'ލީޑާސް ސަމިޓް އޮން ކްލައިމެޓް' ގެ ނަމުގައި އެމެރިކާގެ ރައީސު ޖޯ ބައިޑަން ބާއްވަވާ އެންމެ އިސްވެރިންގެ އޮންލައިން ބައްދަލުވުމުކަށް 40 ގައުމެއްގެ ވެރިންނަށް ދައުވަތު ދީފިއެވެ.
ވައިޓް ހައުސްއިން އިއްޔެ ނެރުނު ބަޔާނެއްގައި ވާގޮތުން މިބައްދަލުވުން އޮންނާނީ އަންނަ އެޕްރީލް މަހުގެ 22 އިން 23 އަށެވެ.
ރައީސު ބައިޑަން ދައުވަތުދެއްވި ބޭފުޅުންގެ ތެރޭގައި އޭނާ އެންމެ ބޮޑަށް ފާޑުވިދާޅުވަމުން ގެންދަވާ ބޭފުޅުން ކަމުގައިވާ ޗައިނާގެ ރައީސު ޝީ ޖިންޕިންގްއާއި ރަޝިޔާގެ ރައީސު ވްލާޑިމީރް ޕުޓިން ހިމެނިވަޑަައިގަންނަވައެވެ.
"އެބޭފުޅުންނަށް އެނގިވަޑައިގަންނަވާނެ އެބޭފުޅުންނަށް ދައުވަތު އެރުވިފައިވާކަން. އެހެންނަމަވެސް އަހަރެން އެ ދެބޭފުޅުންކުރެ ބޭފުޅަކާ އަދި ވާހަކަ ނުދައްކަން" ޒީ އަދި ޕުޓިންއާ ބެހޭގޮތުން ރައީސު ބައިޑަން ވިދާޅުވިއެވެ.
"މި ބައްދަލުވުމުގެ ސަބަބުން މޫސުމާ ގުޅޭގޮތުން އިތުރަށް ވަރުގަދަ ފިޔަވަޅު އެޅުމުގެ އިގުތިސާދީ ފައިދާއާއި، އެކަން އަވަހަށްކުރުމުގެ މުހިއްމުކަން ހާމަވެގެންދާނެ." ވައިޓް ހައުސްގެ ބަޔާނުގައި ވެއެވެ.
ބައިޑަންގެ ސަަރުކާރުގެ ބޭނުމަކީ ނޮވެންބަރު މަހު ސްކޮޓްލޭންޑްގެ ގްލާސްގޯގައި ބޭއްުވުމަށް ހަަަމަޖެހިފައިވާ ޔުނައިޓެޑް ނޭޝަންސް ކްލައިމެޓް ޗޭންޖް ކޮންފަރެންސުގެ ކުރިން މޫސުމާ ގުޅޭ މުހިއްމު ފިޔަވަޅުތަކެއް އެޅުމެވެ.
އެޕްރީލް މަހުގައި ބާއްވާ ބައްދަލުވުމުގެ ކުރިން އެމެރިކާއިން ޖައްވަށްދޫކުރާ ތިމާވެށްޓަށް ގެއްލުން ހުރި ގޭސްތައް މަދުކުރުމަށް ވަރަށް އުއްމީދީ ލަނޑުދަނޑިތަކެއް ކަނޑައަަޅާނެއް ކަމަށް ވައިޓް ހައުސްގެ ބަޔާނުގައި ބުނެފައިވާ އިރު، އެބަޔާނުގައި އިތުރަށް ބުނެފައިވާ ގޮތުގައި ދުނިޔޭ އެެެހެން ގައުމުތަކުގެ ވެރިންވެސް އެބޭފުޅުންގެ ގައުމުތަކުން މޫސުމާ ގުޅޭގޮތުން ކުރާނެ ކަންކަން ކަނޑައެޅުއްވުމަކި ރައީސު ބައިޑަންގެ އުއްމީދެކެވެ.
ރައީސު ބައިޑަން ބާއްވަވާ ވާޗުއަލް ސަމިޓަށް ދައުވަތުދެއްވާފައިިވާ ބޭފުޅުން ތެރޭގައި ޖައްވަށް ދޫކުރާ ވިހަގޭހުގެ %86 ހިއްސާކުރާ 17 ގައުމެއްގެ ވެރިން ހިމެނިވަަޑައިގަންނަވާއިރު، މޫސުމަށް އަންނަ ބަދަލުތަކުގެ ގެެއްލުން އެންމެ ބޮޑަށް ލިބޭނެ ބައެއް ގައުމުތަކުގެ ވެރިންވެސް ހިމެނިވަޑައިގަންނަވައެވެ.
ބައިޑަންގެ ކުރިން ރައީސުކަމުގައި ހުންނެވި ޑޮނާލްޑް ޓްރަމްޕް ތިމާވެށްޓާ ދެކޮޅު ސިޔާސަތެއް ގެންގުޅުއްވައި، ޕެރިސް ކްލައިމެޓް އެކޯޑުން އެމެރިކާ ވަކިކުރައްވާފައި ވިޔަސް، ރައީސު ބައިޑަން ނިންމަވާފައިވަނީ ތިމާވެށްްޓާ ރައްޓެހި ސިޔާސަތެއް ގެންގުޅުއްވުމަށެވެ. އަދި އޭނާ ވަނީ ޕެރިސް އެކޯޑުގައި އެމެރިކާ އަލުން ބައިވެރިކުރައްވާފައެވެ.
