އދ. ގެ ސަލާމަތީ މަޖިލީހުގެ ދާއިމީ ނޫން މެންބަރު ކަމުގެ ގޮނޑި ރާއްޖެއަށް ކާމިޔާބު ނުކުރެވުމުގެ ފަހަތުގައި ވަރަށްގިނަ ސަބަބުތައް އެބަހުރި ކަމަށް ފިޝަރީޒް މިނިސްޓަރ ޑރ. މުހައްމަދު ޝައިނީ ވިދާޅުވެއްޖެއެވެ.
އާފަތިހަށް ދެއްވި މައުލޫމާތުގައި އޭނާ ވިދާޅުވީ އޭގެ ތެރޭގައި ދިވެހިންގެ އަމިއްލަ އިދިކޮޅު ކެންޕޭން ވެސް ހިމެނޭ ކަމަށެވެ. އެގޮތުން އޮސްޓްރޭލިއާފަދަ ނުފޫޒުގަދަ ގައުމުތަކުގެ ވޯޓު ވެސް ގެއްލުނީ އެފަދަ ކެންޕޭނުގެ ސަބަބުން ކަމަށް އޭނާ ވިދާޅުވިއެވެ.
ޑރ. ޝައިނީ ވިދާޅުވީ އޮސްޓްރޭލިއާގެ ނުފޫޒުގެ ސަބަބުން ވެސް ޕެސިފިކް ގެ ވަރަށްގިނަ ގައުމުތަކުގެ ވޯޓު ވެސް ލިބޭގޮތް ނުވި ކަމަށެވެ. އޮސްޓްރޭލިއާގެ ނުފޫޒުގެ ސަބަބުން ވަރަށްގިނަ ޕެސިފިކް ގައުމުތަކުން ރާއްޖެއަށް ވޯޓުދެވެންނެތް ކަމުގައިބުނި،" ޝައިނީ ވިދާޅުވިއެވެ.
"އޮސްޓްރޭލިއާ އާއި ރާއްޖެ މިކަމުގައި ކޮށްދޭންއެއްބަސް ވި ކަންކަންކަމުގެ ތެރެއިން އަޅުގަނޑުމެއް ކުރަންހުރި ކަންކަން ކުރިނަމަވެސް، އެމީހުން އެކަމަށް (ބޭވަފާތެރި) ވީ ހަމަ ދިވެހިންގެ އަމިއްލަ އިދިކޮޅު ކެންޕޭންގެ ސަބަބުން،" ޝައިނީ ވިދާޅުވިއެވެ.
"އެކި ގައުމުތަކުން ސުވާލުކުރި ވަރަށް ގިނަ ކަންކަމާ ބެހޭގޮތުން. މައިގަނޑު ގޮތެއްގައި، އަޅުގަނޑުމެންގެ ކިބައިގައި ސެކިއުރިޓީ ކައުންސިލުގައި މަސައްކަތް ކުރުމުގެ ތަނަވަސްކަމާއި ގާބިލު މީހުން އެބަތިބިތޯ ވެސް ސުވާލު ކުރި،" ޝައިނީ ވިދާޅުވިއެވެ.
އޭނާ ވިދާޅުވީ އިންޑޮނޭޝިއާއަކީ ދުނިޔޭގެ ހަތަރުވަނައަށް އެންމެ ބޮޑު ގައުމަށް ވެފައި، ގޮނޑި ކާމިޔާބު ކުރަން އެމީހުން ވަރަށް ވަރުގަދަ ކެންޕޭނެއްކުރި ކަމަށެވެ. "ވަރަށްގިނަ ގައުމުތަކުގެ ވެރިކަންކުރާ ރަށްރަށަށް ދަތުރުކޮށް އަދި އެމީހުންގެ އެއޮތް ހުރިހާ އެމްބަސީތައް މެދުވެރިކޮށް މި ކަމަށް ތާއީދު ނުވަތަ ވޯޓު ހޯދަން ކެނޑިނޭޅި މަސައްކަތްކުރި،" ޑރ. ޝައިނީ ވިދާޅުވިއެވެ.
އިންޑޮނޭޝިއާއަކީ ދުނިޔޭގައިވާ އެންމެ ބޮޑު މުސްލިމް ގައުމަށް ވުމުން އެގައުމު އެ ގޮނޑިއަށް ވާދަކުރާތީ އަރަބި އިސްލާމީ ގައުމުތަކުގެ ވޯޓުވެސް ރާއްޖެއަށް ލިބޭގޮތް ނުވި ކަމަށް ޝައިނީ ވިދާޅުވިއެވެ.
"އަޅުގަނޑުމެނަށް އެންމެ ބޮޑު ތަރުހީބެއް ލިބެންއޮތީ ކުދި ޖަޒީރާ ގައުމުތަކުން ކަމަށް ވާއިރު، ޕެސިފިކް ކަނޑުގައިވާ ވަރަށް ގިނަ ކުދި ގައުމުތަކަކީ އިންޑޮނޭޝިއާގެ އެހީ ވަރަށް ބޮޑަށް ލިބެމުންދާ ބައެއް،" ޝައިނީ ވިދާޅުވިއެވެ.
ސަލާމަތީ މަޖިލީހުގެ ގޮނޑި ކާމިޔާބު ކުރުމަށް ބޭނުންވާ ވަރަށް ވޯޓު ނުލިބުމުގައި މިފަދަ އެތައް ގިނަ ސަބަބުތަކެއް މެދުވެރިވި ކަމަށް މިނިސްޓަރ ޝައިނީ ވިދާޅުވިއެވެ.