އަފްޣާނިސްތާނުގެ އުތުރުގެ މިސްކިތެއްގައި ހުކުރު ދުވަހު ހުކުރު ނަމާދަށް ތިއްބައި ދިން ބޮމުގެ ހަމަލާއެއްގައި 33 މީހުން މަރުވެ، 43 މީހުން ޒަޚަމްވެއްޖެއެވެ. ކުންދޫޒް ޕްރޮވިންސުގެ ގެ ސުންނީ މުސްލިމުންގެ މިސްކިތެއް ކަމުގައިވާ މައުލަވީ ސިކަންދަރު ސޫފީ މިސްކިތަށް ދިން ހަމަލާއަކީ އެ ރަށުގައި ދެ ދުވަހުގެ ތެރޭގައި ދިން ދެވަނަ ހަމަލާއެވެ.
ކުންދޫޒްގެ މިސްކިތަކަށް ދިން ހަމަލާއާއާއެކު ބުރާސްފަތި ދުވަހު އަފްޣާނިސްތާނުގެ އެކި ހިސާބުގައި ދިން 4 ހަމަލާގެ ޒިންމާވެސް އުފުލާފައި ވަނީ އިސްލާމިކް ސްޓޭޓް (އައިއެސް) އިންނެވެ. ބުރާސްފަތި ދުވަހު ދިން އެންމެ ވަރުގަދަ ހަމަލާދީފައި ވަނީ މަޒާރެ ޝަރީފްގެ ޝީޢާ މިސްކިތަކަށެވެ. އެ ހަމަލާގައި 12 މީހުން މަރުވެފައި ވެއެވެ. އެހެންނަމަވެސް، ހުކުރު ދުވަހުގެ ހަމަލާގެ ޒިންމާ އަދި އެއްވެސް ފަރާތަކުން އުފުލާފައި ނުވެއެވެ.
އިމާމް ސާހިބް އަވަށުގައި ހުކުރު ވަގުތު ހަމަލާދިން މިސްކިތަކީ ދީނީ މަދަރުސާއެއްވެސް ހިންގާ މިސްކިތެކެވެ. ޠާލިބާން ސަރުކާރުގެ ޑެޕިއުޓީ ކަލްޗަރ އެންޑް އިންފޯމޭޝަން މިނިސްޓަރ ޒަބީޙުﷲ މުޖާހިދު ވިދާޅުވި ގޮތުގައި މަރުވި އަދި ޒަޚަމްވި މީހުންގެ ތެރޭގައި މަދަަރުސާގެ ދަރިވަރުންވެސް ހިމެނެއެވެ.
"އަހަރުމެން މި ޖަރީމާ އަހަރުމެން ކުށްވެރިކުރަން... އަދި (މި ހަމަލާގެ) ޝިކާރައަކަށްވި މީހުންނަށް އަހަރުމެންގެ ހިތުގެ އަޑިން ތައުޒިޔާކިޔަން." މުޖާހިދު ކުރެެއްވި ޓުވީޓެއްގައި ވެއެެވެ. އޭނާ ސިފަކުރެއްވި ގޮތުގައި ހަމަލާދިން މީހުންނަކީ "ބަޣާވާތަށް ހިތްވަރުދޭ ޖަރީމާ ހިިންގުމުގެ ވިސްނުން ގެންގުޅޭ" މީހުންނެވެެ.
"އެ މިސްކިތުގެ މަންޒަރު ފެނުނީ ވަރަށް ބިރުވެރިކޮށް. އެ މިސްކިތުގައި ނަމާދަށް ތިބި އެންމެންހެން ވަނީ މަރުވެފަ ނުވަތަ ޒަޚަމްވެފަ...." ޒަޚަމްވީ މީހުން ހޮސްޕިޓަލަށް ގެންދިއުމުގައި އެހީތެރިވި މުޙައްމަދު ޢީސާ ކިޔާ މީހަކު ބުންޏެވެ.
"އަހަރެެން ވިއްސަކަށް ތިރީހަކަށް މީހުން ހަށިގަނޑު ދުށިން." މަންޒަރު ދުށް އެހެން މީހަކު ބުންޏެވެ.
ހުކުރު ދުވަހު ދިން ހަމަލާއަކީ ޠާލިބާން ޖަމާއަތުން ވެރިކަމަށް އައި ފަހުން އަފްޣާނިސްތާނުގައި ދިން މިބާވަތުގެ އެންމެ ބޮޑު އެއް ހަމަލާއެވެ. ފާއިތުވި އޮކްޓޯބަރު މަހު ހަމަ ކުންދޫން ޕްރޮވިންސުގެ ޝީޢާ މިސްކިތަކަށް ދިން ހަމަލާއެއްގައި 55 މީހުން މަރުވެފައި ވެއެވެ.
އިސްލާމިކް ސްޓޭޓާއި، ޠާލިބާންއަަކީ ސުންނީ ދެ ޖަމާއަތްކަމުގައި ވެސް ދެ ޖަމާއަތުގެ ދެމެދުގައި ފިކުރީ ބޮޑު ތަފާތުތަކެއް ހުރުމުން އިސްލާމިކް ސްޓޭޓް ޖަމާއަތް ވެފައި ވަނީ އަފްޣާނިސްތާނުގައި ޠާލިބާން ޖަމާއަތަށް ކުރިމަތިވެފައިވާ އެންމެ ބޮޑު ސަލާމަތީ ނުރައްކާ ކަމުގައެވެ. ވެރިކަަމަށް އައިއްސުރު ޠާލިބާން ޖަމާއަތުން ދަނީ އިސްލާމިކް ސްޓޭޓުގެ އަފްޣާން ގޮފި، އިސްލާމިކް ސްޓޭޓް އިން ޚުރާސާން ޕްރޮވިންސް (އައިއެސް-ކޭ) ގެ ހަމަލާތަކާ ކުރިމަތިލަމުންނެެެވެ.
