އެއްވެސް ޝައްކެއްނެތެވެ. ޝްރީލަންކާއަކީ ، އެއްދުވަސްވަރެއްގައި ސިންގަޕޫރުހެން ތަރައްޤިވަމުން އައި މިސަރަޙައްދުގެ އިޤްތިޞާދީ ނަމޫނާއެކެވެ. އެހެންނަމަވެސް ، 1948 ގައި ޝްރީލަންކާއަށް މިނިވަންކަން ލިބުމުގެފަހުން ، އެޤައުމަށް ކުރިމަތިވި އިޤްތިޞާދީ ކާރިސާގައި ، ޤައުމު އެދަނީ ހަލާކުވަމުންނެވެ. މިކަން މެދުވެރިވެގެން ދިއުމުގައި ، ދެރަވަރުގެ ލަދުވެތި އެތައް ސަބަބުތަކެއް އެކުލެވިގެން ވެއެވެ. ކުރީގެ ސަރުކާރުތަކުން ، ޙާލަތާނުގުޅޭ މޮޔަ ނިންމުންތައް ނިންމުމާއި އިޤްތިޞާދީ ހިންގުންތެރިކަމެއް ނެތުންފަދަ އެތައް ސަބަބު ތަކެކެވެ. 2019 ގައި ޓެކްސް ކުޑަކުރުމާއި ، ކޯވިޑް 19 ގެ ޢާލަމީ ވަބާއާއި ބޭރުޤައުމުތަކުގައި މަސައްކަތްކުރާމީހުން ފޮނުވާ ފައިސާ މަދުވުންފަދަ ކަންކަން ހިމެނެއެވެ. ޝްރީލަންކާއަށް ކުރިމަތިވި އިޤްތިޞާދީ މި ކާރިސާއަކީ ، ނޭނގުމެއްގެ ތެރެއިން އައިސް ކުރިމަތިވި ކަމެއްނޫނެވެ. މިއީ ، ވެރިކަމަށް އައި އެކި ސަރުކާރުތަކުން ، ޤައުމު ހިންގުމުގައި ޢަމަލުކޮށްފައިވާގޮތުން ، ސިޔާސީ ހަނގުރާމައާއި ވާދަވެރިކަމާއި ، ޚިޔާނާތުގެ ޢަމަލުތަކާއި ، އޮހެމުންދިޔަ އެހީތަކުގެ ބޭނުން ނަހަމަ ގޮތްގޮތުން ހިފަމުން ދިއުމުގެ ނަތީޖާއެވެ.
އަލިވެ އުޖާލާވަމުންދިޔަ ، ޝްރީލަންކާގެ ކުރިމަގު ، ބިރުވެރި ވަބާއަކަށް ބަދަލުވެގެން ދިޔައީ ވެރިކަމަށް އިސްވި ފަރާތްތަކުގެ އިހުމާލުންނެވެ. ނަތީޖާއަކީ ، ކާބޯތަކެތި މަދުވެ ، ޤައުމު ބަނޑަށްޖެހި ، ކާބޯތަކެއްޗާއި ބޭސް އަދި ގޭސް ހުސްވެ ، ރައްޔިތުންގެ ޟަރޫރީ ބޭނުންތައް ނުފުއްދޭ މިންވަރަށް ، މުދާ ހުސްވެ ، އުފެއްދުންތެރިކަން ދަށްވެ ، އިމްޕޯރޓް އިތުރުވެ ، އިމްޕޯރޓް ކުރެވޭ މުދަލުގެ އަގު އަތްނުފޯރާ ހިސާބަށް ދިއުމެވެ. އަދި އެހެންގޮތެއް ނެތިގެން ، އިރުއިރުކޮޅާ ރައްޔިތުން މަގުމައްޗަށް ނުކުމެ ، އިޖްތިމާޢީ ޢަދާލަތާއި ޤައުމުގެ ހަމަޖެހުން އޮޔާ ދިއުމެވެ. ހަމަނުޖެހުންތަކުގައި ގެއްލޭ ފުރާނަތަކުގެ ޢަދަދު އިތުރު ވުމެވެ. ޙާލަތަށް ކެތްކުރަން އުނދަގޫވެ ، ވެރިކަމާދެކޮޅަށް ރައްޔިތުން ނުކުމެ މަގުމަތީގެ އަމާންކަން ގެއްލުމެވެ. ވެރިން ފިލަން ދުވަންޖެހި ، ޤައުމީ ސަލާމަތީ ބާރުތަކަށް ނުކަތާވަރަށް ، މަދަނީ ބަސްނޭހުން އިތުރުވެ ، ދެކޮޅުވެރިކަމުގެ ރާޅުބާނިތައް ނަގައި ، ބިންދައި ދިފާޢީ ބާރުތަކުގެ ފިޔަ ބިނދުމެވެ. ބާރުތަކުގެ ވަރަ ފޭބުމެވެ.
