މަސްއޫލިއްޔަތުން ބަރިއްޔަ ވުމުގެ ސަގާފަތެއް ރައްޔިތުންގެ މަޖިލީހުގެ އިދިކޮޅު މެންބަރުންގެ ތެރޭގައި އަށަގަންނަމުންދާ ކަމަށް މިނިސްޓަރ އޮފް ސްޓޭޓް ފޯ ހޯމް އެފެއާޒު ޝިފާގު މުފީދު ވިދާޅުވެއްޖެއެވެ.
ޓީވީ ޕްރޮގްރާމެއްގައި މިރޭ ވާހަކަ ދައްކަވަމުން އޭނާވަނީ ރައީސްގެ ރިޔާސީ ބަޔާން އިއްވެވި ޖަލްސާއަށް އިދިކޮޅު މެންބަރުން ވަޑައި ނުގެންނެވުމުން އެ ކަމަށް ފާޑުވިދާޅުވެފައެވެ. އޭނާ ވިދާޅުވީ އިދިކޮޅު މެންބަރުން އެ ޖަލްސާ ބޮއިކޮޓް ކުރުމަކީ ވަރަށް ޣައިރު ޒިންމާދާރު ކަމެއް ކަމަށް އޭނާ ސިފަ ކުރެއްވިއެވެ.
ކުއްލި ނުރައްކަލުގެ ހާލަތާބެހޭ ގަރާރު މަޖިލީހަށް ފޮނުވައި އެއާބެހޭ ގޮތުން ބަހުސްކުރި ޖަލްސާގައި އިދިކޮޅު މެންބަރުން ބައިވެރިނުވުމަކީ އެފަދަ ކަމެއް ކަމަށް ޝިފާގު ވިދާޅުވިއެވެ. އެ ޖަލްސާތައް ބައިކޮޓް ނުކޮށް އެ މެންބަރުން މަޖިލީހުގެ ޖަލްސާއަށް ވަޑައިގެން ކުރެވޭނެ ކަންކަން ހުންނާނެ ކަމަށް ވިދާޅުވިއެވެ.
އެގޮތުން އެ ގަރާރު ފާސްކުރުމާއި، ނުކުރުމާއި، އިސްލާހުތަކާ އެއްގޮށް ފާސް ކުރުމުގެ ފުރުސަތުވެސް އޮންނާނެ ކަމަށް އޭނާ ވިދާޅުވިއެވެ. މަޖިލީސް ބޮއިކޮޓް ކުރުމުގެ އެއްވެސް ގާނޫނީ ހަމައެއްނެތް ކަމަށްވެސް އޭނާ ވިދާޅުވިއެވެ.
މިކަން މިހެން އޮއްވައި މެންބަރުންގެ ފަރާތުން ފެންނަނީ މަސްއޫލިއްޔަތު ތަކުން ރެކެން ނުވަތަ ބަރިއްޔަވާން މަސައްކަތްކުރައްވާ ތަން ކަމަށް އޭނާ ވިދާޅުވިއެވެ.
