ކުރިޔަށް އޮތް ރިޔާސީ އިންތިޚާބަށް "ހުރިހާ ގޮތަކުން ހިސާބު ޖެހީމާވެސް" ކުރީގެ ރައީސް މުޙަންމަދު ނަޝީދަށް އިންތިޚާބުގައި ކުރިމަތި ނުލެއްވޭނެ ކަމަށް ޕީޕީއެމްގެ ޕާލިމެންޓްރީ ގްރޫޕްގެ ލީޑަރ ވިލިމާލޭ ދާއިރާގެ މެމްބަރު އަޙްމަދު ނިހާން ޙުސައިން މަނިކު ވިދާޅުވެއްޖެއެވެ.
ނިހާން ކުރެއްވި ޓްވީޓެއްގައި ވިދާޅުވީ ކުރީގެ ރައީސް މުޙަންމަދު ނަޝީދަށް ދެން ރާއްޖޭގެ ވެރިކަން ނުކުރެއްވޭނެކަން "ސައިންޓިފިކް އުސޫލު ތަކުންވެސް ވާނީ ކަށަވަރު ވެފައި ކަމަށެވެ. ނިހާން މިހެން ވިދާޅުވިއިރު އެމްޑީޕީގެ ބަޔެއް އިސްބޭފުޅުން ވިދާޅުވެފައި ވަނީ 2018 ގެ ރިޔާސީ އިންތިޚާބުގައި ނަޝީދުގެ ނަން ވޯޓު ކަރުދާހުގައި އޮންނާނެކަން ވަރަށް ބޮޑަށް ކަށަވަރު ކަމަށެވެ.
ނަޝީދު މިއަދު ވިދާޅުވެފައި ވަނީ ކުރިޔަށް އޮތް 2018 ގެ ރިޔާސީ އިންތިޚާބު ކާމިޔާބު ކުރުމަށްޓަކައި އިދިކޮޅު ހުރިހާ ޕާޓީއަކުން އެއްކެންޑިޑޭޓު ނެރުން މުހިންމު ކަމަށާއި ނަމަވެސް އެބޭފުޅަކު ވާންޖެހޭނީ އިންތިގާލީ ރައީސަކަށް ކަމަށެވެ. ނަމަވެސް 2018 ގެ އިންތިޚާބުގައި ނަޝީދު ވާދަކުރެއްވުމާއިބެހޭ ގޮތުން ވަކިއެއްޗެއް ވިދާޅުނުވެއެވެ.
ރައީސް ނަޝީދު މިވަގުތު ހުންނެވީ ތޭރަ އަހަރުގެ ޖަލު ޙުކުމެއްގައެވެ. ނަމަވެސް ބޭސްފަރުވާއަށް ލަންޑަނަށް ވަޑައިގެންނެވި ނަޝީދު މިވަގުތު ހުންނެވީ އަވައްޓެރި ސްރީލަންކާގައެވެ.
