ގއ. ވިލިނގިއްޔާ ޖެހިގެން އެއްފަޅެއްގައި އޮތް ފަޅުރަށެއް ކަމަށްވާ ރައިވެއްރެހާއަށް މޫދަށް އެރިލަން ގޮސް އުޅެނިކޮށް އަނބިމީހާއާއެކު ގެނބިގެން އިއްޔެ މަރުވި މުޙަންމަދު ހަނީފުގެ ހަށިގަނޑު މޫދު އަޑިން ނެގިއިރު ދުއްވަން ގެންގުޅޭ ސައިކަލްގެ ތަޅުދަނޑި އޭނާގެ މުށުތެރޭގައި "ތާށިވެފައި" އޮތް ކަމަށް ވިލިނގިލީ މީހަކު ބުނެފިއެވެ.
ވިލިނގިލިން މައުލޫމާތު ދިންމީހަކު ބުނީ ހަނީފުގެ ހަށިގަނޑު މޫދު އަޑިން ނެގިއިރުވެސް އޭނާ އޮތީ މަރުވެފައި ކަމަށާއި އޭނާގެ އަތްފައިވެސް އޮތީ "ހަރުވެ ދަނޑިވެފައި" ކަމަށެވެ. އަދި ތަޅުދަނޑި މުށުތެރެއިން ދޫނުވެ އޮތްއިރު އަތްތިލަވެސް އޮތީ މުށްކެވި ބާރުވެފައި ކަމަށް އޭނާ ބުންޏެވެ. އޭނާ ބުނީ ހަނީފުގެ މުށުތެރެއިން ސައިކަލް ތަޅުދަނޑި މޫދުގެ ތެރެއަށް ވެއްޓިގެން ނުގޮސް އޮތީ ގެނބިގެން މަރުވީއިރު ކުއްލިއަކަށް އޭނާގެ އަތުގެ އިނގިލިތައް މުށްކެވި ބާރުވުމުން ކަމަށް ލަފާކުރެވޭ ކަމަށެވެ.
"ގިނަމީހުން ބުނަނީ ގެނބިގެން އަޑިއަށް ދިޔައީ ހަމަ ކުއްލިއަކަށް ހަނީފަށް ކުރިމަތިވި ސިއްޙީ މައްސަލައަކުން ކަމަށް ބޮޑަށް ލަފާކުރެވޭ ކަމަށް، ގެނބިގެން މަރުވިއިރު އޭނާ ސަލާމަތްވުމަށް މަސައްކަތް ކުރިނަމަ އަތްތިލަ ނުހުޅުވިއެއް ނުހުންނާނެ، އަދި އެވަރުގެ ކަމެއްވާއިރު ސަލާމަތްވާން އޭނާއަށް މަސައްކަތް ކުރެވިފަ ހުރިނަމަ އަތްތިލަ ހުޅުވި ސައިކަލް ތަޅުދަނޑިވެސް އަތުން ދޫވީސް މޫދު ތެރެއަށް، އެވަރުވާއިރަކު ސައިކަލް ތަޅުދަނޑިއެއް ނޯންނާނެ އަތަކު، ހަމަ ކުއްލިއަކަށް ސިއްޙީ މައްސަލައެއް ދިމާވެ އަތްފައި މުއްކެވިގެން ސައިކަލް ތަޅުދަނޑި މުށުތެރޭގައި ތާށީވެފައި އޮންނާނެ ކަމަށް ބެލެވެނީ" އޭނާ ބުންޏެވެ.
އަމިއްލަ ކްލިނިކެއްގައި މަސައްކަތް ކުރައްވާ ޑޮކްޓަރަކު ވިދާޅުވި ގޮތުގައި ކުއްލިއަކަށް އަކުނިވަޔަށް ދަމައިގަތުމުންވެސް އަތްތިލަ މުށްކެވި އަތްފައި ހަރުވެދާނެއެވެ. ނުވަތަ ކުއްލިއަކަށް ދިމާވާ އެހެން ކަހަލަ ސިއްޙީ މައްސަލައަކުންވެސް އެހެން ދިމާވެދާނެއެވެ. އެހެން ކަމުން ސިއްޙީ މާހިރުވެސް ބޮޑަށް ބުރަވަނީ މޫދު ތެރޭގައި އޮއްވާ ހަނީފަށް "ކުއްލި ސިއްޙީ މައްސަލައެއް" ކުރިމަތިވީ ކަމަށް ބެލުމުގެ ފުރުޞަތު ބޮޑު ކަމަށެވެ.
ހަނީފް މަރުވީ ރާވައްރެހާއަށް ގޮސް މޫދަށް އެރުނުތާ ގިނައިރުތަކެއް ނުވެއެވެ. ބާރު އޮއިވަރެއްގައި ހަނީފާއި އޭނާގެ އަންހެނުން ފާތިމަތު ލަބީނާ ޒުހައިރު ދަމައިގަނެގެން ގެންދިޔަ މިހާދިސާގައި ހަނީފް މަރުވިއިރު އޭނާގެ އަނބިމީހާ ވަނީ ސަލާމަތް ވެފައެވެ. ހަނީފުގެ އަންހެނުން ބުނެފައި ވަނީ އޮވަރުގައި ދަމައިގަތްތަނާ "ގޮތެއް އެބަވާ" ކަމަށް ހަނީފު ބުނި ކަމަށާއި ދެން ފެނުނީ އަޑިއަށް ދިޔަތަން ކަމަށެވެ. އެނގިފައިވާ ގޮތުގައި ހަނީފާއި ލަބީނާ ކައިވެނި ކުރިތާ އަދި ވާނީ ހަޔެއްކަ މަސް ދުވަހެވެ. ހަނީފް ވަނީ ކުރިން ކައިވެންޏެއް ކޮށްފައެވެ. އެ ކައިވެންޏަށް ލިބިފައިވާ ފަސް އަހަރުގެ ދަރިޔަކުވެސް އޭނާ މަރުވިއިރު ދުނިޔޭގައި އެބަހުއްޓެވެ.
ފުލުހުންގެ ވަޒީފާގައި ހުރި ހަނީފުގެ ހަށީގަނޑު މިހާރު ވަނީ ވަޅުލާފައެވެ. އޭނާގެ ހަށިގަނޑު ވަޅުލާފައި ވަނީ ފުލުހުންގެ ބެލުމުގެ ދަށުން ހަނީފުގެ އުފަން ރަށް ކަމަށްވާ މާލެ އަތޮޅު ކާށިދޫގައެވެ.
