ރައީސް އަބްދުﷲ ޔާމީންގެ ރިޔާސީ ދެދައުރު ނިމޭއިރު ރައްޔިތުން ހިތްހަމަޖެހޭވަރުގެ މަސައްކަތްތަކެއް ކުރެވިފައި އޮންނާނެ ކަމަށް އެމަނިކުފާނު ވިދާޅުވެއްޖެއެވެ.
ރ. އަތޮޅަށް ކުރެއްވި ދަތުރުފުޅުގައި ރައީސް ވިދާޅުވި ރިޔާސީ ދެދައުރަކީ މިހާރު ކުރިޔަށްދާ ފަސް އަހަރުގެ ދައުރާއި ކުރިޔަށް އޮތް ފަސް އަހަރުގެ ދައުރެވެ. ކުރިޔަށް އޮތް ރިޔާސީ އިންތިޚާބުގައި ރައީސް ޔާމީން ނުކުމެވަޑައިގަތުމަށް އެމަނިކުފާނުގެ ޓީމުން ދަނީ ކެމްޕޭން ކުރަމުންނެވެ.
ރައީސް ވިދާޅުވީ އެމަނިކުފާނު ރައްޔިތުންގެ ކައިރިއަށް ވަޑައިގަންނަވަނީ ކުރެހުމެއް ހިއްޕަވައިގެން ކަމަށާއި އެ ކުރެހުމުގައި ކުލަ ޖައްސަން ތިބި ބަޔަކީ ރައްޔިތުން ކަމަށެވެ. އެގޮތުން 2013 ވަނަ އަހަރަށް އެމަނިކުފާނު ކުރެއްސެވި ކުރެހުމުގައި ކުލަޖެހި ނިމިފައިވާ ކަމަށްވެސް ވިދާޅުވިއެވެ.
ރ. އަތޮޅަށް ރައީސް ކުރެއްވި ދަތުރުފުޅުގައި އެއަތޮޅު މަޑުއްވަރީ އާއި މީދޫ އަދި ފައިނަށް ވަޑައިގެން ވަނީ އެރަށްރަށުގައި ތަރައްގީގެ ބަޔެއް މަޝްރޫއުތައްވެސް ފައްޓަވައި ދެއްވާފައެވެ. އެގޮތުން ފެނާއި ނަރުދަމާގެ ނިޒާމާއި ބަނދަރުގެ ޚިދުމަތާއި މިސްކިތް ހުޅުވުން ހިމެނެއެވެ.
