އޮގަސްޓު 12، 13 ފާހަގަކުރުމަށް އިދިކޮޅު ފަރާތްތަކުން ޖަލްސާއެއް ބާއްވައިފިއެވެ.
އޮގަސްޓް ބާރަ ތޭރަ އަކީ އިސްލާހަށް މަސައްކަތްކުރާ މީހުންގެ ނަމުގައި 2004 ވަނައަހަރު ބަޔަކު ނުކުމެ މާލޭގެ ޖުމްހޫރީ މައިދާނުގައި އިހުތިޖާޖުކުރި ދެދުވަހެވެ. ދިގުދެމިގެންދިޔަ މިއިހުތިޖާޖުގައި އިދިކޮޅު ފަރާތްތަކާއި ސަރުކާރާދެމެދު ވާހަކަތަކެއް ދެކެވުނެވެ. އިދިކޮޅު މީހުން ސަރުކާރަށް ޑިމާންޑްތަކެއްވެސް ހުށަހެޅިއެވެ. ބައެއް ޑިމާންޑްތަކަށް ސަރުކާރުން އިޖާބަވެސް ދިނެވެ.
އެހެންނަމަވެސް ހަމަނުޖެހުން ހިނގުމާގުޅިގެން އެ އިހުތިޖާޖު ރޫޅާލައި ސަލާމަތީ ބާރުތަކުންވަނީ އިހުތިޖާޖުގައި ބައިވެރިވި މީހުންގެތެރެއިން ބައެއް މީހުން ހައްޔަރުކޮށްފައެވެ.
މިއީ އެގޮތަށް ސަރުކާރާދެކޮޅަށް ފަހުގެ ތާރީޚުގައި ރާއްޖޭގައި ބޭއްވި ފުރަތަމަ އެއްވުންކަމުގައި ސިޔާސީބޭފުޅުން ސިފަކުރެއެވެ.
އިދިކޮޅު އެމްޑީޕީން އޭގެފަހުން އަބަދުވެސް މިދެދުވަސް ފާހަގަކުރެއެވެ.
މިރޭ އާޓިފިޝަލް ބީޗުގައި ބޭއްވި އެއްވުމަކީވެސް އެދުވަސް ފާހަގަކުރުމަށް ބޭއްވި އެއްވުމެކެވެ. ޖަލްސާއެއްގެ ސިފައިގައި ބޭއްވި މިއެއްވުން ކުރިއަށްނުގެންދިއުމަށް އަންގާ، ޖަލްސާ ރޫޅާލާނެކަމުގެ އިންޒާރު ފުލުހުން ދިންކަމަށް މަޢުލޫމާތުލިބެއެވެ. އެހެންނަމަވެސް ޖަލްސާ ފެށިއެވެ.
ވާހަކަފުޅުދެއްވި ބޭފުޅުންވަނީ މިހާރުގެ ސަރުކާރަށާއި، ސަރުކާރުގެ އިސްވެރިންނަށް، ފާޑުވިދާޅުވެ ވާހަކަފުޅުދައްކަވާފައެވެ.
އަދި ޝަރުޢީދާއިރާއަށާއި، ސަލާމަތީ ބާރުތަކަށްވެސް އެބޭފުޅުން ފާޑުވިދާޅުވިއެވެ.
މަޖީދީ މަގުން ޖަލްސާގެ ބައިވެރިން ކުރިއަށް ދިއުމަށް ގޮވާލުމަށްފަހު ޖަލްސާ ނިންމާލީއެވެ. އެހެންނަމަވސް މިރޭ އެއްވެސް ވަރެއްގެ ހަމަނުޖެހުމެއްވެސް ނުހިނގައެވެ.