އިންޑިއާގެ ޣައިރު މުސްލިމުގެ ވަފުދެއް ، މުސްލިމުންގެ މުޤައްދަސް އެއްބިން ކަމުގައިވާ މަދީނާއަށް ޒިޔާރަތް ކޮށްފިއެވެ. މިދަތުރުގައި އިސްކޮށްހުރީ ، އިންޑިއާގެ މިނިސްޓަރ ފޯރ ވިމެން އެންޑް ޗައިލްޑް ޑިވެލޮޕްމަންޓް އެންޑް މައިނޯރިޓީ އެފެއާރޒް ، ސްމްރިޓީ ޒުބީން އިރާނީއެވެ. މި ދަތުރުކުރީ މި ޖެނުއަރީމަހުގެ 8 ވަނަ ދުވަހުއެވެ. މިއީ ، އިންޑިއާގެ ޣައިރު މުސްލިމުންގެ ވަފުދެއް ، މަދީނާއަށް ޒިޔާރަތްކުރި ފުރަތަމަ ފަހަރެވެ. ސްމްރިޓީއަކީ ، ހިންދީ ދީނުގެ މީހެކެވެ. އިންޑިއާގެ މިނިސްޓްރީ އޮފް އެކްސްޓާރނަލް އެފެއާރޒްގެ މިނިސްޓަރ އޮފް ސްޓޭޓް ފޯރ އެކްސްޓަރނަލް އެފެއާރޒް ، މުރާލީދަރަން އާއި އިންޑިއާގައި ވެރިކަންކުރާ ހިންދީ ވަތަނީ ޖަނަތާ ޕާރޓީ ، ބީޖޭޕީގެ އިސް ބައެއް މެންބަރުންވެސް މި ވަފުދުގައި ހމެނެއެވެ.
ޙައްޖުގެ އަޅުކަމާބެހޭގޮތުން ، ހިލޭ ސާބަހަށް މަސައްކަތްކުރާ އިންޑިއާގެ ވޮލަންޓިއަރުންނާއި ، އިންޑިއާއިން މިވަގުތު ޢުމްރާއަށްގޮސްތިބި މީހުންނާ މި ވަފުދު ބައްދަލު ކުރިއެވެ.
މިއުއްމަތުގެ މާތް ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަ ، ފަސްދާނުލެވިފައިވާ މަޤްބަރާގެ ސަރަޙައްދީ އިމާ ހަމަޔަށް މި ވަފުދުގެ މެންބަރުން ވަދެ ، މަސްޖިދުއްނަބަވީގެ އެތެރެ ބަލައިލުމުގެ ފުރުޞަތު ދެވުނެވެ. މިއީ ، އަދި މިހާތަނަށް ޣައިރު މުސްލިމަކަށް ލިބިފައިވާ ފުރުޞަތެއްނޫނެވެ. ޢުހުދު ފަރުބަދަޔަށްވެސް މި ވަފުދު ޒިޔާރަތް ކުރިއެވެ. އަދި ، ޤުބާ މިސްކިތަށްވެސް ވަފުދުގެ މެންބަރުން ޒިޔާރަތް ކުރިއެވެ.
އެކްސްގައި ، މިދަތުރާގުޅިގެން އިރާނީ ކޮށްފައިވާ ޕޯސްޓެއްގައިވާ ގޮތުގައި ، ސުޢޫދީ މަސްއޫލުވެރިންގެ އެހީތެރިކަމާއެކު އިންތިޒާމް ކުރެވިގެންދިޔަ މިދަތުރުގެ ސަބަބުން ، އިސްލާމީ ތާރީޚުގެ ކުރީކޮޅުގެ ތަޞައްވުރު ދެނެގަނެވިގެން ދިއުމުގެ ސަބަބުން ، ރޫޙާނީގޮތުންނާއި ތަރިކައިގެ ގޮތުން ދެބައިމީހުންގެ ގުޅުމުގެ ފުންކަން އިޙްސާސް ވިއެވެ.
މިދަތުރާގުޅޭގޮތުން ، އިންޑިއާ ސަރުކާރުން ނެރެފައިވާ ރަސްމީ ބަޔާން ބުނާގޮތުގައި ، އިންޑިއާގެ މުސްލިމުން ޙައްޖުގެ އަޅުކަން އަދާކުރުމަށް ސުޢޫދީއަށް ދިއުމުގައި ، ސަރުކާރުން ކޮށްދެވެންހުރި ހުރިހާކަމެއް ފުރިހަމަކޮށްދީ ، ފުރިހަމަ ޙައްޖެއްގެ ހިތްހަމަޖެހުން ލިބިގަތުމަށް ޙާއްޖުވެރިންނަށް ބޭނުންވާ އެހީތެރިކަން ފޯރުކޮށްދޭނެއެވެ.
