ފުލުހުންގެ ބަންދުގައި މިހާރު ހުންނެވި ކުރީގެ ރައީސް އަލްއުސްތާޒު މައުމޫން އަބްދުލްގައްޔޫމާ ފުލުހުން ސުވާލު ކުރައްވަނީ މުޅިން އެހެން ކަމަކާ ގުޅޭގޮތުން ކަމަށް އެމަނިކުފާނުގެ ގާނޫނީ ވަކީލް ހުސައިން ޝަމީމް ވިދާޅުވެއްޖެއެވެ.
އާފަތިހަށް މައުލޫމާތު ދެއްވަމުން ޝަމީމް ވިދާޅުވީ މައުމޫން ހައްޔަރު ކޮށްފައިވަނީ އެހެން ތުހުމަތެއްގައި ކަމަށެވެ. އެހެންނަމަވެސް އެމަނިކުފާނާ ފުލުހުން ސުވާލު ކުރައްވަނީ މުޅިން އެހެން ކަމަކާގުޅުވައިގެން ކަމަށް އޭނާ ވިދާޅުވިއެވެ. މައުމޫނާ ސުވާލު ކުރައްވަނީ ކޮންމަކަ ބެހޭގޮތުން ކަމެއް ޝަމީމް ވިދާޅެއް ނުވިއެވެ. ވިދާޅުވީ "އަޅުގަނޑަށް ތިޔަހާ ބޮޑަށް ތަފްސީލް ނުދެވޭނެ،" ކަމަށެވެ.
ފުލުހުން ވިދާޅުވެފައިވަނީ ރައީސް މައުމޫން ތަހުގީގަށް އެއްބާރު ލެއްވުން ނުދެއްވާ ކަމަށެވެ. އެކަމާ ބެހޭގޮތުން ޝަމީމް ވިދާޅުވީ މައުމޫން ހުންނެވީ ތަހުގީގަށް އެއްބާރުލެއްވުން ދެއްވުމަށް ކެތްމަދުވެފައި ކަމަށެވެ.
"އެހެންނަމަވެސް ފުލުހުން ސުވާލު ކުރެއްވީމައިތާ ޖަވާބެއް ދެއްވޭނީވެސް. ފުލުހުން ސުވާލެއްވެސް ނުކުރައްވާ. ރައީސް މައުމޫން ހަމަ އެހުންނަވަނީ. ފުލުހުން ސުވާލު ކުރައްވަނީ މުޅިން އެހެންކަމަކާ ބެހޭގޮތުން. އެމަނިކުފާނަށް ތުހުމަތު ކުރައްވައިފައިވާ މައްސަލައާ ބެހޭގޮތުން ސުވާލު ކުރައްވާއިރަށް އެމަނިކުފާނު ޖަވާބު ދެއްވާނެ. ތަހުގީގަށް އެއްބާރު ލެއްވުން ދެއްވާނެ،" ޝަމީމް ވިދާޅުވިއެވެ.
