(25 މާޗް 2023 ގައި ޝާއިއުކުރި ބަޔާ ގުޅޭ)
ކޮންމެ ނަފުސެއްމެ ދުނިޔެއަށް އުފަންވެގެން އަންނަނީ ، ފިޠުރަތުގެ ސާފުކަންމަތީގައެވެ. އެއްވެސް ކުށެއްނެތި އަމިއްލަ ޒާތުގައި އެންމެ ފުރިހަމަ ، ޠާހިރުކަންމަތީގައެވެ. ކީރިތި ޤުރުއާނުގެ ޠާހާ ސޫރަތުގެ 121 އަދި 122 ވަނަސޫރަތުގައި ﷲ ސުބްޙާނަހޫ ވަތަޢާލާ ވަޙީކުައްވައި އަންގަވައިފައި ވެއެވެ.
" ފަހެ ، އެދެކަނބަލުން އެގަހުން ފަރީއްކުޅުއްވިއެވެ. ދެން އެދެކަނބަލުންގެ ޢައުރަ ، އެދެކަނބަލުންނަށް ފައުޅުވިއެވެ. އަދި ސުވަރުގޭގެ ފަތްތަކުން ، ޢައުރަ ނިވައިކުރައްވަން ފެއްޓެވިއެވެ. އަދި ، އާދަމުގެފާނު ، އެކަލޭގެފާނުގެ ވެރި ރަސްކަލާނގެޔަށް އުރެދިވަޑައިގަތެވެ. ފަހެ ، އެކަލޭގެފާނުގެ މަޤްޞަދު ޙާޞިލްނުވެ މަގުގެއްލުނެވެ. ދެން ، އެކަލޭގެފާނުގެ ވެރި ރަސްކަލާނގެ ، އެކަލޭގެފާނު ޚިޔާރު ކުރެއްވިއެވެ. ފަހެ ، އެކަލޭގެފާނުގެ މައްޗަށް ތައުބާ ލައްވައި ތެދުމަގު ދެއްކެވިއެވެ. "
އިންސާނުންނަކީ ، ކުށްކުރުމަށްފަހު ، އެކުށް ހަނދާންނައްތައިލުމުގެ ދިގު ތާރީޚެއް އޮތް ބަޔެކެވެ. އެހެންކަމަށްވިޔަސް ، ސަލާމްލެއްވި އާދަމުގެފާނު އެކަލޭގެފާނަށް ކުރެއްވުނު ކުށަށް އަރައިގަނެވުނީ ކީއްވެ ހެއްޔެވެ ؟ ޙަޤީޤަތަކީ ، ޝައިތާނާގެ ވަސްވާހާއި ނުބައިކަން ، އާދަމް ޢަލައިހިއްސަލާމަށް ތަޖުރިބާ ކުރެއްވިފައެއް އަދި އެނގިވަޑައިގެންފައެއް ނުވެއެވެ. ﷲ އަށް ކިޔަމަންވުމަށް ޝައިތާނާ އިންކާރުކުރި ހިނދު ، ޝައިތާނާގެ ނުކިޔަމަންތެރިކަމާއި ނުބައި ނުލަފާކަން ، އެކަލޭގެފާނަށް ފެނިވަޑައިގަތެވެ. ޝައިތާނާއަކީ ، އެކަލޭގެފާނުގެ ދުޝްމަނެއްކަން އާދަމް ޢަލައިހިއްސަލާމަށް އެނގިވަޑައި ގަންނަވައެވެ. އެހެންނަމަވެސް ، ސައިތާނާގެ ވަސްވާހާއި ހެއްލުންތެރިކަމުން ރައްކައުތެރިވެވަޑައިގަންނާވާނެ ގޮތެއް އެނގިވަޑައެއް ނުގަންނަވައެވެ. ރަސޫލު ޞައްލަﷲ ޢަލައިހި ވަސައްލަމަ ޙަދީސް ކުރައްވައިފައިވާކަމަށް ޞަޙީޙު މުސްލިމުގައި ބަޔާންކުރެވިފައި ވެއެވެ.
" އެއްޗެއް އެނގުމަކީ ، އެއެއްޗެއް ފެނުމާ އެއްވަރު ކަމެއްނޫނެވެ. "
އަދި ، ކީރިތި ޤުރުއާނުގެ އަލް އަޢުރާފު ސޫރަތުގެ 22 ވަނަ އާޔަތުގައި ﷲ ސުބްޙާނަހޫ ވަތތަޢާލާ ވަޙީކުރައްވައިފައި ވެއެވެ.
