ސްރީލަންކާގެ ރައީސް ގޮތަބަޔަ ރާޖަޕަކްސަ ސިންގަޕޫރުން ހިމާޔަތް ހޯއްދަވައިގެން ފުރާވަޑައިގަންނަވަން ނިންމަވައިފިކަމަށް ރިޕޯޓުތައް ބުނެފިއެވެ.
ލަންކާގެ ނޫސްތަކާއި ހަވާލާދީ ރާއްޖޭގެ ބައެއް ނޫސްތަކުގައި ބުނެފައިވަނީ ރައީސް ގޮތަބަޔަ ރާޖަޕަކްސާއަށް ސިންގަޕޫރުން ހިމާޔަތްދޭން އެއްބަސްވެފައިވާ ކަމަށެވެ.
އެހެންނަމަވެސް ރަސްމީ އެއްވެސް އިދާރާއަކުން އެކަން އަދިހާމައެއް ނުކުރެއެވެ.
ސްރީލަންކާގެ ޑެއިލީ މިރާ ގައި ބުނެފައިވަނީ ގޮތަބަޔާ ރާއްޖެއިން ސިންގަޕޫރަށް ވަޑައިގަންނަވާނީ މިރޭގެ ވަގުތެއްގައި ކަމަށެވެ. އަދި އެއީ ވެލާނާ އިންޓަރނޭޝަނަލް އެއަރޕޯޓުން މިރޭ ފުރާ SQ437 ފުލައިޓުން ކަމަށް ވެސް ބައެއް ނޫސްތަކުގައި ބުނެފައިވެއެވެ.
ލަންކާގެ ރައީސް ގޮތަބަޔަ ރާޖަޕަކްސަ އެގައުމުގެ ރައީސްގެ މަގާމުން މިއަދުއިސްތިއުފާ ދެއްވާނެ ކަމަށް ވަނީ ވިދާޅުވެފައެވެ.
އެކަމަކު ފިއްލަވައިގެން ރާއްޖެ ވަޑައިގަތީ ރޭ މެންދަމުގެ ވަގުތެއްގައި ލަންކާގެ އެއަރފޯސްގެ މަތިންދާބޯޓެއްގައެވެ.
އެއީ މަގާމުގައި ހުންނަވަނިކޮށް ހައްޔަރުކުރުން ގާނޫނުއަސާސީ ހުއްދަ ނުދޭތީ، އިސްތިއުފާ ދެއްވުމުގެ ކުރިން ގައުމު ދޫކުރެއްވުމަށެވެ.
ގޮތަބަޔާ ރާއްޖެ ވަޑައިގެންނެވީ އަނބިކަނބަލުން އަދި ދެ ބޮޑީގާޑުންނާއެކު ކަމަށާއި ރާއްޖެ ވަޑައިގެން މިވަގުތު ހުންނެވީ މާލެ ކައިރި ރިސޯޓެއްގައި ކަމަށް ވަނީ މައުލޫމާތު ލިބިފައެވެ.
