ރާއްޖެއިން ސްރީލަންކާއަށް ކަނޑައަޅުއްވާފައިވާ ސަފީރު މުޙަންމަދު ޙުސައިން ޝަރީފް (މުންދު) ސްރީލަންކާގައި "ސައިޒް ވާނެ" ކަމަށް މިވަގުތު ލަންކާގައި ހުންނެވި ކުރީގެ ފޮރިން މިނިސްޓަރު މަސްއޮޑި އަޙްމަދު ނަސީމް ވިދާޅުވެއްޖެއެވެ.
ކުރީގެ ރައީސް މުޙަންމަދު ނަޝީދުގެ އަރިހުގައި ލަންކާއަށް ހުކުރު ދުވަހު ވަޑައިގެންނެވި ނަސީމް ކުރެއްވި ޓްވީޓެއްގައި ވިދާޅުވެފައި ވަނީ ސަފީރުކަމާ ހަވާލުވެވަޑައިގަތުމަށް ލަންކާއަށް ވަޑައިގަތީ "ތިމާއަށް ނުކުޅަދާނަ ވަރުގެ ބޮޑު ފައިވާނެއްގައި" ކަމަށެވެ.
ސަފީރުކަމުގެ ފަތްކޮޅު ސްރީލަންކާގެ ރައީސް ސިރިސޭނާއަށް އަރުވަން ލަންކާއަށް ވަޑައިގެން މިވަގުތު ހުންނެވި މުންދުއަށް ނަސީމުގެ ބަހުގެ ހަމަލާއެއް މިފޮނުވާލީ މުންދުވެސް ދާދި ފަހުން މީޑިޔާގައި ވަރުގަދަ ބަހުގެ ހަމަލާތަކެއް ދެއްވާފައި ވަނިކޮށެވެ. އަދި ކުރީގެ ރައީސް މުޙަންމަދު ނަޝީދު ލަންކާއަށް ވަޑައިގެންފިނަމަ ހައްޔަރު ކުރެވިދާނެ ކަމުގެ އިޝާރާތެއް މުންދު ދެއްވާފައި ވަނިކޮށެވެ.
ސަފީރުކަމުގެ ފަތްކޮޅު އަދި ނޭރުވި ލަންކާގައި މުންދު ހުންނެވިއިރު މިވަގުތު ކުރީގެ ރައީސް ނަޝީދުވެސް ހުންނެވީ ކޮލަމްބޯގައެވެ. ސަފީރުކަމާއި ހަވާލުވެވަޑައިގަތުމަށް ފަހު މުންދު ވިދާޅުވެފައި ވަނީ ލަންކާއަކީ ފަރިތަ ގައުމެއް ކަމަށާއި ލަންކާގެ ވެރިންނާވެސް ގާތްގުޅުމެއް އެބައޮތް ކަމަށެވެ.
