ސަރުކާރުން ރައްޔިތުންގެ މަޖިލީހަށް ހުށަހެޅި ސަޕްލިމެންޓްރީ ބަޖެޓް ރައްޔިތުންގެ މަޖިލީހުން މިއަދު ފާސްކޮށްފިއެވެ.
މަޖިލީހުގެ ބަޖެޓް ކޮމިޓީންވެސް ފާސްކޮށް މިއަދު މަޖިލީހުގެ ޖަލްސާއަށް ހުށަހެޅި 493 މިލިއަން ރުފިޔާގެ ސަޕްލިމެންޓްރީ ބަޖެޓް މަޖިލީހުން ފާސްކުރީ 39 ވޯޓާއެކުގައެވެ.
ރައްޔިތުންގެ މަޖިލީހުން މިއަދު ސަޕްލިމެންޓްރީ ބަޖެޓް ފާސްކޮށްފައި ވަނީ ފިނޭންސް މިނިސްޓަރު ބަޖެޓް ހުށަހެޅުއްވިއިރު އޮތް ގޮތަށެވެ. ކޮމިޓީންވެސް ފާސްކުރީ ހުށަހެޅި ގޮތަށް އެއްވެސް ބަދަލެއް ނުގެނެހެވެ. ބަޖެޓް ކޮމިޓީން ބަޖެޓް ފާސްކުރިއިރު އިދިކޮޅު އެމްޑީޕީގެ ދެ މެމްބަރުންވެސް ވަނީ ބަޖެޓް ކޮމިޓީން ފާސްކުރަން ވޯޓު ދެއްވާފައެވެ.
އިދިކޮޅު ޕާޓީ ތަކުން ބަޖެޓާ ދެކޮޅަށް ތިބިއިރު ސަރުކާރުން ހުށަހެޅި ސަޕްލިމެންޓްރީ ބަޖެޓް މިއަދު ފާސްކުރިއިރު 330 މިލިއަން ރުފިޔާ އޮތީ އެންސްޕާއަށް އަމާޒު ކޮށްފައެވެ. އެއީ އެންސްޕާއިން ފޯރުކޮށް ދެމުން އަންނަ ސިއްޙީ ކަންކަމަށެވެ. މީގެއިތުރުން ރައްޔިތުންގެ މަޖިލީހުން ހުސްވެފައިވާ ގޮނޑިތަކުގެ ބައި އިލެކްޝަންއަށްވެސް ވަނީ 26 މިލިއަން ރުފިޔާ ޖަހާފައެވެ. ސްކޫލްތައް ޑިޖިޓަލައިޒް ކުރުމަށް 63 މިލިއަން ރުފިޔާ އަދި ކާޑެއްދޫ އެއާޕޯޓަށް ބޭނުންވާ 40 މިލިއަން ރުފިޔާގެ އިތުރުން އެހެނިހެން ޚަރަދުގެ ގޮތުގައިވެސް ފާސްކުރި ސަޕްލިމެންޓްރީ ބަޖެޓުގައި ވަނީ 27 މިލިއަން ރުފިޔާ ހިމަނާފައެވެ.
މީގެއިތުރުންވެސް ފިނޭންސް މިނިސްޓަރ މުނައްވަރު ހުށަހެޅުއްވި ބަޖެޓުގައި ބަޔެއް ޤާނޫނު ތަކަށް ބަދަލު ގެނައުމަށް ވެސް ބަޖެޓުގައި ވަނީ ހިމަނާފައެވެ. އެގޮތުން ރެވެނިއު ސްޓޭމްޕްގެ ގާނޫނާއި ޓެކްސްއާބެހޭ ބަޔެއް ގާނޫނު ތަކަށް ބަދަލު ގެނެސްގެންވެސް 268 މިލިއަން ރުފިޔާ އާންމުދަނީއެއް ހޯދުމަށްވެސް ބަޖެޓުގައި ވެއެވެ.