" މަކަރުވެރިކަމުން ، އެކަލޭގެ ( އެބަހީ ޝައިތާނާ ) އެދެކަނބަލުން ހަލާޚުގެ ތެރެޔަށް ވައްޓައިލިއެވެ. ދެންފަހެ ، އެދެކަނބަލުން ، އެގަހުން ރަހަ ބެއްލެވި ހިނދު ، އެދެކަނބަލުންގެ ޢައުރަ އެދެކަނބަލުންނަށް ފައުޅުވެއްޖެއެވެ. އަދި އެދެކަނބަލުން ، ސުވަރުގޭގެ ( ގަހުގެ ) ފަތްތަކުން ، ( ޢައުރަ ) ނިވައިކުރެއްވުމަށް އަވަސްވެވަޑައިގަތެވެ. އަދި ، އެދެކަނބަލުންގެ ވެރި ރަސްކަލާނގެ ، އެދެކަނބަލުންނަށް ނިދާ އިއްވެވިއެވެ. އެގަހާ ކައިރިވެވަޑައިގަތުން ، ތިމަން ރަސްކަލާނގެ ތިޔަ ދެކަނބަލުންނަށް ނަހީ ނުކުރައްވަން ހެއްޔެވެ ؟ އަދި ، ހަމަކަށަވަރުން ، ޝައިތާނާއީ ، ތިޔަ ދެކަނބަލުންނަށް ބަޔާންވެގެންހުރި ޢަދާވާތްތެރިއެއްކަމަށް ވަޙީ ނުކުރައްވަން ހެއްޔެވެ ؟ "
އެއީ ، އާދަމުގެފާނަށް ކުރިމަތިވެވަޑައިގެންނެވި އިމްތިޙާނެކެވެ. ﷲ ، އެކަލޭގެފާނު ކުރެއްވެވި އިމްތިޙާނެކެވެ. އެއީ އެކަލޭގެފާނަށް ކަންކަން ދަސްކުރައްވައި ތަޖްރިބާ ކުރެއްވުމަށް ލިބިވަޑައިގެންނެވި ފުރުޞަތެކެވެ. މިކަމާގުޅިގެން ، ﷲ ގެ ރަސޫލެއްގެ ގޮތުގައި އަދި ދުނިޔެ އާބާދުކުރުމަށް އެކަލޭގެފާނު އުފުއްލަވަން ޖެހިވަޑައިގަންނަވާނެ ޒިންމާއާއި މަސްއޫލިއްޔަތަށް އަހުލުވެރިވެ ، ދުނިޔޭޣެ ކަންކަން ދަސްފުޅު ކުރެއްވުމަށް ޓަކައެވެ. ޝައިތާނާއަކީ ، އިންސާނުންގެ ޢަދުއްވެއްކަމާއި އިޚުލާޞްތެރިކަމެއް އަމްދުން ނެތް ނުބައިނުލަފާ ނަފުސެއްކަން އެނގިވަޑައިގަތެވެ. އާދަމް ޢަލައިހިއްސަލާމުގެ ދެކަނބަލުން ، ސުވަރުގެއިން ނެރެލެއްވީ ، ޝައިތާނުގެ ވަސްވާހަށް ހެއްލިވަޑައިގަތުމާގުޅިގެންކަން ، މުޅިއިންސާނިއްޔަތަށް އެނގެއެވެ. ސުވަރުގެ ލިބުންއޮތީ ، ޝައިތާނާގެ ވަސްވާހަށް ނުހެއްލި ، ޝައިތާނީ ޢަމަލުތަކުން ދުރުހެލިވެ ، ﷲ ގެ ތެދުމަދު އިޚްތިޔާރުކުރުމުންނެވެ. ކީރިތި ޤުރުއާނުގެ ޠާހާ ސޫރަތުގެ 123 ވަނަ އާޔަތުގައި ﷲ ސުބްޙާނަހޫ ވަތަޢާލާ ވަޙީކުރައްވައި އަންގަވައިފައި ވެއެވެ.
" އެކަލާނގެ ވަޙީކުރެއްވިއެވެ. ތިޔަ ދެކަނބަލުން އެކުގައި ، ސުވަރުގެއިން ( ބިމަށް ) ފައިބައިވަޑައިގަންނަވާށެވެ ! ތިޔަބައިމީހުންގެ އެއްބަޔަކު އަނެއްބަޔަކަށް ޢަދާވާތްތެރިންކަމުގައިވާ ޙާލުގައެވެ. ފަހެ ، ތިމަންރަސްކަލާނގެ ޙަޟުރަތުން ، ތިޔަބައިމީހުންނަށް ތެދުމަގެއް އަތުވެއްޖެނަމަ ، ދެން ތތިމަންރަސްކަލާނގެ ތެދުމަގަށް ތަބާވެއްޖެމީހާ ( ދަންނާށެވެ ! ) ފަހެ ، އެމީހަކު މަގުފުރެދިގެންނެއް ނުދާނެތެވެ. އަދި ، އަބާއްޖަވެރިއެއްވެސް ނުމެވާނޭ މެއެވެ. "
އާދަމް ޢަލައިހިއްސަލާމަށް ﷲ ގެ ޙަޟުރަތުން ބަސްވަޙީ ލިބިވަޑައިގަތެވެ. ﷲ ގެ ޙަޟުރަތުން ، ޢަފޫ ލިބިވަޑައިގަންނަވާނެ ދުޢާއެކެވެ. އެދުޢާއަކީ ، އަޅުގަނޑުމެންގެ ކުށްތައް ޢަފޫކުރައްވައި ، ﷲ ގެ ޙަޟުރަތުން ތައުބާ ލިބިގެންދާނެ މަތިވެރި ، ރީތި ދުޢާއެކެވެ. ކީރިތި ޤުރުއާނުގެ އަލްއަޢުރާފު ސޫރަތުގެ 23 ވަނަ އާޔަތުގައި ﷲ ސުބްޙާނަހޫ ވަތަޢާލާ ވަޙީކުރައްވައިފައި ވެއެވެ.
(ނުނިމޭ)
