އެމްޑީޕީ އައްޑޫސިޓީ ދާއިރާއިން އިސްނަގައިގެން މިއަދު ބާއްވާ ވެހިކަލްބުރު ފަށާނީ މިއަދު ހަވީރު 4:00 ގައި ބާއްވާ ޚާއްސަ ސަޔަކުން ކަމަށް ދާއިރާގެ ނާއިބު ރައީސް އިބްރާހީމް ރަޝީދު (އިބްރޭ) ވިދާޅުވެއްޖެއެވެ.
އޭނާ ވިދާޅުވީ ހިތަދޫ ސައި އޮންނަނީ ލިންކު ރޯޑުގައި ހުންނަ އެމްޑޫޕީ ޖަގަހައިގައި ކަމަށެވެ. މިއަދު ބާއްވާ ވެހިކަލް ބުރު ފެށުމަށް މިހާރުވެސް މީހުން ގެންދަނީ އެމްޑީޕީ ޖަގަހަތަކަށް ޖަމާވަމުން ކަމަށް އިބްރޭ ވިދާޅުވިއެވެ. ގުޅިފައިވާ ރަށްރަށުގައި ބާއްވާ ވެހިކަލް ބުރުގައި ބައިވެރިވާން ބޭނުންވާ ފަރާތްތަކުންވެސް 4:00 އަށް އެރަށެއްގައި ހުންނަ އެމްޑީޕީ މައިޖަގަހަ ކައިރިއަށް ދިޔުމަށްވެސް އޭނާ ވިދާޅުވިއެވެ.
މިދިޔަ ހަފްތާގައިވެސް އެމްޑީޕީން ވަނީ ވެހިކަލް ބުރެއް ބާއްވަން މަސައްކަތް ކޮށްފައެވެ. ފުލުހުންވަނީ އެބުރުވެސް ހުއްޓުވައިފައެވެ. އިބްރޭ ވިދާޅުވީ މިއަދުގެ ހަރަކާތަކީވެސް އޭގެ ކުރީގެ ހަރަކާތަކީވެސް ސުލްހަވެރި ކަމާއެކު ބާއްވާ ހަރަކާތެއް ކަމަށެވެ. އެހެންވީމާ އެފަދަ އެއްވުމަކަށް ހުރަސް ނޭޅުމަށް ފުލުހުންގެ ކިބައިން އެދޭ ކަމަށް އޭނާ ވިދާޅިވިއެވެ.
މިއީ މިމަހު ފުރަތަމަ ދުވަހު ސްޕްރީމް ކޯޓުން ނެރެފައިވާ އަމުރު ތަންފީޒު ކުރުމަށް ގޮވާލައި ބާއްވާ ވެހިކަލް ބުރެކެވެ.
އެމްޑީޕީ ވެހިކަލް ބުރަށް ތައްޔާރުވަމުންދާއިރު ފުލުހުންވެސް ގެންދަނީ އެސަރަހައްދުގައި ހަރަކާތްތެރިވަމުންނެވެ.