މާސިންގާ އިހްތިޖާޖުތަކަށް އިބާޖަދިނުމަށް މަޖުބޫރުވެ ، ރައީސުންނާއި ބޮޑުވަޒީރުން އަދި މާލީ ، އިޤްތިޞާދީ މުއައްސަސާތަކުގެ އިސްވެރިންގެ އިސްތިޢުފާ މަޖުބޫރުވެ ، އާމީހުން އިސްކޮށް ، ބައެއްމީހުން ލިބުނު މޮޅައިގެން ފިލައި ، އަނެއްބަޔަކު ނިޒާމުންބޭރުވެ ، ޤައުމުގެ ހަލަބޮލިކަން އެތެރެއިންނާއި ބޭރުން ފެންނަމުން ދިޔައެވެ. ސިޔާސީ މަތިފަޑި ބަދަލު ކުރެވުނަސް ، އަޞްލު މައްސަލަޔަށް ޙައްލެއް ނުލިބެއެވެ. މުސްތަޤްބަލް އަލިވެދާނެކަމުގެ ހުވަފެނެއްވެސް ނުފެނެއެވެ. ކައިރި މުސްތަޤްބަލެއްގައި ، ކޯވިޑްގެ ކުރީގެ ޙާލަތަށް އިޤްތިޞާދު އަލުން އަނބުރާ ރުޖޫޢަވެދާނެކަމުގެ އެއްވެސް ނިޝާނެއް ނެތެވެ. އެހެންނަމަވެސް ، ފަތުރުވެރިކަމާއި ، ބޭރުގައި މަސައްކަތްކުރާ މީހުން ޤައުމަށް ފޮނުވާ ފައިސާއާއި އެކްސްޕޯރޓްގެ ކޮންމެވެސް މިންވަރެއްގެ ކުރިއެރުމެއް ފެންނަމުން އެބަދެއެވެ.
މިހާރަށް ފެންނަ ނަންބަރުތަކަށް ބަލާއިރުވެސް ، ޢަދަދުތައްހުރީ ، ކޯވިޑްގެ ކުރީގެ ނަންބަރުތަކަށްވުރެ މާބޮޑަށް ދަށުގައެވެ. އަދި ދަނީވެސް ދަށަށެވެ. ގަނެވިއްކުމާއި ވިޔަފާރީގެ އަސާސްތަކަށް ، މީގެ ފަސްއަހަރު ކުރީއްސުރެ އަންނަމުންދިޔަ ބަދަލުތަކަކީ އިދިކޮޅު ޢަދަދުތަކެކެވެ. ޢަދަދުތައް ތިރިވާންފެށީ ، ކޯވިޑްގެވެސް ކުރިން މީގެ ފަސްއަހަރު ކުރިންނެވެ. އެކަންއެހެން ދިމާވީ ، އިންވެސްޓަރުންނާ ބީރަށްޓެހި ސިޔާސަތު ހެދި ، މަރުކަޒީ މާލީއިދާރާގެ ނިޒާމުތައް ބޮއްސުންލައި ، ބޭރުފައިސާ މާރުކުރާ ރޭޓް ކޮންޓްރޯލްކުރެވިފައި އޮތުމުގެ ސަބަބުންނެވެ. ޓެކުހުން ދައުލަތަށްލިބޭ ފައިސާ މަދުވެ ، 2019 ގައި ޓެކްސް ކުޑަކުރެވި ، އެތެރޭގެ ދަރަނި އުހަށް އަހައި ، ފައިސާ އިތުރަށް ބޭނުންވެ ، ދައުލަތުގެ ދަރަނި ނުބެލެހެއްޓޭމިންވަރަށް މައްޗަށް ދިއުމުގެ ސަބަބުންނެވެ.
