ރައްޔިތުންގެ މަޖިލީހުގެ މައްޗަންގޮޅީ އުތުރު ދާއިރާގެ މެންބަރު އަބްދުﷲ ސިނާނާއި، ދަނގެތީ ދާއިރާގެ މެންބަރު އިލްހާމް އަހުމަދު މިއަދު ހައްޔަރު ކޮށްފައިވާ ކަމަށް ފުލުހުން ވިދާޅުވެއްޖެއެވެ.
އެ ބޭފުޅުން ހައްޔަރުކުރެއްވީ ރާއްޖެއިން ބޭރުގައި އުޅުއްވުމަށްފަހު މާލެ ވަޑައިގެންނެވުމުންނެވެ. އެދެބޭފުޅުންވެސް ހައްޔަރު ކޮށްފައިވަނީ ކޯޓު އަމުރެއްގެ ދަށުންނެވެ. "މއ. އަލިމަސްވާދީ އަބްދުﷲ ސިނާނާއި، ގއ. ގެމަނަފުށީ އޯކިޑުމާގޭ އިލްހާމް އަހުމަދު ކޯޓު އަމުރެއްގެ ދަށުންވަނީ ހައްޔަރުކޮށްފައި،" ފުލުހުން ވިދާޅުވެފައިވެއެވެ.
މައުލޫމާތު ލިބިފައިވާ ގޮތުގައި އެދެބޭފުޅުން ހައްޔަރުކޮށްފައިވަނީ ރައްޔިތުންގެ މަޖިލީހުގެ ބައެއް މެމްބަރުންނަށް ރިޝްވަތު ދިނުމުގެ ތުހުމަތުގައި ދިއްގަރުދާއިރާގެ މެންބަރު އަހުމަދު ފާރިސް މައުމޫންގެ މައްޗަށް ތުހުމަތުކުރެވޭ މައްސަލައާ ގުޅިގެން ސުވާލު ކުރެއްވުމަށެވެ.
މީގެ ކުރިން ފުލުހުންވަނީ 31 ޖެނުއަރީން ފެށިގެން 14 ދުވަސްތެރޭގައި ފުލުހުސް އޮފީހަށް ހާޒިރުވާން އެބޭފުޅުންނަށް އަންގަވައިފައެވެ. އެ އެންގެވުމާ ބެހޭގޮތުން އިލްހާމް ވިދާޅުވެފައިވަނީ ވަރަށް އަވަހަށް މާލެ ވަޑައިގަންނަވާނެ ކަމަށެވެ. އަދި ފުލުހުން ކުރައްވާ ސުވާލުތަކަށް ޖަވާބުވެސް ދެއްވާނެ ކަމަށެވެ.
