އިނގިރޭސިވިލާތުގެ ރާނީ އެލިޒަބަތުގެ ޖަނާޒާގައި ބައިވެރިވެވަޑައިގަތުމަށް ރައީސް އިބްރާހީމް މުހައްމަދު ސޯލިހު މާދަމާ އެ ގައުމަށް ފުރާ ވަޑައިގަންނަވާނެ ކަމަށް ރައީސް އޮފީހުގެ ތަރުޖަމާނު މިއުވާން މުހައްމަދު ވިދާޅުވެއްޖެއެވެ.
އޭނާ ވިދާޅުވީ ރާނީގެ ޖަނާޒާގައި ބައިވެރިވެވަޑައިގަތުމަށް ރައީސް އިނގިރޭސިވިލާތަށް ވަޑައިގަންނަވަނީ އެ ގައުމުގެ ދައުވަތަކަށް ކަމަށެވެ.
ރައީސްގެ ދަތުރުފުޅަށް ތިން މިލިއަން ރުފިޔާ ޚަރަދުވާނެ ކަމަށް ބައެއް ފަރާތްތަކުން ބުނަމުންއަންނަ އައުމަށް މިއުވާން ވިދާޅުވީ އެވަރުގެ ޚަރަދެއް ނުދާކަމަށައި އެއީ މި ދަތުރުފުޅުގައި އެއްވެސް ރަސްމީ ބައްދަލުވުމެއް ނޯންނާނެތީ ކަމަށެވެ.
އެކި ގައުމުތަކުގެ އިސްވެރިން ވެސް ބައިވެރިވާ އެ ޖަނާޒާގައި ރާނީގެ ހަށިކޮޅު ފަސްދާނުލުމުގެ ކަންކަން ކުރިއަށްދާނީ އަންނަ ހޯމަ ދުވަހުގައެވެ.
ރާނީ އަވަހާރަވުމާ ގުޅިގެން އެކަމުގެ ހިތާމައިގައި މިދިޔަ ހުކުރު ދުވަހުން ފެށިގެން އާދީއްތައިގެ ނިޔަލަށް ދިވެހި ގައުމީ ދިދަ ވަނީ ބައި ދަނޑި އަށް ތިރިކޮށްފައެވެ.
މީގެ 50 އަހަރު ކުރިން ރާއްޖެ އަށް ރާނީ ތާރީހީ ދަތުރުފުޅެއް ކުރެއްވިއިރު، އޭރު ވެރިކަމުގައި ހުންނެވީ ކުރީގެ ރައީސް އަލްމަރްހޫމް އިބްރާހިމް ނާސިރެވެ.
އުމުރުފުޅުން 96 އަހަރުގައި ރާނީ އަވަހާރަވި އިރު، އެކަމަނާ އަކީ އެންމެ ދިގު މުއްދަތަކަށް ރަނިކަން ކުރެއްވި ކަމަނާއެވެ. ރާނީ އަވަހާރަވުމުން އެ ގައުމުގެ ރަސްކަމާ ހަވާލުވެޑައިގަތީ އެކަމަނާގެ ދޮށީ ދަރިކަލުން، އުމުރުފުޅުން 73 އަހަރުގެ ޗާލްސް 3 އެވެ.