މިދަތުރަށް ދެދުވަހަކަށް ވެފައި އޮއްވާ ، އިންޑިއާއާއި ސުޢޫދީ ޢަރަބިއްޔާއާ ދެމެދު ، އެއްބަސްވުމެއްގައި ސޮއިކުރެވިފައި ވެއެވެ. މި އެއްބަސްވުމުގައި ސޮއިކުރެވުނީ ، ސުޢޫދީ ޢަރަބިއްޔާގެ ޖިއްދާގައެވެ. މި އެއްބަސްވުމުގެ ދަށުން ، މިއަހަރުގެ ޙައްޖަށް 175،025 މީހުންގެ ކޯޓާއެއް އިންޑިއާއަށް ކަނޑައެޅުނެވެ.
މީގެ އިތުރަށް ، އިނގިރޭސި ވިލާތުގެ ޔަހޫދީންގެ ޖަމާޢަތެއްވެސް ސުޢޫދީ ޢަރަބިއްޔާއަށް ޒިޔާރަތް ކޮށްފައި ވެއެވެ. މި ދަތުރު އޮތީ މިދިޔަ އަހަރުގެ މާރޗް މަހުގެ ތެރޭގައެވެ. ޔަހޫދީންގެ އެ ޖަމާޢަތުންވަނީ ، މަދީނާގައި ކަދުރު ރުއްތަކެއް އިންދާފައެވެ. ޔަހޫދީންގެ މި ޖަމާޢަތަށް ، ސުޢޫދީއަށް ޒިޔާރަތްކުރުމަށް ހުއްދަދިނީ ، އެ ޤައުމުން ތަޢާރުފް ކޮށްފައިވާ ، އެކިދީންތަކުގެ މީހުން މަސްހުނިވެ އުޅުމަށް ފުރުޞަތު ދިނުމުގެ ސިޔާސަތުގެ ދަށުންނެވެ.
ޔަހޫދީންގެ ނޫހެއްކަމުގައިވާ " ޖްވިސް ކްރޮނިކަލް " ގައި ހާމަކޮށްފައިވާ ގޮތުގައި ، ޔަހޫދީން މަދީނާއަށްކުރި މި ދަތުރަކީ ، މިވޭތުވެދިޔަ 1400 އަހަރުގެ ތެރޭގައި ޔަހޫދީންގެ ބަޔަކު މަދީނާއަށް ކުރި ފުރަތަމަ ޒިޔާރަތެވެ. އެ ޒިޔާރަތަކީ ، ސުޢޫދީ ޢަރަބިއްޔާގެ ބިންވެރި މަހުޖަނަކުދިން ދަޢުވަތަކަށް ކުރި ޒިޔާރަތެކެވެ. އޭނާގެ އެ ދަޢުވަތަކީ ، ރަޙުމަތްތެރިކަމުގެ ވިސްނުމެއްގެ މަތިން ، އެހެންދީންދީނުގެ މީހުންނަށް ހެޔޮކޮށްހިތުމަށް އޭނާ ނެގި އިސްނެގުމެކެވެ.
އިނގިރޭސިވިލާތުން ، ސުޢޫދިއްޔާއަށް ދިޔަ ، ޔަހޫދީ ޖަމާޢަތުގެ އިސްވެރިޔަކަށްހުރީ ، ލަންޑަނުގެ ބޭންކްވިޔަފާރިކުރާ މުއްސަނދި ޔަހޫދީއެއްކަމުގައިވާ ރިކް ސޮފަރ ކިޔާ މީހެކެވެ. މީނާވަނީ ، ދާދިމިދާކަށްދުވަހު އެކުވެރި ޢަރަބި ޢިމާރާތް ، ޔޫއޭއީއަށްވެސް ޒިޔާރަތް ކޮށްފައެވެ. އެއީވެސް ، ދީނީ ފިކުރެއްގައި ، ތަފާތު ދީންތަކުގެ މީހުންގެ މެދުގައި އެއްބައެއްވަންތަކަން ޤާއިމްކުރުމުގެ ވިސްނުމުގައި ކުރި ދަތުރެކެވެ.
ޔަހޫދީ ޖަމާޢަތުން މަދީނާއަށް ކުރި ދަތުރުގައި ، ވިޔަފާއިވެރިންނާއި ޢިލްމުވެރިންނާ އަދި އެދަތުރަށް ޚަރަދުކުރި ބައެއް ޔަހޫދީން ބައިވެރިވިއެވެ. އެއިން ކޮންމެ ޔަހޫދީއަކުވެސް ، އަޖުވާ ކަދުރު ރުކެއް ، މަދީނާގައި އިންދާފައި ވެއެވެ.
