ޓްވިޓަރގައި އިންނަ 120 ކެރެކްޓަރުން ދުރަށްދާން ނޫޅޭ ކަމަށާއި ސުރުޚީ ކިޔާލުމުން ނިމުނީ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ގައުމީ ޔުނިވަރސިޓީގައި 'ފަހި ކުތުބުޚާނާ' ހުޅުއްވާދެއްވުމަށްފަހު ވާހަކަފުޅު ދައްކަވަމުން ރައީސް ނަޝީދު ވިދާޅުވީ ސުރުޚީގެ ދަށުން އޮތް ވާހަކައެއް ހަގީގަތުގައި ކިޔަން ބޭނުން ނުވާ ކަމަށެވެ.
އެމަނިކުފާނު ވިދާޅުވީ ފޯކަސް ނުގެއްލި ކަމެއްގައި ދެމިހުރުމަށް އެންމެ ބޮޑަށް ބޭނުންވާ އެއްކަމަކީ އަބަދު ވެސް ކޮންމެވެސް ވަރަކަށް ކިޔުން ކަމަށާއި ދިވެހިންގެ ކިއުމުގެ އާދަ މިއަދަށްވުރެން ފުޅާވާނެ ކަމަށް އުންމީދު ކުރައްވާ ކަމަށެވެ.
މީގެ އިތުރުން ދައުލަތް ބިނާކުރުމުގައި ވެސް ވާހަކައިގެ ދައުރަކީ ވަރަށް ބޭނުންތެރި އެއްޗެއް ކަމަށް ވެސް އެމަނިކުފާނު ވިދާޅުވިއެވެ.
ގައުމީ ޔުނިވަރސިޓީގެ ފަހި ކުތުބުޚާނާ އަކީ ރާއްޖޭގެ ހުރިހާ އަތޮޅެއްގެ މައުލޫމާތާއި ރަށްރަށުގެ މައުލޫމާތު އާންމުންނަށް ފޯރުކޮށްދިނުމުގެ މަގުޞަދުގައި ހުޅުވި ކުތުބުޚާނާއެކެވެ.
ދުނިޔޭގެ ލައިބްރަރީ ދުވަހާއި ގުޅުވައިގެން ގައުމީ ޔުނިވަރސިޓީން ހުޅުވި ފަހި ކުތުބުޚާނާގައި ކުރިޔަށް ގެންގޮސްފައިވަނީ މި ސެޕްޓެމްބަރ މަހުގެ 10 ވީ ހޮނިހިރު ހަވީރު 3:45 ން ފެށިގެން ރޭގަނޑު 10:00 އާއި ހަމައަށެވެ.