ޤައުމުގެ ކްރެޑިޓް ރޭޓިން ދަށްވުމާގުޅިގެން ، 2020 ގައި ، ދުނިޔޭގެ މާލީބާޒާރުގައި ޝްރީލަންކާގެ އަގު ވެއްޓުނެވެ. ދަރަނި ދޭމީހުން އިތުރަށް ފައިސާދޭން ބިރުގަތެވެ. މިޙާލަތާ ގުޅިގެން ، ބޭރުން އެތެރެކުރެވޭ މުދަލަށް ފައިސާ ދެއްކުމަށާއި ބޭރުގެ ދަރަނި އަނބުރާ ދެއްކުމަށް ބޭނުންކުރެވިގެންދިޔައީ ، ޤައުމީ ރިޒާވްގައިހުރި މަދު ފައިސާކޮޅާއި ބޭންކިން ޞިނާޢަތުން ސަރުކާރަށް ނަގަމުންގެންދިޔަ ލޯނުންނެވެ. މުޅި ބޭންކިންގ ޞިނާޢަތުގައި ހުރި ބޭރުފައިސާގެ ޖުމްލަ ޢަދަދު 5.9 ބިލިއަން އެމެރިކާ ޑޮލަރަށް ތިރިވިއެވެ. މިއީ ، 1948 ގައި ޝްރީލަންކާއަށް މިނިވަންކަން ލިބުމަށްފަހު ، މިފަހަކަށްއައިސް ، މިޢަދަދު މިހާދަށަށްދިޔަ ފުރަތަމަ ފަހަރެވެ. ތެލުގެ ބާވަތްތައް ހުސްވުމާއި ، ބޭސް ނެތުމާއި ކައްކާގޭސް ހުސްވުމާއި އިޤްތިޞާދަށް ރަނގަޅުވެދާނެ ހުރިހާ ކަމެއް ނެތިދިއުމުގެ އަސަރު ، މުޅި އިޤްތިޞާދަށް ފޯރިއެވެ. ޚާއްޞަކޮށް ، 2022 ގެ ދެވަނަ ކްއާރޓަރުން ފެށިގެންނެވެ.
މިހުރިހާ ކަމަކާއެކުވެސް ، އިޤްތިޞާދު ބަރޯސާ ވަމުންދާ ، ފަތުރުވެރިކަމާއި ވިޔަފާރީގެ މުޢާމަލާތްތަކާއި ބޭރުގައި މަސައްކަތްކުރާ މީހުން ޤައުމަށް ފޮނުވާ ފައިސާ މަދުވުމާ ، ކޯވިޑްގެ ވަބާއާއި ރަޝިއާ – ޔުކްރޭނުގެ ހަނގުރާމައިގެ އަސަރު ، އެހެން ޤައުމުތަކަށް ވުރެބޮޑަށް ޝްރީލަންކާއަށް ކުރިއެވެ. ޤައުމުން ބޭރުގައި މަސައްކަތްކުރާ މީހުން ފޮނުވާ ބޭރުފައިސާގެ މިންވަރު 2014 ގައި ހުރީ 7 ބިލިއަން އެމެރިކާ ޑޮލަރުގައެވެ. 2021 ގައި މިޢަދަދުވަނީ ، 5.5 ބިލިއަން އެމެރިކާ ޑޮލަރަށް ތިރިވެފައެވެ. އިޤްތިޞާދުގެ މައި އިންޖީނުކަމުގައިވާ ފަތުރުވެރިކަންވަނީ 2020 ގައި ކޯވިޑްގެ ފުރަބަންދާ ގުޅިގެން އެއްކޮށް ހުއްޓިފައެވެ. ކޯވިޑްގެ ކުރިންވެސް ، ޤައުމުގެ ސިޔާސީ ހަލަބޮލިކަމާގުޅިގެން ، ފަތުރުވެރިކަން އޮތީ ހުއްޓިފައެވެ. ފަތުރުވެރިކަމުގެ ޞިނާޢަތަކީ އަހަރެއްގެ މައްޗަށް 4.4 ބިލިއަން އެމެރިކާ ޑޮލަރު އުފައްދާ ޞިނާޢަތެކެވެ. މިޢަދަދުވަނީ ، 2021 ގައި 200 މިލިއަން ޑޮލަރަށް ތިރިވެފައެވެ. 2021 ގައިއައި ފަތުރުވެރިންގެ ޢަދަދު ދެލައްކައަށްވެސް ނާރައެވެ.