ސޮފަރ ބުނެފައިވާ ގޮތުގައި ، ޔަހޫދީއަކަށްވެހުރެ ، އޭނާއަށް ސުޢޫދީއަށް ޒިޔާރަތް ކުރެވިދާނެކަމަށް ، މީގެ ފަސްއަހަރު ނުވަތަ ދިހަވަރަކަށް އަހަރުކުރިން ، މީހަކުބުނުނަމަ އެއްވެސް މީހަކު އެވާހަކަ ޤަބޫލެއް ނުކުރާނެއެވެ. އެއީ ، ޚުދު އޭނާއަށްވެސް ޤަބޫލުކުރަން އުނދަގޫ ވާހަކައަކަށް ވާނެއެވެ. ހަމައެކަނި ، ސުޢޫދީއަށް ޒިޔާރަތްކޮށްލުން އެކަންޏެއްނޫނެވެ. ސުޢޫދީ ޢަރަބިއްޔާގެ ސަރުކާރުންނާއި އިސްވެރިން އަދި ގާތް އެކުވެރިންގެ ފަރާތުން އެ ޖަމާޢަތަށް އެކީ ހޫނު މަރުޙަބާއާއި ބެހެއްޓި ގާތްކަމަކީ ، ޤަބޫލުކުރަން އޭނާއަށް އުނދަގޫ ކަމެކެވެ.
ދެޙަރަމްފުޅު ހުންނަ މައްކާއާއި މަދީނާއަކީ ، މީގެ ކުރިން ޣައިރު މުސްލިމުންނަށް ދެވޭތަންތަނެއްނޫނެވެ. އެހެނަސް ، ސުޢޫދީ ޢަރަބިއްޔާއިން މިހާރުވަނީ ދީނީ ކަންކަމާ ގުޅިގެންހެދިފައިވާ ބައެއް ސިޔާސަތުތަކަށް ބަދަލު ގެނެސް ޒަމާނީ އާ ވިސްނުންތައް ލައިގެން އާ ސިޔާސަތުތަކެއް ތަންފީޒުކުރަން ފަށާފައެވެ. ސުޢޫދީ ވެރިކަމުން މިހާރު އެގެންދަނީ ، ދީނީގޮތުން ހަރުކަށިކޮށް ހުރި ސިޔާސަތުތައް މުތާލިޢާކޮށް ، ދީނުގެ އިންތަކާއި މިންތަކުން ބޭރުވެގެން ނުދާގޮތަށް ، ސިޔާސަތުތައް ބަށްޓަންކޮށް ، ތަންފީޒުކުރަން ފަށާފައެވެ.
މަދީނާއަކީ ، އިސްލާމްދީން އައުމުގެ ކުރީ ޒަމާނުގައި ، ތިންޤަބީލާއަކަށް ނިސްބަތްވާ ޔަހޫދީންގެ ބަޔަކު ދިރިއުޅުނު ތަނެކެވެ. އެހެނަސް ، މުސްލިމުންގެ އާބާދީ އިތުރުވެ ، ޤަބީލާތަކުގެ މެދުގައި ކޯޅުން ހިނގައި ، އެއްބަޔަކު މަރުވެ އަނެއްބަޔަކު ރަށުން ބޭރަށްގޮސް ، ޔަހޫދީ އާބާދީ މަދީނާއިން ހުސްވެގެން ދިޔައީއެވެ. 1400 އަހަރަށްފަހު ، މަދީނާގައި ކަދުރު ރުކެއް އިންދަން ލިބުނު ފުރުޞަތަކީ ، ޔަހޫދީންގެ ހިތުން ފިލުވައިލެވިދާނެ ފުރުޞަތެއްނޫނެވެ.
މަދީނާއަށް އެތެރެވުމަށް ، ޣައިރު މުސްލިމުންނަށް މަނާކޮށްފައި އޮތްއޮތުން ނިމުމަކަށް އައީ 2021 ގައެވެ. މަދީނާއަށް އެތެރެވުމަށްފަހު ، މަސްޖިދުއްނަބަވީގެ ހަރިންމަ ފާރާ ހިސާބަށް ދިއުމުގެ ހުއްދަ އެމީހުންނަށް ދެވެއެވެ. ސުޢޫދީ ސަރުކާރުގެ އެދުމަކަށް ، އިޒްރޭލުގެ ޔަހޫދީންގެ 50 މީހުންގެ ވިޔަފާރި ވަފުދެއް ، މިދިޔަ އަހަރުވެސް މަދީނާއަށް ޒިޔާރަތް ކޮށްފައި ވެއެވެ. އިޒްރޭލުގެ ފަތުރުވެރިޔަކުވެސް ، އަސްލު އޮޅިވާލައިގެން މިދިޔައަހަރު މައްކާއަށްވެސް ވަދެފައި ވެއެވެ. އެއީ ، މައްކާއަށް ޣައިރު މުސްލިމުން ވަނުންމަނާކުރާ ޤާނޫނާ ޚިލާފަށް ، ވަރަށްބޮޑަށް އޮޅުވާލައިގެން އެޔަހޫދީކަލޭގެ ކޮށްފައިވާ ކަމެކެވެ. ޔަހޫދީންނަކީ ، ޢާންމު ގޮތެއްގައިވެސް ، މަކާރާއި ހީލަތާ ޖަހައިގެން ދުނިޔެ ކައިއުޅޭ ބަޔެކެވެ.
