މިދިޔަ ބުރާސްފަތި ދުވަހުގެރޭ ސްޕްރީމް ކޯޓުން ނެރެފައިވާ ސިޔާސީ ކުށްވެރިން ދޫކޮށްލުމުގެ އަމުރު ތަންފީޒު ކުރެއްވުމަށް ކުރީގެ ހޯމްމިނިސްޓަރު އުމަރު ނަސީރު ސަރުކާރަށް ގޮވައިލައްވައިފިއެވެ.
އުމަރު ވިދާޅުވެފައިވަނީ ކޯޓު އަމުރުގައިވާ ހުރިހާ ބޭފުޅުން ދޫކޮށްލުމަށްފަހު އޭގެ ތެރޭގައި ހިމެނިވަޑައިގަންނަވާ ކުރީގެ ރައީސް މުހައްމަދު ނަޝީދާއި، ކުރީގެ ނާއިބު ރައީސް އަހުމަދު އަދީބު އަލުން ހައްޔަރުކޮށް ޝަރީއަތުގެ ކުރިމައްޗަށް ހާޒީރު ކުރަންވާނެ ކަމަށެވެ.
އެކަން އެގޮތަށް ކުރައްވަންޖެހޭ ސަބަބެއް ކަމަށް އުމަރު ވިދާޅުވެފައިވަނީ އެދެބޭފުޅުންނަކީ ކޮރަޕްޝަންގެ އަމަލުތައް ހިންގަވައި، ފަނޑިޔާރުން ވަގަށް ނަންގަވައި، ގާނޫނީ ބާރުތައް ނަހަމަގޮތުގައި ބޭނުންކުރައްވައިފައިވާ ބޭފުޅުން ކަމަށްވާތީއެވެ.
"ސްޕްރީމް ކޯޓުގެ އަމުރަށް ތަބާވެ އެންމެން ދޫކޮށްލުމަށް އަޅުގަނޑު ސަރުކާރަށް ގޮވާލަން. ނަމަވެސް ރައީސް ނަޝީދާއި، ވައިސް ޕްރެޒިޑެންޓް އަދީބު އަލުން ހައްޔަރުކޮށް ޝަރީއަތުގެ ކުރިމައްޗަށް ވަގުތުން ގެންނަންވާނެ. މި ދެބޭފުޅުންވަނީ ރޯމާދުވާލު ކޮރަޕްޝަން ހިންގައި ފަނޑިޔާރަކު ވަގަށްނަގައި ސްޕްރީމްކޯޓުގައި ތަޅުއަޅުވައި ގާނޫނީ ބާރުތައް ނުހަމަގޮތުގައި ބޭނުން ކުރައްވައިފައި،" އުމަރު ވިދާޅުވެފައިވެއެވެ.
އޭނާ ވިދާޅުވީ ރައީސް ޔާމީނަށްވެސް މިހާރު ދިމާވެގެން އުޅުއްވާ މައްސަލައަކީ ރައީސް ނަޝީދު ކުރެއްވި ކަންކަން އެއްވެސް ތަފާތެއްނެތް ގޮތަށް ކުރައްވަމުން ގެންދަވާތީ ރައްޔިތުންގެ ހިތްހަމަ ނުޖެހުމުގެ މައްސަލަ ކަމަށެވެ.
"މިއަދު ރައީސް ޔާމީނާ މެދުވެސް ރައްޔިތުން ހިތްހަމަނުޖެހިގެން މިއުޅެނީ ހަމަ ރައީސް ނަޝީދު ކުރެއްވި ކަންކަން އެގޮތަށް ކުރައްވާތީ. އެއްވެސް ތަފާތެއްނެތް،" އުމަރު ވިދާޅުވިއެވެ.
ސްޕްރީމް ކޯޓުގެ އަމުރު ތަންފީޒު ކުރެއްވުމަށް އެކި ފަރާތްތަކުން ގެންދަވަނީ ސަރުކާރަށް ގޮވައިލައްވަމުންނެވެ. ސްޕްރީމް ކޯޓުންވެސް ވިދާޅުވީ އެ އަމުރު ތަންފީޒު ކުރުމުގައި ގާނޫނީގޮތުން ސަރުކާރަށް އެއްވެސް ހުރަހެއްނެތް ކަމަށެވެ.