އަނެއްކޮޅުން ، ދަނޑުވެރިކަމަށް ބޭނުންވާ ގަސްކާނާ އިމްޕޯރޓްކުރުން މަނާކުރުމަކީވެސް ވަރަށްބޮޑު ގޯހެކެވެ. އޭރު ދަނޑުވެރިންތިބީ އިމްޕޯޓްކުރެވޭ ގަސްކާނާއަށް ހޭނި އެއަށް ބަރޯސާ ވެގެންނެވެ. މިކަމާގުޅިގެން ޤައުމުގައި އުފައްދާ ދަނޑުވެރިކަމުގެ ބާވަތްތައް އެތައް ގުނަޔަކަށް ދަށްވެގެން ދިޔައެވެ. ޚާއްޞަކޮށް މައި އެކްސްޕޯރޓް ކަމުގައިވާ ސައިފަތް ، އަދި ކާބޯތަކެތީގެ ތެރެއިން ހަނޑޫ އުފެއްދުން އިންތިހާއަށް ދަށްވިއެވެ. ހަނޑު އުފެއްދޭ މިންވަރު ވިހި އިންސައްތަޔަށް ދަށްވެ ، ބޭރުން ހަނޑޫ އިމްޕޯރޓް ކުރަން މަޖުބޫރުވިއެވެ.
ޝްރީލަންކާގެ އިޤްތިޞާދަށް އައި ގިލަންވެރިކަމުގައި އެންމެ ބޮޑަށް އަސަރުކުރީ ފަޤީރު ޢާއިލާތަކަށެވެ. ތަކެތީގެ އަގު އިންތިހާއަށް އުފުލުނަސް ، ފައިސާގެ އަގު އިންތިހާއަށް ދަށްވިޔަސް ، މުއްސަނދިން އެބައިމީހުންގެ ދިރިއުޅުމުގެ މުހުތާދުތައް ފުއްދަމުން ގެންދިޔައެވެ. ފަޤީރު ޢާއިލާތަކުގެ ބަދިގޭގައި ގޭސް ހުސްވެ ، ލިބޭ މަދު އެތިކޮޅުވެސް ، ދަރުއުނދުނުގައި ކައްކައި ކާއެތިކޮޅު ރޯފިލުވަން ޖެހުނެވެ. ގިނަ ފަޤީރުންނަކީ ދަނޑުވެރި ޢާއިލާ ތަކެވެ. ގަސްކާނާ ނެތި ، އެބައިމީހުންނަކަށް ދަނޑުވެރިކަމެއް ނުކުރެވެއެވެ. ބައެއް ޢާއިލާތަކުގެ ދަރިން ބޭރުގައި ތިބެ މަސައްކަތްކޮށްގެން ހޯދާ ބޭރުފައިސާ އެއް ނުލިބެއެވެ. އެއް އަހަރުން އަނެއް އަހަރަށް މަތިވަމުންދިޔަ އިންފްލޭޝަން ރޭޓް ، 2022 ގެ އޯގަސްޓަމަހު 64 އިންސައްތަޔަށް އެރިއެވެ. ވިޔަފާރީގެ ބޭރުގެ މުޢާމަލާތުގެ ދަރަނި 19 އިންސައްތަޔަށް ދަށްވެ ވިޔަފާރީގެ ދަރަނީގެ ޙާލަތު ރަނގަޅުވިއެވެ. އިމްޕޯރޓަށްވުރެ ، ތައްޔާރީ ހެދުމުގެ ވިޔަފާރީގެ އެކްސްޕޯރޓް މަތިވިއެވެ. އެއީ ޝްރީލަންކާގެ އިޤްތިޞާދު ރަނގަޅުކުރުމަށް އިންޑިއާއިން ދިން 3.8 ބިލިއަން އެމެރިކާ ޑޮލަރުގެ އެހީތެރިކަމާ ގުޅިގެން އައި ހެޔޮ ބަދަލެކެވެ.
