އަލަށް ޓެކްސީ ކުރުމުގެ ހުއްދައަށް އެދުނު 42 ޓެކްސީ ޑްރައިވަރުންނާ ފުލުހުން ބައްދަލުކޮށް އެފަރާތްތަކަށް ހޭލުންތެރި ކުރުމުގެ ގޮތުން ޕްރޮގްރާމެއް ބާއްވައިފިއެވެ.
މިމަހުގެ 15 ވަނަ ދުވަހުން ފެށިގެން 17 ވަނަ ދުވަހުގެ ނިޔަލަށް ޣިޔާސުއްދީން އިންޓަރނޭޝަނަލް ސްކޫލު ހޯލުގައި ކުރިއަށްދިޔަ މި ޕްރޮގްރާމަކީ ޓްރާންސްޕޯޓް އޮތޯރިޓީ އާއި ޓްރެފިކް މެނޭޖްމަންޓް ޑިޕާޓްމަންޓް އަދި ޓެކްސީ ސެންޓަރުތައް ގުޅިގެން އަލަށް ޓެކްސީ ކުރުމުގެ ހުއްދައަށް އެދިފައިވާ ފަރާތްތައް ޤާނޫނާއި ޤަވާޢިދަށް ހޭލުންތެރި ކުރުމުގެ ގޮތުން ކުރިއަށް ގެންދިޔަ ޕްރޮގްރާމެކެވެ.
މި ޕްރޮގްރާމުގައި އެއްގަމު ދަތުރުފަތުރުގެ ޤާނޫނާއި އެޤާނޫގެ ދަށުން ހެދިފައިވާ ޤަވައިދުތަކާއި މަގުމަތީގެ ޤަވައިދުތަކާއި ޓެކްސީ ކުރާ ފަރާތްތަކަށް ޓެކްސީ ކުރުމުގައި ދިމާވާ ދަތިތަކާއި، އެކަންކަން ހައްލުކުރެވޭނެ ގޮތްތަކާއި، ޓެކްސީ ޕާކްކުރުމުގެ އުސޫލްތަކުގެ އިތުރުން ޓެކްސީ ކުރުމުގައި ރައްކާތެރި ގޮތްތަކާ ގުޅޭގޮތުން ޓެކްސީ ކުރާ ފަރާތްތަކަށް މަޢުލޫމާތުދީ ހޭލުންތެރި ކުރުވާފައިވެއެވެ.
މި ޕްރޮގްރާމުގައި އަލަށް ޓެކްސީ ކުރުމުގެ ހުއްދައަށް އެދިފައިވާ 42 މީހަކު ބައިވެރިވެފައިވާއިރު މި ޕްރޮގްރާމުގައި މަޢުލޫމާތު ދީފައިވަނީ ޓްރެފިކް މެނޭޖްމަންޓް ޑިޕާޓްމަންޓުގެ ޜޯޑް ސޭފްޓީ ޔުނިޓުގައި މަސައްކަތްކުރާ، މިފަދަ ޕްރޮގްރާމްތައް ހިންގުމުގެ ތަޖުރިބާހުރި ފުލުހުންނެވެ.
މި ޕްރޮގްރާމު ކުރިއަށް ގެންދިއުމުގައި ޓްރާންސްޕޯޓް އޮތޯރިޓީ އާއި ޓްރެފިކް މެނޭޖްމަންޓް ޑިޕާޓްމަންޓް އަދި ޓެކްސީ ސެންޓަރު ތަކުގެ އިތުރުން އަލަށް ޓެކްސީ ކުރާ ފަރާތްތަކުގެ އެއްބާރުލުން ފުލުހުންނަށް ލިބިފައިވެއެވެ.
