އަމިއްލަ ޓީވީ ސްޓޭޝަނެއް ކަމަށްވާ ރާއްޖެ ޓީވީ ބަންދު ކުރަން ވެރިކަންކުރާ ޕީޕީއެމުން މިއަދު ގޮވާލައިފިއެވެ.
ޕީޕީއެމުން ބޭއްވި ނޫސްވެރިންގެ ބައްދަލުވުމެއްގައި އެޕާޓީގެ ނައިބު ލީޑަރ އަބްދުﷲ އަބްދުއްރަޙީމް ވިދާޅުވީ ގައުމުގައި މިވަގުތު އޮތް ޙާލަތުގައި ފިތުނަ ފަސާދަ އުފައްދަން ރާއްޖެ ޓީވީން އުޅޭ ކަމަށާއި އެހެންކަމުން ކަމާބެހޭ މުއައްސަސާ ތަކުން ރާއްޖެ ޓީވީ ބަންދު ކުރަން ޕީޕީއެމުން ގޮވާލާ ކަމަށެވެ.
އަދުރޭ ވިދާޅުވީ ދެން ގައުމަށް ބޭނުން ގޮތެއް ނުހެދޭނެ ކަމަށާއި ގައުމު ބައިބައިކުރަން ފުރުޞަތު ދެވެން ނެތް ކަމަށާއި ގައުމަށްޓަކައި ފުރާނަވެސް ދުއްވާލަން ތައްޔާރު ކަމަށެވެ.
ރާއްޖެ ޓީވީ ބަންދު ކުރަން ވެރިކަންކުރާ ޕާޓީގެ އިސްބޭފުޅަކު މިއަދު ގޮވާލެއްވިއިރު ބްރޯޑްކާސްޓަރުންގެ ބެލެނިވެރިފަރާތް ކަމަށްވާ މޯލްޑިވްސް ބްރޯޑްކާސްޓިންގ ކޮމިޝަނުންވެސް ދާދި ފަހުން ވަނީ ގައުމީ ސަލާމަތަށް ނުރައްކާވާގޮތަށް ދޮގު މައުލޫމާތު ގެނެސްދޭ ޓީވީ ޗެނަލްތައް އެއްވެސް އެންގުމަކާނުލައި ބަންދު ކުރާނެ ކަމުގެ އިންޒާރު ދީފައެވެ.
