ކުރިޔަށް އޮތް 2018 ވަނަ އަހަރުގެ ރިޔާސީ އިންތިޚާބުގައި ރައީސް އަބްދުﷲ ޔާމީން ބަލި ކުރެއްވުމަށް ނުކުންނަ ރިޔާސީ ކެންޑިޑޭޓް ވާންޖެހޭނީ އިދިކޮޅު ހުރިހާ ޕާޓީތަކުން ގުޅިގެން ނެރޭ ކެންޑިޑޭޓަކަށް ކަމަށާއި އެބޭފުޅަކު ވާންޖެހޭނީ އިންތިގާލީ ރައީސަކަށް ކަމަށް ކުރީގެ ރައީސް މުޙަންމަދު ނަޝީދު މިއަދު ވިދާޅުވެއްޖެއެވެ.
ރައީސް ނަޝީދު އެމްޑީޕީގެ ގައުމީ މަޖިލީހަށް ފޮނުއްވި މެސެޖެއްގައި ވިދާޅުވީ 2018 ގެ ރިޔާސީ އިންތިޚާބު އިދިކޮޅު ކެންޑިޑޭޓް ކާމިޔާބު ކުރެއްވުމަށް ފަހު އިންތިގާލީ ރައީސްގެ މައިގަނޑު މަސައްކަތްޕުޅަކަށް ވާންޖެހޭނީ ޖުޑިޝަރީ އާއި ދެންވެސް އިސްލާޙު ކުރަން ޖެހޭ ކަންކަން އިސްލާޙުކޮށް، އާ ރިޔާސީ އިންތިޚާބަކަށް މަގުފަހިކޮށް، އާ އިންތިޚާބު ބޭއްވުން ކަމަށެވެ.
ނަޝީދު ވިދާޅުވީ ކުރިޔަށްއޮތް ރިޔާސީ އިންތިޚާބު މިނިވަން އިންސާފަކަށް ވެދާނެތޯ ނުވަތަ ނޫންތޯ ދަންނަވަން އަދި ނޭނގޭނެ ކަމަށާއި ރިޔާސީ އިންތިޚާބު ބޯމަތި ވަމުން އަންނައިރު މިނިވަން އިންތިޚާބެއް ގެންނަން މަސައްކަތް ކުރަންޖެހޭނެ ކަމަށެވެ. ކުރިޔަށް އޮތް ރިޔާސީ އިންތިޚާބުގައި އިދިކޮޅު ފަރާތްތަކުން ގުޅިގެން ނެރޭ ކެންޑިޑޭޓަކީ އިންތިގާލީ ރައީސަކަށް ވާންޖެހޭނެ ކަމަށް ރައީސް ނަޝީދު ވިދާޅުވި ނަމަވެސް އެހެން ޕާޓީއެއްގެ ލީޑަރުން ރިޔާސީ އިންތިޚާބަށް ކެންޑިޑޭޓަކު ނެރުމާމެދު ވަކިއެއްޗެއް ވިދާޅުނުވެއެވެ.
އަދި މިހާތަނަށް 2018 ގެ ރިޔާސީ އިންތިޚާބަށް ކެންޑިޑޭޓަކު ދައްކައިގެން މަސައްކަތް ކުރާތަން ފެންނަނީ ޕީޕީއެމުންނެވެ. އެޕާޓީން މިހާރުގެ ރައީސް އަބްދުﷲ ޔާމީން ރިޔާސީ އިންތިޚާބަށް ނުކުންނެވުމަށް ކެމްޕޭން ކުރިނަމަވެސް އިދިކޮޅު ޕާޓީތަކުގެ އިސްސަފުގައި ތިއްބެވި ބޭފުޅުން ބަންދުތަކުގައި ތިބުމުން އިދިކޮޅު ލީޑަރުންގެ ހަރަކާތްތައް މިވަގުތު ވަނީ ކޮންމެވެސް ވަރަކަށް މަޑުޖެހިލާފައެވެ.
