ޔޫރަޕިއަން ޔުނިއަން (އީޔޫ) ގެ މެންބަރު ގައުމުތަކުގެ ވިޔަފާރިތަކުން ބޭނުންވެއްޖެނަމަ ވަކި ހާލަތްތަކެއްގައި މުސްލިމް އަންހެން މުވައްޒަފުން ބުރުގާއަޅައިގެން ވަޒީފާއަށް ނުކުތުން މަނާކުރެވިދާނެކަމަށް އީޔޫގެ އެންމެ މަތީ ކޯޓުން ނިންމައިިފިއެވެ.
ލަކްސެމްބާގްގައި ހުންނަ ކޯޓް އޮފް ޖަސްޓިސް އޮފް ދަ ޔޫރަޕިއަން ޔުނިއަންގެ ހުުކުމުގައި ބުނެފައިވާ ގޮތުގައި މެންބަރު 27 ގައުމުގެ ކޯޓުތަކުން އެ މައްސަލައާ މެދު ގޮތެއް ނިންމާއިރު ވަޒީފާދޭ ފަރާތުން މުވައްޒަފުން ބުރުގާ އެޅުން މަނާކުރަން ޖެހޭ "ހަގީގީ ސަބަބެއް" އޮތްތޯ ބެލުމުގެ އިތުރަށް، އެގައުމެއްގެ ގާނޫނުތަކަށާއި، ވަކި ދީނެއް އިޚްތިޔާރުކުރުމުގެ މިނިވަންކަމަށްްވެސް ރިއާޔަތްކުރަން ޖެހޭނެއެވެ.
ވަޒީފާދޭ ފަރާތުން ކަސްޓަމަރުންނަށް ވަކިފަރާތަކަށް ނުޖެހޭ ތަސައްވުރެއް ދައްކަން ބޭނުންވުމާއި، ދެބަސްވުން އުފެދޭ ކަަންކަމާ ދުރުވާން ބޭނުންވުން ފަދަ ހާލަތްތަކުގައި ސީޔާސީ، ފަލްސަފީ، ނުވަތަ އަގީދާއާގުޅޭ ޝުއޫރެއް ފާޅުކުރުމުގެ ގޮތުން އެއްޗެއް ލުން (ބުރުގާ ފަދަ އެއްޗެއް އެޅުން) މަނާކުރުން އެއީ އެންމެ ހުއްދަކުރެވިދާނެ ކަމެއް." ކޯޓުގެ ހުކުމުގައި ވެއެވެ.
"އެހެންނަމަވެސް މި ހުއްދަކުރުން ގުޅިފައިވާން ވާނީ ވަޒީފާދޭ ފަރާތުގެ ހަގީގީ ބޭނުމަކާ. އަދި ހައްގުތަކާއި މަސްލަހަތުތައް ވަޒަންކޮށް ބެލުމަށް ފަހު، މެންބަރު ގައުމުތަކުގެ ކޯޓުތަކަށް އެގައުމުތަކުގެ ގައުމީ މަސްލަަހަތާއި، ވަކި ދީނެއް އިޚްތިޔާރުކުރުމުގެ މިނިވަންކަމަށް ރިއާޔަތްކޮށް ގޮތެއް ކަނޑައެޅިދާނެ." އީޔޫގެ ކޯޓުގެ ހުުކުމުގައި ވެއެެވެ.
ބުރުގާއެޅުމުގެ މައްސަލަ ޔޫރަޕްގެ އެންމެ މަތީ ކޯޓަށް ހުށަހެޅީ ބުރުގާއަޅަައިގެން ވަޒީފާއަށް ދާތީ ވަޒީފާއިން ވަކިކުރި ޖަރުމަނު ދެ އަންހެެނެކެވެ.
އެ ދެ އަންހެނުންނަކީ ކުޑަކުދިން ބަލަަހައްޓާ ޑޭ ކެއާ ސެންޓަރެއްގައި ކެއާޓޭކަރެއްގެ ވަޒީފާއަދާކުރި އަންހެނަކާއި، މުލާ ފާމަސީއެެއްގައި ކޭޝިއަރެއްގެ ވަޒީފާއަދާކުރި އަންހެނެކެވެ. އެ ދެ މީހުންވެސް ވަޒީފާއަށް ދާންފެށިއިރު ބުރުގާ ނައަޅައެވެ. އެހެންނަމަވެސް ވިހައިގެން ލިބޭ ޗުއްޓީއަށް ފަހު ދެ މީހުންވެސް އެނބުރި ވަޒީފާއަށް ނުކުތީ ބުރުގާއަޅައިގެންނެެވެ. ދެ މީހުންް ވަޒީފާއަދާކުރާ ދެ ތަނުންނަށް އެމީހުންނަށް އެންގީ ބުރުގާ އަޅައިގެން ނައުމަށެވެ. އަދި އެކަން އެގޮތަށް ނުކުރުމުން ސަސްޕެންޑްކުރުމަށް ފަހު، ފަހުން ވަޒީފާއިން ވަކިކުރީއެވެ.
ޔޫރަޕުގެ ގައުމުތަކުގައި މުސްލިމް އަންހެނުން ބުރުގާ އަޅައިގެން ވަޒީފާއަށް ނުކުތުމުން މައްސަލަތައް ކުރިމަތިވުމަކީ ޒަމާނުއްސުރެ ދިމާވަމުން އަންނަ ކަމެކެވެ. ބައެެއް ގައުމުތަކުގައި އެކަމަށް ފުރުސަތު ދީފައި އޮތްނަަމަވެސް، ބުރުގާއެޅުމަކީ ދީނީ ޝިއާރެއް ކަމަށް ކަނޑައަޅައި ބައެއް ގައުމުތަކުގެ ވަޒީފާދޭ ފަރާތްތަކުން އެކަން މަނާކުރެއެވެ.
ޖަރުމަނުގައި 5 މިލިއަން މުސްލިމުން ދިރިއުޅޭއިރު، މުސްލިމް އަންހެނުންނަށް ބުރުގާއަޅައިގެން ނުކުތުމުގައި ވަޒީފާދޭ ފަރާތްތަކުން ހުރަސްތައް ކުރިމަތިކުރެއެވެ.
