މިނިސްޓަރ އޮފް ހޯމް އެފެއާޒްގެ މަޤާމުގައި ހުންނެވި، މ. ކޮޅުފުށީ، މަލްހާރު އައްޝައިޚް ޢިމްރާން ޢަބްދުﷲ އެ މަޤާމުން އިސްތިޢުފާ ދެއްވުމަށްފަހު އަލުން މަޤާމާ ޙަވާލުވެ ވަޑައިގެންފިއެވެ.
އައްޝައިޚް ޢިމްރާން ޢަބްދުﷲ އެ މަޤާމުން އިސްތިޢުފާ ދެއްވައި އަލުން މަޤާމުގެ ހުވައި ކުރެއްވީ ވެސް މިއަދުއެވެ. ޢިމްރާން އިސްތިއުފާ ދެއްވީ އެމަނިކުފާނަށް މިނިސްޓަރުކަން ދެއްވިއިރު 12 އަހަރުގެ ޖަލު ޙުކުމެއް އޮތުމުން އެކަމަށް މީހުން ފާޑުވެސް ކިޔައިފައި ވަނިކޮށްނެވެ. އެހެންނަމަވެސް ސްޕްރީމްކޯޓުން ފަހުން ވަނީ ޢިމްރާނުގެ މައްޗަށް ކޮށްފައި އޮތް 12 އަހަރުގެ ޙުކުމް ބާޠިލް ކުރައްވައިފައެވެ.
ރައީސް އޮފީހުން ވިދާޅުވީ ޢިމްރާން އިސްތިއުފާ ދެއްވީ އަމިއްލައަށް ކަމަށެވެ. އެގޮތަށް ކަންތައް ކުރެއްވުމުން މީހުންގެ ހިތުގައި އުފެދިފައިވާ ޝައްކުތައް ފިލައިގެންދާނެ ކަމަށް ޢިމްރާން ޤަބޫލުފުޅު ކުރައްވައެވެ.