ރައީސް ޢަބްދުﷲ ޔާމީން ޙައްޖުގެ މަތިވެރިވެރި އަޅުކަމަށްފަހު ރާއްޖެ ވަޑައިގެން ހުޅުލެއިން މާލެ ވަޑައިގެންނެވި ފިނިފެންމާ ލޯންޗުގައި އެއްޗެއް ގޮވި ޙާދިސާގެ ރޯ ވީޑިއޯ ފުޓޭޖު ސަންގު ޓީވީއަށް ލިބިގެން އެ ޓީވީން މިރޭ އެ ޢާއްމުކޮށްފިއެވެ.
އެ ޓީވީން އެ ފުޓޭޖު ޢާއްމު ކުރެއްވުމުން އެ ޙާދިސާ ހިނގިއިރު ހޯމް މިނިސްޓަރަކަށް ހުންނެވި ޢުމަރު ނަސީރު ވިދާޅުވީ ރޯ ފައިލް އެއްވެސް ބަޔަކަށް ނުލިބޭނެ ކަމަށެވެ.
"ރޯ ފައިލެއް ނުލިބޭނެ. އެއީ ސަތޭކަ ޕަސެންޓް ކަމެއް. ޝަރީޢަތަށް ހުށަހަޅާ ކޭސްއަކަށް ހޯދާފައިހުންނަ އެވިޑެންސަކީ ފުލުހުންގެ ފޮރެންސިކް ލެބުގައި ރައްކާކޮށްފައި ހުންނަ އެއްޗެއް. ޗޭން އޮފް ކަސްޓަޑީގެ ހުރިހާ ފޯމްތަކެއް ފުރިގެން ފުލުހުން ލޮކް ކޮށްފައި ހުންނަތަކަށް އެހުރިހާ އެވިޑެންސެއް ވަންނާނެ. އެތަނުން އެއްވެސް އެއްޗެއް ނުކުންނަ ކަމަށްވާނަމަ ޗޭންއޮފް ކަސްޓަޑީ އަނެއްކާ ވެސް ފޮލޯ ކުރާނެ. އެހެން ވިއްޔާ ރޯފައިލޭ ކިޔައިގެން ވާހަކަ ދައްކަންވާނީ ނުދަންނަ މީހުން ގާތުގައި،" ޢުމަރު ވިދާޅުވިއެވެ.
ޕޮލިހުން ވެސް ރައީސް އޮފީހުން ވެސް އެ ވީޑިއޯ ލިބުމުގެ އެއްވެސް ފުރުސަތެއް ނޯންނާނެ ކަމަށް ޢުމަރު ވިދާޅުވިއެވެ. އެވީޑިއޯއަކީ ރައީސް އޮފީހުގެ ކެމެރާއަކަށް އަރައިފައިވާ ވީޑިއޯއެކެވެ.
ޗެއިން އޮފް ކަސްޓަޑީ ރޫޅާލައިފައި އެފަދަ އެއްވެސް ހެއްކެއް ނުނެގޭނެ ކަމަށް ވެސް ޢުމަރު ވިދާޅުވިއެވެ. އެފަދަ އެއްޗެއްސަކީ ފުލުހުންގެ ކަސްޓަޑީގައި ހުންނަ އެއްޗެއްސެވެ. އެ މައްސަލައަކީ އަދިވެސް ހިނގަ ހިނގާއޮތް މައްސަލައެއް ކަމަށާއި މައްސަލަ ނިމޭނީ ސްޕްރީމް ކޯޓާ ހަމައިން ކަމަށް ޢުމަރު ވިދާޅުވިއެވެ. "އަލިފާނެއް ނެތި އެއްވެސް ތަނަކުން ދުމެއްނާރާނެ. ލޮލަށް ފެނުމާ ނުފެނުން އެހެން ކަމެއް އެއީ. ވީޑިއޯ ލަސް ނުކުރަނީސް އަލިފާނެއް ނުފެންނާނެ. މިވައްތަރު އެކްސްޕްލޯސިވްސް ގައި ސިކުންތެއްގެ ދިހަބައިކުޅަ އެއްބައިހައި ކުޑަ ވަގުތުކޮޅެއްގައި އަލިފާން ފެންނާނީ. އަހަރެމެން ފުރަތަމަ އެވީޑިއޯ ދައްކާފައިވަނީ އޭގެ ސްޕީޑުގައި ދެން ދައްކާފައިވާނީ ސްލޯ ކޮށްލާފައި،" ޢުމަރު ވިދާޅުވިއެވެ.
ޢުމަރު ވިދާޅުވީ ވީޑިއޯ އެއްގައި ޢާއްމު ގޮތެއްގައި ފެންނާނީ ސިކުންތަކު ފަންސަވީސް ފްރޭމް ކަމަށެވެ. "މިކަހަލަ ހައިއެކްސްޕްލޯސިވްއެއްގައި ސުކުންތެއްގެ ދިހަބައިކުޅަ އެއްބައިހައި ކުޑަވަގުތުކޮޅެއްގައި އަލިފާން ފެންނާނީ. އެހެންވީމާ ފްރޭމްތައް ސްލޯކޮށްލީމައި ނޫނީ ނުއެއް ފެންނާނެ،" ޢުމަރު ވިދާޅުވިއެވެ. އޭނާ ވިދާޅުވީ އަލިފާން ނެތީސް އެހައި ބޮޑަށް ލޯންޗުގެ ދޮރުތަކާއި އެއްޗެހި ބުރައިގެން ނުދާނެ ކަމަށެވެ. "އެއާކޮންޑިޝަން އަކީ ގޮވާ އެއްޗެއް ކަމަށްވާނަމަ ހަމައެކަނި ފިނިފެންމާގައި ނޫން އެގިވާނީ. އެތައް މިލިއަން އެއާކޮންޑިޝަން ދުނިޔޭގައި ގެންގުޅޭ. ގޮވާނަމަ ދުނިޔޭގައި ކޮންމެ ދުވަހަކު އެއާކޮންޑިޝަނެއް ގޮވާނެތާ. އޭގައި ހުންނަނީ ގޮވާކަހަލަ ގޭހެއްނޫން. ނުގޮވާނެ އެޔެއް،" ޢުމަރު ވިދާޅުވިއެވެ.
ސަންގު ޓީވީން އެ ވީޑިއޯ ޢާއްމުކުރީ އެ ޙާދިސާގައި އެއްވެސް ވަރަކަށް އަލިފާން ނުފެންނަ ކަމަށް ރައީސް ޔާމީންގެ އޭރުގެ ތަރުޖަމާނު އިބްރާހީމް މުޢާޒު ޢަލީ ވިދާޅުވެފައިވަނިކޮށްނެވެ. އޭނާ ވިދާޅުވެފައިވަނީ އެހެންނަމަވެސް އޭރުގެ ހޯމް މިނިސްޓަރު ޢުމަރު ނަސީރު މުޢާޒު އަތަށް ދެއްވި ސީޑީގައި ފެންނަ ވީޑިއޯއިން އަލިފާން ފެންނަކަމަށް މުޢާޒު ވަނީ ވިދާޅުވެފައެވެ.