މާލެ އަތޮޅު ކަޑުއޮތްގިރި ކައިރިގައި އޮތް ފަރަށް މިއަދުއެރި "ނާޒު" ނަމަކަށް ކިޔާ ދޯނިން ކަނޑަށް ފޭބި ގިނަ އަދަދެއްގެ ލަކުޑި ފިލާ އޮޔާ ދާތީ ދަތުރު ކުރައްވާ ފަރާތްތަކުން ސަމާލުވުމަށް އެމްއެންޑީއެފުން އިލްތިމާސް ކުރައްވައިފިއެވެ.
މިފިލާތައް އޮޔާދަނީ ބަނޑޮސް އައިލެންޑް ރިސޯޓާ ދިމާއަށް ހުޅަނގަށެވެ. އެހެންކަމުން އެއީ އެސަރަހައްދުން ދަތުރު ކުރަމުންދާ ފަރާތްތަކަށް ނުރައްކަލަކަށް ވެދާނެތީ ސަމާލުވުމަށް އެމްއެންޑީއެފް ކޯސްޓްގާޑުން ވަނީ ވިދާޅުވެފައެވެ. އެދޯނި ފަރަށްއެރީ ކ. ކުޑަވިލިގިއްޔަށް ދަތުރު ކުރަމުންދަނިކޮށްނެވެ.
އެފިލާތައް ނެގުމުގެ މަސައްކަތް އެ ދޯނީގެ ވެރިފަރާތާއި އެމްއެންޑީއެފް މާލެ އޭރިއާ ކޯސްޓްގާޑް ގުޅިގެން ކުރަމުންދާ ކަމަށް ވެސް އެމްއެންޑީއެފުން ވިދާޅުވެފައިވެއެވެ.
މި ސަރަޙައްދުން ދަތުރު ކުރައްވާ ފަރާތްތަކުން މިކަމަށް ސަމާލުކަން ދެއްވައިގެން ދަތުރުކުރުމަށާ ރޭގަނޑު ދަތުރުކުރައްވާ ފަރާތްތަކުން މިސަރަހައްދުން ދަތުރު ކުރެއްވުމުގައި ޚާއްސަ ސަމާލުކަމެއްދެއްވުމަށް ސިފައިން ވަނީ އިލްތިމާސް ކުރައްވައިފައެވެ.