އަނުޝްކާ ޝަރްމާގެ ޕަރީ މާޗް މަހުގެ 2ވަނަ ދުވަހު ސިނަމާތަކުގައި އަޅުވާނެއެވެ. ނަމަވެސް އޭނާގެ ހުރިހައި ވަގުތެއް ފިލްމް ޕްރޮމޯޓް ކުރާން ހޭދަ ނުކުރާނެ ކަމަށްވެއެވެ.
ޕަރީގެ އިތުރުން އޭނާގެ އެހެން ދެ ފިލްމެއް ވެސް މިއަހަރު ނެރޭގޮތަށް ވަނީ ހަމަޖެހިފައެވެ. ޕަރީގެ ޕްރޮމޯޝަން ގެ މަސައްކަތުގައި މިހާރު އަނުޝްކާ ނުކުރިނަމަވެސް އޭނާ ދަނީ ވަރުން ދަވަން އާ އެކު ކުޅޭ ފުރަތަމަ ފިލްމް ސުއިދާގާ ގެ ޝޫޓިންގެ މަސައކަތުގައި އަވަދި ނެތިއެވެ. އޭގެ އިތުރުން ސަންޖޭދަތުގެ ހަޔާތުގެ މައްޗަށް ކުޅޭ ފިލްމާއި ޝާހް ރުކް ޚާން އާއި ކަރީނާ އާ އެކު ކުޅޭ ޒީރޯ ގެ މަސައްކަތް ވެސް އޭނާ މިހާރު އެބަކުރެއެވެ.
ޕަރީ އަކީ ބިރުވެރި ފިލްމެކެވެ. އަނުޝްކާ އަކީ ޕަރީ ގެ އެއް ޕްރޮޑިއުސަރެވެ. މި ފިލްމުގެ ޓްރެއިލަރ އަށް ގިނަ ބައެއްގެ ތައުރީފު ލިބިފައިވެއެވެ. އެހެންނަމަވެސް ފިލްމާއި ބެހޭ މާ ބޮޑު ތަފްސީލެއް ޓްރެއިލަރ އިން ނޭނގެއެވެ.
އިންޑިއާގެ މަޝްހޫރު ނޫހަކުން ރިޕޯޓްކޮށްފައިވާ ގޮތުގައި ފިލްމު ޕްރޮމޯޝަން ތަކުގައި ބައިވެރި ނުވަނީ އެފަދަ ހަރަކާތްތަކުގައި ފިލްމާ ބެހޭ ގޮތުން ކުރާ ސުވާލުތަކަށް ޖަވާބު ދޭންޖެހިދާނެތީއެވެ. އަނުޝްކާ އާއި އޭނާގެ ކޮއްކޮ ކަރްނޭޝް މި ފިލްމާ ބެހޭ އެއްވެސް ވާހަކަ އެއް ހާމަ ކުރާން ބޭނުން ނުވާ ކަމުގައި ވެސް އެ ނޫހުން ރިޕޯޓް ކުރެއެވެ.
އަދި އަނުޝްކާ މިވަގުތު ދަނީ ބޯޕާލްގައި ވަރުން ދަވަން އާއި އެކު ސުއިދާގަ ގެ ޝޫޓިން ގައެވެ. އޭނާ އެނބުރި އަންނާނެ ކަމަށް ވަނީ އެޕްރީލް މަހުއެވެ.
