ގޭބިސީ ތަކުން ހޯދަމުން އަންނަ ޚިދްމަތް ހުއްޓާލާނަމަ ފަސް ދުވަސް ކުރީން، އަދި މައުލޫމާތު ބަދަލުވެއްޖެނަމަ ފަސް ދުވަސް ތެރޭގައި އެކަން އަންގަންވާނެ ކަމަށް ވެމްކޯ އިން ބުނެފިއެވެ. ވެމްކޯ އިން މިއަދު ނެރުނު ސަރކިއުލާގައިވާ ގޮތުގައި ވެމްކޯ އިން ހޯދަމުން އަންނަ ޚިދްމަތް ހުއްޓާލުމަށް ބޭނުންވާނަމަ، ޚިދްމަތް ހުއްޓާލުމަށް ބޭނުންވާ ތާރީޚުގެ 5 ދުވަސް ކުރީން އެކަމަށް އެދި ފޯމު ހުށަހަޅަންވާނެއެވެ.
އަދި ޚިދްމަތް ހޯދަމުން ދިޔަ ފަރާތުގެ އެޑްރެސް، ފޯނު ނަންބަރު، ނުވަތަ އީމެއިލް އެޑްރެސް ފަދަ މައުލޫމާތެއް ބަދަލުވެއްޖެނަމަ 5 ދުވަސް ތެރޭގައި ވެމްކޯ އަށް އެކަން އަންގަންވާނެއެވެ. ޚިދުމަތް ހުއްޓާލުމަށް ނުވަތަ މައުލޫމާތު ބަދަލުވީކަން ވެމްކޯއަށް އަންގަންވާނީ "ކުނި ނެގުމުގެ ޚިދްމަތަށް އެދޭ ފޯމް" ގެ އެކަންކަމަށް ކަނޑައަޅާފައިވާ ބައި ފުރިހަމަ ކުރުމަށް ފަހު އެވެ. ހަމައެހެންމެ ފޯމު ހުށަހަޅާއިރު ޚިދްމަތް ހޯދަމުން ދިޔަ އެޑްރެހުގައި ހުރި ހުރިހާ ބިލަކަށް ފަިއސާ ދައްކައި ޚަލާޞް ކުރުމަށްފަހު އެންމެ ފަހުގެ ބިލަށް ފައިސާ ދެއްކި ރަސީދުގެ ކޮޕީ ވެސް ހުށަހަޅަން ޖެހެއެވެ. އަދި ޚިދްމަތް ހުއްޓާލުމަށް އެދޭ އެޑްރެހުގަައި ހިނގަމުންދާ މަހުގެ ބާކީ ދުވަސްތަކަށް، ބިލް ތައްޔާރުވުމުން ފައިސާ ދައްކަން ވާނެއެވެ.
ކުނި ނެގުމުގެ ޚިދުމަތަށް އެދޭ ފޯމު" ވެމްކޯ ގެ ހެޑް އޮފީހާއި، ކަސްޓަމަރ ފްރަންޓް އޮފީހުން ލިބޭނެކަމަށް ވެސް ސަރިކިއުލަރ ގައި ބުނެފަވެއެވެ. މިއަދު އާއްމުކުރި ސަރކިއުލަރ އަށް މިއަދުން ފެށިގެން ޢަމަލު ކުރަން ފަށާނެއެވެ.