ޔަމަނުގެ ވެރިރަށް ޞަންޢާގައި ހިލޭ އެހީ ބަހާ ތަނެއްގައި ހިނގި ހާދިސާއެއްގައ އެއްވެފައި ތިބި މީހުން ހާސްވެ ކޮޅުކޮޅަށް ދުއްވައިގަތުމުން ގިނަ ބަޔަކު ވެއްޓި މީހުންގެ ފައިދަށުވެ، 85 މީހުން މަރުވެ އެތައް ސަތޭކަ ބަޔަކު މަރުވެއްޖެއެވެ. މިއީ މިފަދައިން ފައިދަށުވުމުގެ ސަބަބުން ދުނިޔޭގައި އެންމެ ގިނަ ބަޔަކު މަރުވި އެއް ހާދިސާއެވެ.
މަދުވެގެން "85 މީހުން މަރުވެ 322 އަށްވުރެ ގިނަ މީހުން ވަނީ ޒަޚަމްވެފައި." ޞަންޢާގެ ބާބުލް ޔަމަން އަވަށުގެ ޙޫޘީ ސަލާމަތީ އޮފިޝަލަކު ވިދާޅުވިއެވެ.
"މަރުވި މީހުންގެ ތެރޭގައި އަންހެނުންނާ ކުޑަކުދިންވެސް ހިމެނޭ." ނާން ހާމަނުކުރުމަށް ޝަރުޠުކޮށް ބައެއް ޚަބަރުފަތުރާ ވިސާލަތްތަކަށް މައުލޫމާތު ދެއްވި އޮފިޝަލް ވިދާޅުވިއެވެ.
އިއްޔެ (ބުދަ ދުވަހު) ހަވީރު މި ހިތާމަވެރި ހާދިސާ ހިނގާފައި ވަނީ ޔަމަނުގެ މަދަރުސާއެއްގައެވެ. ރަމަޟާންގެ ފަހު ދުވަސްތައް ފާހަގަކުރުމުގެ ގޮތުން ބައެއް ވިޔަފާރިވެރިންގެ ފަރާތުން ކޮންމެ މީހަކަށް ގާތްގަނޑަށް 10 އެމެރިކާ ޑޮލަރުގެ މިންވަރަށް ފައިސާ ބަހާތީ، ފައިސާ ހޯދުމުގެ ބޭނުމުގައި އެތައް ސަތޭކަ ބަޔަކު އެތަނަށް އެއްވެ ތޮއްޖެހުން ބޮޑުވީއެވެ.
މަންޒަރު ދުށް ބައެއް މީހުން ކިޔައިން ދިން ގޮތުގައި ތޮއްޖެހުން މާ ބޮޑުވުން މީހުން ދުރުކުރުމުގެ ބޭނުމުގައި ޙޫޘީ ހަނގުރާމަވެރިން ވަޔަށް ބަޑިޖެހީއެވެ. އަދި ޖެހި ބަޑިއެއްގެ ވަޒަން ކަރަންޓު ކޭބަލަކަށް އަރައި އެ ގޮވުމުން މީހުން ތެޅިގަތީއެވެ.
ވެރިރަށް ޞަންޢާ ކޮންޓުރޯލުކުރާ ޙޫޘީންގެ ރަސްމީ ޓީވީ، އަލްމަސީރާ ޓީވީން ދެއްކި މަންޒަރުތަކުން ފެންނަ ގޮތުގައި، ގިނަ ބަޔަކު މަރުވެ ހަށިތައް ފުނިޖެހިފައި ހުރީ، އެއްބައެއްގެ ގައިމަތިން އަރައިގެން އަނެއް ބަޔަކު ދާން މަސައްކަތްކުރަނިކޮށެވެ.
ޙޫޘީންގެ އިންޓީރިޔާ މިނިސްޓްރީގެ ތަރުޖަމާނު ބްރިގޭޑިޔާ ޢަބްދުލްޙާލިޤް އަލްއަޣްރީ ވިދާޅުވި ގޮތުގައި، ފައިސާ ބެހުމުގެ ކަންތައް އިންތިޒާމުކުރި ދެ ވިޔަފާރިވެރިން މިހާރު މިނިސްޓްރީގެ ބެލުމުގެ ދަށަށް ގެނެވިފައެވެ. އަދި މިހާރު ވަނީ ތަހުގީގު ފަށާފައެވެ.
ޙޫޘީން މިހާރު އިއުލާންކޮށްފައިވާ ގޮތުގައި މަރުވި ކޮންމެ މީހެއްގެ އާއިލާއަށް ގާތްގަނޑަށް 2 ހާސް އެމެރިކާ ޑޮލަރު، އަދި ޒަޚަމްވި ކޮންމެ މީހެއްގެ އާއިލާއަށް ގާތްގަނޑަކަށް 400 އެމެރިކާ ޑޮލަރު ބަދަލުގެ ގޮތުގައި ދެވޭނެއެވެ.
ޔަމަނުގެ ދާޚިލީ ހަނގުރާމައިގައި 2014 ވަނަ އަހަރު ޙޫޘީން ވެރިރަށް ޞަންޢާއަށް ޔަރައި ޔަމަނު ސަރުކާރު އެރަށުން ބޭރުކޮށްލުމަށް ފަހު، އެރަށް އޮތީ ޙޫޘީންގެ ދަށުގައެވެ.
ދާޚިލީ ހަނގުރާމައިގައި ސަރުކާރު ސިފައިންނާއި، ހަނގުރާމަވެރިންނާއި، އާއްމުންގެ ތެރޭން މިހާތަނަށް 1 ލައްކަ 50 ހާހަށްވުރެ ގިނަ މީހުން މަރުވެފައި ވާއިރު، 21 މިލިއަން މީހުން (ޔަމަނުގެ އާބާދީގެ ގާތްގަނޑަކަށް ތިންބައިކުޅަ ދެބައި) ތިބީ ކާބޯތަކެތީގެ އެހީތެރިކަން ބޭނުންވާ ހާލުގައެވެ.
