ކުރީގެ ރައީސް މުހައްމަދު ނަޝީދުގެ ސަރުކާރުގައި ބަދަލުދޭ ގޮތަށް، އައްޑޫސިޓީ އިކުއެޓޯރިއަލް ކޮންވެންޝަން ސެންޓަރު (އީސީސީ) ކައިރިން ދައުލަތަށް ނަގާފައިވާ ގޯތިތައް އޭގެ ވެރިންނާ އަލުން ހަވާލު ކުރުމުގެ ރަސްމިއްޔާތު މިއަދު އޮންނާނެއެވެ.
މިއަދު ހަވީރު 4:00 ގައި އެ ރަސްމިއްޔާތު ބާއްވަނީ އައްޑޫސީތީ ހިތަދޫ ފުލެޓް ސަރަހައްދުގައެވެ. "މިއަދު އަޅުގަނޑުމެން މި ބާއްވަނީ ގޯތިތައް ހާވާލު ކުރަން ފެށުމުގެ ރަސްމިއްޔާތު. މިއަދު ހުރިހާ ގޯއްޗެއް ހަވާލެއް ނުކުރެވޭނެ. އެކަމަކު މި ރަސްމިއްޔާތުގައި ދެތިން ގޯއްޗެއް ހަވާލު ކުރެވިދާނެ،" ހައުސިން މިނިސްޓްރީގެ އެގްޒެކްޓިވް ކޯޑިނޭޓަރ އަބްދުﷲ ޒުހައިރު ވިދާޅުވިއެވެ.
އޭނާ ވިދާޅުވީ ގޯތިތައް ދޫކުރާ ސަރަހައްދަށް ވަނުމަށް މަގުތައް ހެދުމާއި ގޯތިތަކުގެ އިން ވަކިކުރުމާއި މިހުރިހާ މަސައްކަތެއް މިހާރުވެސް ކުރައްވަމުން ގެންދަވާ ކަމަށެވެ. އެ ސަރަހައްދުން ދޫކުރަންޖެހޭ 700 އެއްހާ ގޯތި ޖުލައިމަހުގެ ނިޔަލަށް އެއްކޮށް ދޫކޮށް ނިމޭނެ ކަމަށް ވެސް އޭނާ ވިދާޅުވިއެވެ.
ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެފައިވަނީ މި ގޯތިތައް ޖުލައި 26 ގެ ކުރިން ހަވާލުކޮށް ނިންމަވާނެ ކަމަށެވެ.
މި ގޯތިތަކުގެ ވެރިންގެ އަތުން 2011 ވަނަ އަހަރު ގޯތި އަތުލައިފައިވަނީ ބަދަލު ދޭ ގޮތަށެވެ. އެހެންނަމަވެސް މިހާތަނަށް ބަދަލެއް ދެވިފައެއް ނުވާ ކަމަށް ހައުސިން މިނިސްޓްރީން ކުރިންވަނީ ވިދާޅުވެފައެވެ. އެ ގޯތިތައް ދައުލަތަށް އޭރު ނެގީ ކޮންވެންޝަން ސެންޓަރު އިމާރާތް ކުރެއްވުމަށެވެ.