އެމެރިކާއިން ފަލަސްޠީނު މީހުންނަށް އެހީގެ ގޮތުގައި ދެމުން އައި ފައީސާ ކުރީގެ ރައީސު ޑޮނާލްޑް ޓްރަމްޕްގެ ދައުރުގައި ކަނޑާލާފައި ވަނިކޮށް ރައީސު ޖޯ ބައިޑަންގެ ސަރުކާރުން އެ އެހި އަލުން ދޭން ފަށަން ނިންމައިފި ކަމުގައި އިއްޔެ ވައިޓް ހައުސްއިން ބުނެފިއެވެ.
"ކޮންގްރެސް (އެމެރިކާގެ ގާނޫނުހަދާ މަޖިލިސް) އާ ގުޅިގެން މަސައްކަތްކޮށް، އެމެރިކާއިން ފަލަސްޠީނު މީހުންނަށް ދެމުން އައި އިގްތިސާދީ، ތަރައްގީގެ އަދި އިންސާނީ އެހީ ދޭން ފަށަން ނިންމާފައިވާކަން އެމެރިކާ އިއުލާންކުރަނީ އުފަލާއެކު." ސެކްރެޓަރީ އޮފް ސްޓޭޓް (ޚާރިޖީ ވަޒީރު) އެންޓަނީ ބްލިންކެން ނެރުއްވި ބަޔާނެއްގައި ވެއެވެ.
ބްލިންކެން ވިދާޅުވި ގޮތުގައި އަލުން ދޭން ފަަށަން ނިންމި އެހީގެ ތެރޭގައި ހިމެނެނީ ހުޅަނގު އައްސޭރިއާއި ޣައްޒާގެ އިގްތިސާދީ ތަރައްގީއަށް ދޭ 75 މިލިއަން އެމެރިކާ ޑޮލަރާއި، ސުލްހަ ގާއިމުކުރުމަށް ހިންގާ ޕްރޮގްރާމްތަކަށް ދޭ 10 މިލިއަން ޑޮލަރާއި، ފަލަސްޠީނު ރެފިއުޖީންގެ ކަންކަން ބަލަހައްޓާ އިދާރާ، ޔުނައިޓެޑް ނޭޝަންސް ރިލީފް އެންޑް ވާކްސް އެޖެންސީ ފޯ ޕެލެސްޓައިން ރެފިއުޖީސް (އަންރުވާ) އަށް ދޭ 150 މިލިއަން ޑޮަލަރު ހިމެނެއެެެވެ. މިއީ އަހަރަކު އެއްފަހަރު ދޭ އެހީއެކެވެ.
މިއީ ރައީސު ޓްރަމްޕްގެ ދައުރުގައި މުޅިންހެން ކެނޑިފައި އޮތް ގުޅުން ފަލަސްޠީނާއެކު އާކުރުމަށް ކުރެވޭ މަސައްކަތުގެ ބައެއް ކަމުގައި ބެލެވެއެވެ.
"އެމެރިކާއިން ފަލަސްޠީނު މީހުންނަށް އެހީއަކީ އެމެރިކާގެ މުހިއްމު އުސޫލުތަކާއި މަސްލަހަތުތަކަށް ފައިދާކުރާ އެއްޗެއް." ބްލިންކެންގެ ބަޔާނުގައި ވެެއެވެ. "އެއެހީން ނުހަނު ބޮޑަށް ބޭނުންޖެހިފައިވާ ފަރާތްތަކަށް ލުއި ލިބިދި، އިގްތިސާދީ ތަރައްގީ ކުރިއަރުވައި، ފަލަސްޠީނާއި އިސްރާއީލާ ދެމެދު ގުޅުން ރަނގަޅުކޮށް، ސަލާމަތީ ކަންކަން ރަނގަޅުކޮށް، ހަމަޖެހުން ދަމަހައްޓައިދޭ."
އަންރުވާއިން ވެސް ވަނީ އެމެރިކާގެ އެހީ އަލުން ދޭން ފަށަން ނިންމުމުން އެކަމަށް މަރުހަބާކިޔާފައެވެ.
"މެދުއިރުމަތީގައި އެންމެ ދަތި ހާލުގައި ތިބި ރެފިއުޖީންނަށް އެހީތެރިވެދިމުނުގައި އެމެެރިކާ އަނެއްކާވެސް ބައިވެރިއަކަށްވުރެ ވަކިން ބޮޑަށް އުފާވާނެ ކަމެއް ނުއޮންނާެނެ." އަންރުވާގެ ކޮމިޝަނަރ ޖެނެރަލް ފިލިޕޭ ރަޒާރިނީ ނެރުއްވި ބަޔާނެއްގައި ވެއެވެ.
ރައީސު ބައިޑަން ވަނީ އޭނާގެ ދައުރުގައި ކުރީގެ ރައީސު ޓްރަމްޕްގެ ސިޔާސަތާ މުޅިން ތަފާތު ސިޔާސަތެއް ފަލަސްޠީނާމެދު ގެންގުޅޭނެކަން ހާމަކޮށްފައެވެ.
