އުމުރުން ދުވަސްވީ މީހުންނާއި ފުއްޕާމޭގެ ބަލިމީހުން މިސްކިތްތަަކަށް ނުދިއުމަށް އަންގައިފި

އުމުރުން ދުވަސްވީ މީހުންނާއި ފުއްޕާމޭގެ ބަލިމީހުން މިސްކިތްތަަކަށް  ނުދިއުމަށް މިނިސްޓްރީ އޮފް  އިސްލާމިކް އެފެއާޒުން އަންގަވައިފިއެވެ. 

މިކަން އަންގައިފައިވަނީ ކޯވިޑް- 19 އާގުޅިގެން މިސްކިތްތަކަށް ދާ  މީހުން އަމަލުކުރަން ޖެހޭ ގޮތް ބަޔާންކޮށް އެ މިނިސްޓްރީން ނެރެފައިވާ ނޫސްބަޔާނެއްގައެވެ. މިސްކިތްތަކަށް ނުދިއުމަށް އިރުޝާދު ދީފައިވާ  އިތުރު މީހުންގެ ތެރޭގައި ހުންއައިސް ރޯގާޖެހި ކެއްސާމީހުންވެސް ހިމެނެއެވެ. 

މިސްކިތަށް ނަމާދަށްދާ މީހުން ސަމާލުކަންދޭންވީ ކަންތައްތައް:

* ގެއިން ވުޟޫ ކޮށްގެން މިސްކިތަށް ދިއުން.

* މުސައްލައެއް ގެންދިއުމާއި އެމީހެއްގެ މުސައްލައިގައި ނޫނީނަމާދު ނުކުރުން

* މާސްކު އެޅުން.

*  މިސްކިތަށް ވަނުމުގައި އަދި ނުކުތުމުގައި ގައިދުރުކަން ބެހެއްޓުން.

*މިސްކިތައް ވަނުމަށްފަހު އެކިތަންތަނުގައި ތިބުމުގެ ބަދަލުގައިި ފުރަތަމަ ސަފުން ފެށިގެން  ފުރަމުން ގެންދިއުން.

* ނަމާދު ނިމުމަށްފަހު މިސްކިތުގައި މަޑު ނުކުރުން.

* ފުއްޕާމޭގެ ބަލި މީހުންނާއި އުމުރުން ދުވަސް ވެފައިވާ މީހުނާއި ހުންއައިސް ރޯގާޖެހި ކެއްސާމީހުންވެސް މިސްކިތަށް ނުދިއުން.

* މިސްކިތުގައި އަދި މިސްކިތުން ބޭރުގައިވެސް އަތާ އަތް ޖޯޑުކޮށް ސަލާމް ކުރުން ފަދަ ކަންކަން ދުރުހެލިވުން.

* މިސްކިތުގައިވާ ހަތިމުތައް ބޭނުން ނުކުރުން.

ކޯވިޑުން ރައްކާތެރި ވުމަށް އެޗްޕީއޭ އިން އެކުލަވާލައިފައިވާ އުޞޫލުތަކާ އެއްގޮތަށް ޢަމަލުތައް ބެހެއްޓުމަށް ވެސް އިސްލާމިކް މިނިސްޓްރީގެ ނޫސްބަޔާނުގައި ވަނީ އިލްތިމާސް ކޮށްފައެވެ.