ޝްރީލަންކާގެ އިޤްތިޞާދީ އަނދަވަޅުން އަރައިގަތުމަށްޓަކައި ، ސަރުކާރުގެ 2023 ގެ ޚަރަދުތައް 5 އިންސައްތަ ކުޑަކުރުމަށް ، ސަރުކާރުންވަނީ އަންގާފައެވެ. 2022 ވަނައަހަރު ، އައި ފަތުރުވެރިންގެ ޢަދަދުވަނީ ، ސިޔާސީ ހަލަބޮލިކަމާ ގުޅިގެން ، އެއްމަހު ދަށްވެފަ އަނެއްމަހު އިތުރުވެ ، އެހެންނަމަވެސް އަހަރު ނިމުނުއިރު ، އެއްލައްކަޔަށް އަރާފައެވެ.
އިޤްތިޞާދީ ގޮންޖެހުންތަކާ ގުޅިގެން ، ޝްރީލަންކާއަށްވަނީ ، ބޭރު ޤައުމުތަކާއި ބޭރުގެ މާލީ އިދާރާތަކަށް ސަލާންޖަހަން މަޖުބޫރު ވެފައެވެ. މިހާތަނަށް ބެލެވޭ ގޮތުގައި ، ޝްރީލަންކާގެ ބޭރުގެ ދަރަނި އުޅެނީ 51 ބިލިއަން އެމެރިކާ ޑޮލަރުގައެވެ. ޗައިނާއަށް ދަރާއޮތް 6.5 ބިލިއަން އެމެރިކާ ޑޮލަރުވެސް އޭގެ ތެރޭގައި ހިމެނެއެވެ. ޗައިނާގެ ދަރަނި އަލުން މުރާޖަޢާކޮށް ، ފައިސާ ދައްކަންވީގޮތަށް ބަދަލުތަކެއް ގެނައުމުގެ ވާހަކަތައް މިހާރު ހިނގަމުން އެބަދެއެވެ.
ޤައުމު އާރާސްތުކޮށް އަރިއަޅައިލާފައިވާ އިޤްތިޞާދީ ބިންގާ ތެދުކުރުމަށްޓަކައި ، އެކި ޤައުމުތަކުންނާއި ބައިނަލްއަޤްވާމީ މާލީ އިދާރާތަކުން އަންނަނީ އެހީތެރިވަމުންނެވެ. އައިއެމްއެފުން ދޭންބުނި 2.9 ބިލިއަން ޑޮލަރުގެ ކަންތައް އަދި މުޅިން ހުއްދަ ނުކުރެވުނަސް އެއީ ލިބިދާނެކަމަށް ބެލެވޭ އެއްޗެކެވެ. ޖީ7 ގެ ޤައުމުތަކުން ، ކެނަޑާ ، ފްރާންސް ، ޖަރުމަން ، އިޓަލީ ، ޖަޕާން ، އިނގިރޭސިވިލާތް އަދި އެމެރިކާއިންވެސް ވަނީ ޝްރީލަންކާއަށް މާލީ އެހީދޭނެކަމަށް ވަޢުދުވެފައެވެ. މީގެ އިތުރަށް ، ވޯލްޑް ބޭންކުންވަނީ 600 މިލިއަން ޑޮލަރުދޭން އެއްބަސް ވެފައެވެ. އިންޑިއާއިންވަނީ 1.9 ބިލިއަން ޑޮލަރު ދޭނެކަމަށް ބުނެފައެވެ.
އެހެންނަމަވެސް ، އައިއެމްއެފްގެ މެމްބަރ ޤައުމުތަކުން ، ވޯޓުލުމުގެ ޙައްޤު ، އެއްޤައުމަކަށް އެންމެ ބޮޑަށް ލިބޭ ޤައުމަކީ އެމެރިކާއެވެ. އެމެރިކާއަކީ ، އައިއެމްއެފްގެ ނިންމުންތައް ވީޓޯ ކުރުމުގެ ބާރުވެސް ލިބިގެންވާ ޤައުމެކެވެ. ވޯޓުލުމުގެ ޙައްޤުގެ 16 އިންސައްތަ އެމެރިކާއަށް ލިބިގެން ވެއެވެ.
