކޮންފަރެންސް 2019 ގައިވެސް ރަނިލް ބައިވެރިވެވަޑައިގަންނަވާނެއެވެ. އެ ކޮންފަރެންސް ޗެއަރ ކޮށްދެއްވާނީވެސް ރަނިލްއެވެ.
ރަނިލް މިއަދު ރާއްޖެ ވަޑައިގެންނެވުމުން ދިވެހި ސަރުކާރުން ހޫނު މަރުޙަބާއެއް ދަންނަވާފައިވާއިރު ރައީސް ސޯލިހާއި އާއި ރަނިލް މިއަދު ވަނީ ރައީސް އޮފީހުގައި މީޑިޔާއަށް ގުޅިފައިވާ ބަޔާނެއްވެސް ދެއްވާފައެވެ. އަދި ދެގައުމުގެ މެދުގައި މިއަދު ވަނީ އެއްބަސްވުންތަކެއްގައި ސޮއިވެސް ކޮށްފައެވެ.