ރައްޔިތުންގެ މަޖިލީހަށް ސަރުކާރުން ހުށަހެޅި ސަޕްލިމެންޓްރީ ބަޖެޓަށް ކޮމިޓީ މަރުޙަލާގައި ކޮމަންޑޫ ދާއިރާގެ މެމްބަރު އަޙްމަދު ނާޝިދު (އޭޑީކޭ ނާޝިދު ) އާއި މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ ޝަރީފް ) ވޯޓު ދެއްވުމުން އެކަން މީޑިޔާ ތަކުން ގެނެސްދިނީ ޙަގީގަތާ ޚިލާފަށް ކަމަށް މަޖިލީހުގެ ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވިދާޅުވެއްޖެއެވެ.
އޭޑީކޭ ނާޝިދާއި މަވޯޓާ ޝަރީފް ބަޖެޓް ކޮމިޓީގައި ސަޕްލިމެންޓްރީ ބަޖެޓަށް ވޯޓު ދެއްވީ އެމްޑީޕީން ބަޖެޓް ޖަލްސާ ބޮއިކޮޓްކޮށް ތްރީލައިން ވިޕެއް ނެރެފައި ވަނިކޮށް ޕާޓީން ނިންމި ނިންމުމާ ޚިލާފަށް ކަމަށް ދޭހަވާގޮތަށް ބަޔެއް މީޑިޔާ ތަކުގައި ބުނެފައިވާތީ އެވާހަކަ ތަކަށް ރައްދު ދެއްވައި އެމްޑީޕީގެ މެމްބަރުން ހިމެނޭ ވައިބާ ގްރޫޕެއްގައި އީވާ ވިދާޅުވެފައި ވަނީ އެކަމާބެހޭ ގޮތުން "ބަޔެއް ނޫސްތަކުގައި ލިޔެފައި ވަނީ ތެދު ޚަބަރެއްނޫން" ކަމަށެވެ.
އީވާ ވިދާޅުވެފައި ވަނީ ކޮމިޓީގައި ސަޕްލިމެންޓްރީ ބަޖެޓަށް ވޯޓު ދިނުމާއި ބެހޭގޮތުން އެމްޑީޕީން ތްރީލައިން ވިޕެއް ނެރެފައި ނުވާނެ ކަމަށާއި އެމްޑީޕީން ތްރީލައިން ވިޕެއް ނެރުނީ މަޖިލީހުގައި ބަޖެޓަށް ވޯޓު ދިނުމާބެހޭ ގޮތުން އެކަނި ކަމަށެވެ. އެހެންކަމުން ސަޕްލިމެންޓްރީ ބަޖެޓުގެ ވޯޓުގައި އެމްޑީޕީގެ އެއްވެސް މެމްބަރަކު ޕާޓީން ނިންމި ނިންމުމާ ޚިލާފު ވެފައިނުވާ ކަމަށްވެސް އީވާ ވަނީ ވިދާޅުވެފައެވެ.
"ޝަރީފް އާ އޭޑީކޭ ނާޝިދުއާ ބެހޭގޮތުން ނޫސްތަކުގައި ލިޔެފައި ވަނީ ތެދު ޚަބަރެއްނޫން، ކޮމިޓީގައި ވޯޓު ލުމަށް ވިޕްލައިނެއް ނުނެރޭ، ޕާޓީން ވިޕްލައިން ނެރުނީ މިއަދުގެ ވޯޓާ ބެހޭގޮތުން، އެމްޑީޕީގެ އެއްވެސް މެމްބަރެއް މިއަދުގެ ވޯޓުގެ ވިޕްލައިންއާ ޚިލާފެއްނުވޭ" އީވާ ވިދާޅުވެފައިވެއެވެ.
ސަރުކާރުން ހުށަހެޅި 493 މިލިއަން ރުފިޔާގެ ސަޕްލިމެންޓްރީ ބަޖެޓަށް ވޯޓު ނުދިނުމަށް އިދިކޮޅު އެމްޑީޕީ އާއި ޖޭޕީގެ އިތުރުން އަދާލަތު ޕާޓީން އޮތީ ނިންމާފައެވެ. މިއަދު ސަޕްލިމެންޓްރީ ބަޖެޓް މަޖިލީހުން ފާސްކޮށްފައި ވަނީ ސަރުކާރަށް ތާއީދު ކުރައްވާ 39 މެމްބަރުންގެ ވޯޓުންނެވެ. މަޖިލީހުން ބަޖެޓް ފާސްކޮށްފައި ވަނީ ސަރުކާރުން 
ހުށަހެޅި ގޮތަށް އެއްވެސް ބަދަލެއް ނުގެނެސްއެވެ. ކޮމިޓީންވެސް ބަޖެޓް ފާސްކުރީ ހުށަހެޅިއިރު އޮތް ގޮތަށެވެ.
މިއަދު ފާސްކުރި ބަޖެޓުން 330 މިލިއަން ރުފިޔާ އޮތީ އެންސްޕާ އަދި އާސަންދައިގެ ޚިދުމަތަށް އަމާޒު ކޮށްފައެވެ. އެއީ އެންސްޕާއިން ފޯރުކޮށް ދެމުން އަންނަ ސިއްޙީ ކަންކަމަށެވެ. މީގެއިތުރުން ރައްޔިތުންގެ މަޖިލީހުން ހުސްވެފައިވާ ގޮނޑިތަކުގެ ބައި އިލެކްޝަންއަށްވެސް ވަނީ 26 މިލިއަން ރުފިޔާ ޖަހާފައެވެ. ސްކޫލްތައް ޑިޖިޓަލައިޒް ކުރުމަށް 63 މިލިއަން ރުފިޔާ އަދި ކާޑެއްދޫ އެއާޕޯޓަށް ބޭނުންވާ 40 މިލިއަން ރުފިޔާގެ އިތުރުން އެހެނިހެން ޚަރަދުގެ ގޮތުގައިވެސް ފާސްކުރި ސަޕްލިމެންޓްރީ ބަޖެޓުގައި ވަނީ 27 މިލިއަން ރުފިޔާ ހިމަނާފައެވެ.