އައިއެމްއެފްގެ ތެރެއިން ، އިޤްތިޞާދީ އިޞްލާހެއް ގެންނަން ބޭނުންވާ ކޮންމެ ޤައުމަކަށްވެސް އެމެރިކާގެ ތާއީދު ބޭނުންވާނެއެވެ. އެމެރިކާގެ ތާއީދާނުލައި ، އެއްވެސް ޤައުމަކަށް އެކަމެއް ނުކުރެވޭނެއެވެ. ޝްރީލަންކާއަށްވެސް އެކަންކުރަން މަޖުބޫރު ވާނެއެވެ. މިކަމާބެހޭގޮތުން ޝްރީލަންކާއިން މިހާރުވަނީ އެމެރިކާއާ ވާހަކަ ދައްކާފައެވެ. އަދި މިކަމުގައި އެމެރިކާގެ ތާއީދު ބޭނުންވާކަން ހުށަހަޅާފައެވެ. ބެލެވޭގޮތުގައި ، ޝްރީލަންކާގެ އިޤްތިޞާދާ ބެހޭގޮތުން އައިއެމްއެފުން ނިންމާ ނިންމުންތަކުގައި އެމެރިކާގެ އެހީތެރިކަން ލިބޭނެއެވެ. އެމެރިކާގެ ޝަރުތަކީ ، ޑިމޮކްރަސީގެ ނިޒާމް ހަރުދަނާކުރުމާއި ، އިޤްތިޞާދީ ކުރިއެރުން ޙާޞިލްކުރެވޭނެ ގޮތްތަކަށް އިޤްތިޞާދު ރޭވުމާއި ، ތިމާވެށި ޙިމާޔަތް ކުރުމަށް އިސްކަން ދިނުމެވެ. ޝްރީލަންކާއާއި އެމެރިކާއާ ދެމެދު އޮތް ގުޅުމަކީ ، 75 އަހަރުވެފައިވާ ދިގުތާރީޚެއް އޮތް ގުޅުމެކެވެ.
ޕެޓްރޯލާއި ގޭސް ސްޓޭޝަންތަކުގެ ކިއު ދިގުވިޔަސް ، ފަތުރުވެރިންގެ ޢަދަދު މައްޗަށް ޖެހިލިޔަސް ، އަދި އިންފްލޭޝަން ރޭޓް ، ކުޑަކޮށް ތިރިވެލިޔަސް ، ކުޑަދުވަސްކޮޅެއްކުރިން އޮތް ޙާލަތު އެބަ ރަނގަޅުވާކަމަށް ފެނެއެވެ. އެހެންނަމަވެސް ، މިއަހަރުގެ މާރިޗް މަހުންފެށިގެން ، އިޤްތިޞާދު އަލުން ދަށްވާން ފަށާނެކަމަށް ، އިޤްތިޞާދީ މާހިރުން ވަރަށްބޮޑަށް ލަފާކުރެއެވެ. މިކަމަށް ބާރުލިބޭ އެއްކަމަކީ ، ވޯރލްޑްބޭންކުން ދެކުނު އޭޝިއާގެ ތަޞައްވުރު ދެކޭގޮތެވެ. ރަޝިއާ – ޔުކްރޭން ހަނގުރާމަޔާ ގުޅިގެން ދުނިޔެއަށް އަންނަ އިޤްތިޞާދީ ދަތިތައް އެންމެ ބޮޑަށް ފޯރާނެ އެއްސަރަޙައްދަކީ ދެކުނު އޭޝިއާކަމުގައި ވޯރލްޑްބޭންކުން ދެކެއެވެ. މީގެ އިތުރަށް ، މި ސަރަޙައްދުގެ އިޤްތިޞާދީ ކުރިއެރުންވަނީ 2022 ގައި 6 އިންސައްތަ ދަށްވެފައެވެ.
