އަވައްޓެރި ސްރީލަންކާގައި ދިރިއުޅެމުން އަންނަ ދިވެހިންނަށް ޚާއްސަކޮށްގެން މޮބައިލް އެޕްލިކޭޝަނެއް ހަދަން ލަންކާގައި ހުންނަ ދިވެހި އެމްބަސީން ނިންމައިފިއެވެ.
ލަންކާގައި ހުންނަވާ ދިވެހި ސަފީރު މުޙަންމަދު ޙުސައިން ޝަރީފް ސަފީރުކަމުގެ ފަތްކޮޅު ލަންކާގެ ރައީސަށް އެރުއްވިތާ މާގިނަ ދުވަހެއްނުވެ މިގޮތަށް ނިންމެވުމަށް ފަހު ވިދާޅުވީ ދިވެހިންނަށް ޚާއްސަ މޮބައިލް އެޕެއް ތައްޔާރުކޮށް މިއަހަރު ނިމުމުގެ ކުރިން ބޭނުންކުރަންވެސް ފެށޭނެ ކަމަށެވެ.
މުންދު ވިދާޅުވީ އެޕްލިކޭޝަން ބޭނުން ކުރަނީ ދިވެހި ބަހުން ކަމަށެވެ. މި އެޕްގައި ދިވެހި އެމްބަސީންނާއި ސޯސަންގެއިން ލިބެން ހުންނަ ޚިދުމަތްތަކާއި ލަންކާގެ ގާނޫނާއި ގަވައިދުތައްވެސް ހިމެނޭނެ ކަމަށް މުންދު ވިދާޅުވިއެވެ. މުންދު ވިދާޅުވީ ދިވެހި އެމްބަސީންނާއި ސޯސަންގެއިން ލިބެން ހުންނާނެ ޚިދުމަތްތަކާއި އެދެތަނުން ކުރާ ވަރަށްގިނަ ކަންކަމުގެ މައުލޫމާތު އެޕްލިކޭޝަން ބޭނުން ކުރެވޭވަރު ވުމުން އެނގިގެންދާނެ ކަމަށެވެ.
މުންދު ވިދާޅުވީ އެ އެޕްލިކޭޝަނުން ލަންކާގައި ދިރިއުޅޭ ދިވެއްސަކު ނިޔާވިޔަސް އެކަމުގެ މައުލޫމާތު ދުވަހުން ދުވަހަށް ލިބޭނެ ގޮތް ހައްދަވާނެ ކަމަށެވެ.
"އޭރުން ފަސޭހަވާނެ ދިވެއްސެއްގެ ޖަނާޒާގައި ބައިވެރިވާންވެސް، ދިވެއްސަކު ނިޔާ ވެއްޖެއްޔާ އޭރުން އެނގެން ހުންނާނެ" ސަފީރު ވިދާޅުވިއެވެ.
މުންދު ވިދާޅުވީ ކުރިޔަށް އޮތްތަނުގައިވެސް ލަންކާގައި ދިރިއުޅެމުން އަންނަ ދިވެހިންނަށް ލުއިފަސޭހަ ކޮށްދިނުމުގެ ގޮތުން ތަފާތު ކަންތައްތަކާއި ހަރަކާތްތައްވެސް އެމްބަސީން ކުރިޔަށް ގެންދާނެ ކަމަށެވެ.
