ކަންގަނާ ރަނޯތް މިހާރު ޝޫޓް ކުރަމުން ދާ ފިލްމަކީ މަނިކަރްނިކާ – ދަ ކުއީން އޮފް ޖާންސީ އެވެ. ފިލްމުގައި އޭނާ ކުޅެނީ ރާނީ ލަކްޝްމީ ބާއި ގެ ރޯލެވެ. އެހެން ކަމުން ފިލްމުގެ ކޮންމެ ފެނިލުމަކުންވެސް ޝާހީ ކަން ފެންނަންވާނެއެވެ. މީސްމީޑިއާގައި މަނިކަރްނިކާގެ ގިނަ ފޮޓޯތަކެއް އާއްމު ވަމުންދާއިރު ކަންގަނާ ފެންނަނީ ހަމަ ރާނީ އެއްގެ ގޮތުގައެވެ. ކަންގަނާ އަކީ ކުރިންވެސް ކުއީންގެ ނަމުން މަޝްހޫރު ވެފައިވާ ތަރިއެކެވެ. އޭނާ އަށް މި ނަން ކިއުނީ ކުއީން ކިޔާ ފިލްމެއް ކުޅެ އެފިލްމަށް ބެލުންތެރިންގެ ތާއީދެ ލިބުނުފަހުންނެވެ.
ފިލްމުގައި ކުޅޭ ރޯލާއި ބެހޭ ގޮތުން ކަންގަނާ މީޑިއާ އަށް ދީފައިވާ އިންޓަރވިއުއެއް ގައި ބުނެފައިވަނީ ލަކްޝްމީ ބާއީ އަކީ އިނގިރޭސިންނަށް އެއްވެސް ދޫދިނުމެއް ނެތި ހަނގުރާމަ ކުރި ސިފައިންގެ ޖެނެރަލެއް ކަމަށެވެ. އަދި އެއީ ވަރަށް އާދަޔާ ޚިލާފު އަންހެނެއް ކަމަށާއި އޭނާގެ ޒުވާން ދުވަސްވަރު ވަރަށް ގިނަ ހަނގުރާމަ ތަކުގައި ބައިވެރިވި މީހެއް ކަމަށެވެ. އަދި އޭނާ އަކީ ވަރުބަލި ކަމެއް ނެތި ހަނގުރާމައިގައި ދެމިހުރި މީހެއް ކަމަށެވެ. އެހެން ކަމުން ހަމަ އެކަނި ހެދުމާއި މޭކަޕާއި ގަހަނާ އިން އޭނާގެ ރޯލު ނުދެއްކޭނެ ކަމަށެވެ. އެހާ ވަރުގަދަ ފަހުލަވާނެއްގެ ދައުރު މޫނުގައި ލަކުނެއްހައި މިންވަރު ނެތި ނުދެއްކޭން ކަމަށް ވެސް ކަންގަނާ ބުނެފައިވެއެވެ. މި ފިލްމަށް ތައްޔާރު ވުމުގެ ތަމްރީނު ތަކުގެ ތެރޭގައި އޭނާ ވަނީ ކަނޑިއަކުން ޒަޚަމް ވެ ހޮސްޕިޓަލުގައި އެޑްމިޓްކޮށް ފަރުވާ ދީފައެވެ. އޭނާ އިޝާރާތް ކުރާ ލަކުނަކީ މިއީ ކަމަށް ވެދާނެ އެވެ.
މީސްމީޑިއާގައި ދައުރުވާ ފޮޓޯތަކުން އޭނާ އަކީ މި ފިލްމަށް އެންމެ ރަނގަޅު ހޮވުން ކަން ފާހަގަ ކުރެވެއެވެ.