ވޯރލްޑްބޭންކުން ލަފާކުރާގޮތުގައި ، މިސަރަޙައްދުގެ ބައެއް އިޤްތިޞާދަށް ، ޚާއްޞަކޮށް ޝްރީލަންކާއާއި ޕާކިސްތާނަށް އަންނަމުންދާ ދަތިކަމުގައި ، ބަނޑަށް ޖެހުމުގެ ބިރުވެރިކަން އެބައޮތެވެ. 2019 ވަނައަހަރު ، ކޮންމެ ދިހަމީހަކުން އެކަކީ ކާބޯތަކެތީގެ ޔަޤީންކަން ކަށަވަރު ކުރެވެންނެތް މީހެކެވެ. މިހާރުގެ ޙާލަތަށްބަލާއިރު ، ކޮންމެ ތިންމީހަކުން އެކަކީ ، ކާބޯތަކެތީގެ ޔަޤީންކަން ނެތް މީހެކެވެ.
މިހާރު ބޯމަތިވެފައިވާ ލޯކަލް ގަވަރންމަންޓް އިލެކްޝަން ބޭއްވުމަށްޓަކައިވެސް ، ލަންކާ ސަރުކާރަށް ފައިސާ ޗާޕްކުރަން އޮތީ ޖެހިފައެވެ. ފައިސާ ޗާޕްނުކޮށް އެ އިންތިޚާބު ބޭއްވޭވަރަށް ސަރުކާރުގައި ފައިސާއެއް ނެތެވެ. ސަރުކާރުން އެކަން ހާމަކުރުން ދައްކުވައިދެނީ ، ލަންކާގެ އިޤްތިޞާދީ ޙާލަތުގެ ނުރައްކާތެރިކަމެވެ. 2023 ގައި ކުރިމަތިވެދާނެ ހައިހޫނުކަމެއްގެ އިންޒާރެވެ.
ޗައިނާއިން ތަޢާރުފްކޮށްފައިވާ ، ޒީރޯ ކޯވިޑް ޕޮލިސީ އަކީވެސް ޝްރީލަންކާއަށް އަސަރު ފޯރާނެ ޕޮލިސީއެކެވެ. މިހާރުވަނީ ކޯވިޑްގެ އާ ވޭރިއަންޓެއް އެމެރިކާއިން ފެނިފައެވެ. ޒީރޯ ކޯވިޑް ޕޮލިސީއެއް ތަޢާރުފް ކުރިޔަސް ، ޗައިނާއިން ކޯވިޑާމެދު ގެންގުޅޭ ހަމަތަކަށް ދުނިޔެ އިތުބާރެއް ނުކުރެއެވެ. އަދި ޝްރީލަންކާއިންވެސް މިކަމަށް އޮތީ ޚާއްޞަ ސަމާލުކަމެއް ދީގެން ދެލޯ ހުޅުވައިގެންނެވެ. 2023 ގެ އިޤްތިޞާދު ރަނގަޅު ކުރުމަށްޓަކައި ، ޝްރީލަންކާއިން ، ވަރުބަލިވަންދެން ކުރަންޖެހޭ މަސައްކަތްތަކެއް އެބަހުއްޓެވެ. ޙާލަތާމެދު އެހާބޮޑު އުއްމީދެއް އަދި އިތުބާރެއްވެސް ނެތެވެ. މިއަހަރުގެ ކުރިޔަށް އޮތްތަނުގައި ތަޙައްމަލުކުރަންޖެހޭނެ ދަތިތައް އަދި މާބޮޑުކަމަށް އިޤްތިޞާދީ މާހިރުން ލަފާކުރެއެވެ. ސަރުކާރުން ކުޅިކުޅިވަރަށް މަސައްކަތް ނުކޮށް ، ރައްޔިތުންނާއި ޤައުމުގެ ލާބައާއި މަންފާއަށް ވިސްނައިގެން ، ސިޔާސީ ބޭނުންތައް އެއްފަރާތްކޮށް ، ހަރުދަނާ ފިޔަވަޅުތަކެއް އަޅައިގެންނޫނީ ސަލާމަތުގެ އައްސޭރިޔަކަށް ވާޞިލެއް ނުވެވޭނެއެވެ.
