ދިވެހިރައްޔިތުންގެ ސަލާމަތާއި ރައްކާތެރިކަން އޮތީ ސެޕްޓެމްބަރު 23 ވަނަ ދުވަހު ބާއްވާ ރިޔާސީ އިންތިޚާބުގައި ރައްޔިތުން ވޯޓުދެއްވާ ގޮތެއްގެ މައްޗަށް ކަމަށް ޕީޕީއެމްގެ ނާއިބު ލީޑަރު ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އައްޑޫސިޓީ ހިތަދޫ ސްޓޭޖު ސަރަހައްދުގައި މިހާރު ހިނގަމުންދާ ޖަލްސާގައި ވާހަކަ ދައްކަވަމުންނެވެ. އަދުރޭ ވިދާޅުވީ އެމްޑީޕީގެ ވެރިކަމުގައި އައްޑުއާމެދު ކަންކަން ކޮށްފައިވާގޮތް އައްޑޫ ރައްޔިތުންނަށް ވަރަށް ރަނގަޅަށް އެނގޭނެ ކަމަށެވެ.
އެމްޑީޕީ ވެރިކަމަށް އަންނަން މަސައްކަތް ކުރަނީ ބަދަލު ހިފުމުގެ ގޮތުން ކަމަށް ވެސް އޭނާ ވިދާޅުވިއެވެ. އަދުރޭ ވިދާޅުވީ އެމްޑީޕީގެ ފަހަތުން އުޅޭ މީހުންނަކީ ތަފާތު ފިކުރުތަކުގެ މީހުން ކަމަށެވެ. އެހެންކަމުން އެކޯލިޝަންތެރޭ ޚިޔާލު ތަފާތުވެ ބައިބައިވާނެ ކަމަށެވެ.
އޭނާ ވިދާޅުވީ ޝައިޚު އިމްރާންވަނީ ޑރ. އަފްރާޝީމްގެ މަރުގެ މައްސަލަ އެމްޑީޕީއަށް ތުހުމަތު ނުކުރެވޭނެ ގޮތެއްނެތް ކަމަށް ވިދާޅުވެފައި ކަމަށެވެ. ޝައިޚް އިލްޔާސް ވަނީ ރައީސް ނަޝީދަކީ ބޭރުން ފޮނުވާފައިވާ އެމހުންގެ އެޖެންޓެއް ކަމަށް ވިދާޅުވެފައި ކަމަށެވެ. ރައީސް މައުމޫނަކީ ރައީސް ނަޝީދަކީ ލާދީނީ ފިކުރުގެ ބޭފުޅެއް ކަމަށާއި ތަރައްގީގެ ޚިޔާލެއް ފިކުރެއްނެތް ބޭފުޅެއް ކަމަށް ވިދާޅުވި ބޭފުޅާ ކަމަށެވެ. އެފަދަ ބޭފުޅުން މިހާރު ވާހަކަ ބަދަލުކޮށް ދައްކާ ވާހަކަ ގަބޫލު ކުރާނެ ބަޔަކު ރާއްޖޭގައި މިހާރު ނެތް ކަމަށް ވެސް އަދުރޭ ވިދާޅުވިއެވެ.
އަމިއްލަވަންތަ ގައުމެއްގެ ގޮތުގައި ރާއްޖެ ބާއްވަން ބޭނުންވާ ކަމަށްވާނަމަ މިމަހުގެ 23 ވަނަ ދުވަހު ބާއްވީ ރިޔާސީ އިންތިޚާބުގައި ވޯޓުދޭންޖެހޭނީ ރައީސް ޔާމީނަށް ކަމަށް ވިދާޅުވިއެވެ. އެދުވަހު އެނޫން ގޮތަކަށް ވޯޓުދީފިނަމަ އެ ގެއްލިގެންދަނީ ޕީޕީއެމްގެ ވެރިކަމެއް އަދި ރައީސް ޔާމީންގެ ވެރިކަމެއް ނޫންން ކަމަށް ވެސް އަދުރޭ ވިދާޅުވިއެވެ. އޭނާ ވިދާޅުވީ އެ ގެއްލިގެންދަނީ މުޅިގައުމުގެ މިނިވަންކަން ކަމަށް ވެސް ވިދާޅުވިއެވެ.
އޭނާ ވިދާޅުވީ ރާއްޖޭގެ ވެރިކަމަށް އަސާސީ ތައުލީމު ފެންވަރުގެ ބޭފުޅެއް ކަމުނުދާނެ ކަމަށެވެ. ވެރިކަމަށް ވަޑައިގަންނަވަންޖެހޭނީ އިލްމީ ގާބިލް ބޭފުޅުން ކަމަށް ވެސް އޭނާ ވިދާޅުވިއެވެ. ރައީސް ޔާމީނާއި އެމަނިކުފާނުގެ ރަނިންމޭޓް ޑރ. ޝަހީމަކީ އެފަދަ އިލްމީ ގާބިލް އަދި ތަޖުރިބާހުރި ބޭފުޅުން ކަމަށް ވެސް އަދުރޭ ވިދާޅުވިއެވެ.