ޗުއްޓީ ހޭދަކޮށްލުމަށް ޕެރަޑައިސް އައިލެންޑް ރިސޯޓަށް އައިސް އުޅުނު ދެކުނު ކޮރެޔާގެ އަންހެން ފަތުރުވެރިޔަކު މިއަދު ގެނބިގެން މަރު ވެއްޖެއެވެ.
އުމުރުން 66 އަހަރުގެ މި އަންހެން މީހާ ގެނބިފައި ވަނީ މޫދަށް އެރިއުޅުމުގެ ތެރޭގައި ގެނބިގެން މާލެ ގެނެސް އޭޑީކޭ ހޮސްޕިޓަލުގައި ފަރުވާވެސް ދެމުން ދަނިކޮށް ކަމަށް މައުލޫމާތު ލިބިފައިވެއެވެ. މިއީ މިމަހުގެ ތެރޭގައި ރާއްޖެ އައި ފަތުރުވެރިންގެ ތެރެއިން ތިންވަނައަށް މަރުވި މީހާއެވެ.
މިމަހުގެ 13 ވަނަ ދުވަހުވެސް ރާއްޖެ އައި ދެފަތުރުވެރިން އެކުގައި ގެނބިގެން ވަނީ މަރުވެފައެވެ. އެއީ ފިލިޕީންސްގެ ދެމަފިރިންނެވެ. އަލަތު ކައިވެންޏަށް ފަހު ހަނީމޫނަށް ރާއްޖެ އައިސް މާލެ އަތޮޅު ދިއްފުށީ ގެސްޓްހައުސްއެއްގައި ތިބި މިދެމަފިރިން ގެނބިފައި ވަނީ ސްނޯކްލިންއަށް ގޮސް އުޅުމުގެ ތެރޭގައި ގެނބިގެންނެވެ. އެދެމީހުންގެ ހަށިގަނޑުވެސް މިހާރު ވަނީ އެގައުމަށް ފޮނުވާލާފައެވެ.