ކުރީގެ ރައީސް މުޙަންމަދު ނަޝީދުގެ މައްޗަށް އިއްވާފައިވާ 13 އަހަރުގެ ޖަލު ޙުކުމް ތަންފީޒު ކުރުން ފަސްކުރުމަށް ސުޕްރީމް ކޯޓުން އަމުރު ކޮށްފިއެވެ.
ސުޕްރީމް ކޯޓުން މިއަދު ނެރުނު އަމުރުގައި ރައީސް ނަޝީދުގެ މައްޗަށް އޮތް 13 އަހަރުގެ ޖަލު ޙުކުމް ތަންފީޒު ކުރުން ފަސްކުރުމަށް ފުލުހުންގެ މުއައްސަސާ އާއި ކަރެކްޝަނަލް ސާވިސްގެ އިތުރުން ކަމާއިގުޅޭ ހުރިހާ މުއައްސަސާތަކަށްވެސް ކޯޓުން ވަނީ އަމުރު ކޮށްފައެވެ. އަމުރުގައި ވަނީ ސުޕްރީމް ކޯޓުން އެ ޙުކުމާމެދު ވަކިގޮތެއް ކަނޑައަޅައި ދިމެންދެން ޙުކުމް ތަންފީޒު ނުކުރުމަށެވެ.
ނަޝީދުގެ މައްޗަށް 13 އަހަރުގެ ޖަލު ޙުކުމެއް އިއްވީ އެމަނިކުފާނުގެ ވެރިކަމުގެ ދުވަސްވަރު ކްރިމިނަލް ކޯޓުގެ ފަނޑިޔާރެއް ކަމަށްވާ އަބްދުﷲ މުޙަންމަދު ހައްޔަރުކުރި މައްސަލައިގައެވެ. މި މައްސަލައިގައި ނަޝީދުގެ މައްޗަށް 13 އަހަރުގެ ޖަލު ޙުކުމް އިއްވައި ޖަލަށް ލެއްވި ފަހުން އެމަނިކުފާނުގެ ސިއްޙީ މައްސަލައަކަށް ފަރުވާ ކުރަން އިނގިރޭސިވިލާތަށް ވަޑައިގެންނެވި ފަހުން އެގައުމުގެ ޙިމާޔަތް ހޯއްދެވިގޮތަށް ރާއްޖެ ވަޑައިނުގަންނަވައެވެ. ނަމަވެސް ވަރަށްގިނައިން އަވައްޓެރި ސްރީލަންކާއަށް ވަޑައިގެން ސަޕޯޓަރުންނާ ބައްދަލު ކުރައްވައި ހައްދަވައެވެ.
ރައީސް ނަޝީދުގެ މައްޗަށް އޮތް 13 އަހަރުގެ ޖަލު ޙުކުމް ތަންފީޒު ކުރުން ފަސްކުރަން ސުޕްރީމް ކޯޓުން މިއަދު އަމުރު ނެރުނުއިރު އަންނަ މަހުގެ 1 ވަނަ ދުވަހު ރާއްޖެ ވަޑައިގަތުމަށް އެމަނިކުފާނު ވަނީ ނިންމަވާފައެވެ.