ކުރީގެ ޑެޕިޔުޓީ ޕްރޮސެކިޔުޓަރ ޖެނެރަލް އަދި މަޝްހޫރު ގާނޫނީ ވަކީލް ހުސައިން ޝަމީމް ސަސްޕެންޑް ކޮށްފައިވާ ކަމެއް އެނގިވަޑައި ނުގަންނަވާ ކަމަށް އޭނާ ވިދާޅުވެއްޖެއެވެ.
އާފަތިހަށް މައުލޫމާތު ދެއްވަމުން އޭނާ ވިދާޅުވީ ސަސްޕެންޑް ކޮށްފައިވާ ކަމުގެ މައުލޫމާތު ލިބިވަޑައިގެންނެވީވެސް މީޑިއާއިން ކަމަށެވެ. އޭގެ ބޭރުން އެއްވެސް މައުލޫމާތެއް ލިބިވަޑައިގެންފައި ނުވާކަމަށް އޭނާ ވިދާޅުވިއެވެ.
"ރަސްމީ އެއްވެސް ފަރާތަކުން ފޯން ކޯލަކުންވެސް އަދި ލިޔެ ކިޔުމަކުންވެސް މިހާތަނަށް އަންގަވާފައެއްނެތް އަޅުގަނޑު ސަސްޕެންޑު ކުރިކަމެއް. މީޑިއާއިން އެނގޭ އެއްޗެއް އަދި އެނގިފައިއޮތީ. މާދަމާ ކޯޓަށް ދިޔައިމާ އެނގޭނީ ސަސްޕެންޑް ކޮށްފައިވާނަމަ އެކަމެއްވެސް،" ޝަމީމް ވިދާޅުވިއެވެ.
އޭނާ ވިދާޅުވީ ސަސްޕެންޑް ކުރަންޖެހޭ ވަރުގެ އެއްވެސް ކަމެއް ކޮށްފައިވާނެ ކަމަށް ގަބޫލު ނުކުރައްވާ ކަމަށެވެ. އެހެންނަމަވެސް އޭނާ ސަސްޕެންޑް ކޮށްފައިވަނީ ފުލުހުން ބަލަމުންދާ މައްސަލައަކާ ގުޅިގެން ކަމަށް ޖުޑީޝަލް އެޑްމިނިސްޓްރޭޝަނުން ނެރެފައިވާ އިއުލާނެއްގައި ވިދާޅުވެފައިވާ ކަމަށް ބައެއް ނޫސްތަކުގައި ވަނީ ރިޕޯޓު ކޮށްފައެވެ.
ޝަމީމް ވިދާޅުވީ ޖިނާއީ މައްސަލައެއް ބަލަމުންދާއިރު އެ ވަކީލަކާމެދު އިދާރީ ފިޔަވަޅެއް ނޭޅޭނެ ކަމަށް ސްޕްރީމް ކޯޓުން މީގެ ކުރިންވާނީ ނިންމަވައިފައި ކަމަށެވެ. އެހެންވީމާ އޭނާ ސަސްޕެންޑް ކޮށްފައިވާނަމަ އެއީ ސްޕްރީމް ކޯޓުގެ އެ ނިންމެވުމާ ޚިލާފު ކަމެއްކަމަށްވެސް ވިދާޅުވިއެވެ.
ޝަމީމަކީ މިހާރު ޖަލުގައި ހުންނެވި ކުރީގެ ރައީސް މައުމޫން އަބްދުލްގައްޔޫމުގެ ގާނޫނީ ވަކީލުންގެ ޓީމުގައި އިސްކޮށް ހަރަކާތްތެރިވެ ވަޑައިގަންނަވާ އެއްބޭފުޅެކެވެ.
